Yeremiya 12 - Bible en Guidar

¹ Yawe təstəs kənan gərak ka nəgəɗgən wən də isi. Də as pak wanəpel suk aka wən nawtawwəna: Vimi tive net məsdarawɗe adahhar ammbet di? Vimi məzəmaŋ kiya assoŋ kiyit foŋgo di?

² Kimpeke, ampanək slalwayti, tahəŋ əɓayaŋgə gəm tahəŋ uwaŋgə. Iya nok tay pay pak a meti, ya mekret ɓa'i də isi hara.

³ Kəsənwəka Yawe, is tat uluwa, is tat əkoson makraw an tay də isi. Net aɗi temme va timeŋgiɗ nawfoto, azi sek əga pay nawtaw wəleti.

⁴ Pay gbəŋgbar dələv adawsan addəv əhəm na gəlabaya di? Pay gbəŋgbar geslembet sura adassoŋ akawɓət di? Zəgeɗ memeyẽɗ dit biŋgeɗ pak tahəŋ əmtaŋ vi mambray net ɗiy məs dəssoŋ aka dəlvəŋka, tay ənahaŋ na: Awla na ənziya nam nabe ɓa.

⁵ An ənza dit ɗiy ayokuk na, mbar kədawsla zuk azet pilseŋge di? Is tat kiyuk foŋgo addəv dələv məs də zazay ɓa mbar kədaɗɗa addivit wəleŋɗe rəɓ na ma Yurden di?

⁶ Vi milmiŋgiɗko may daŋgla na afuk zlaŋ tay əzəmən kiyko. Tahəŋ əŋzlaŋ vaŋvəl ammbok dayadaya, kədappan zuk sit pay adawpeleŋ sukun ma nenek ɓa.

Maŋgəlva azganək gəla nan dit ɗiy nani

⁷ Nəppanək gəla nawa, nəzganək zəganawzəmgəla nawa, nəppanək zəga məs nəŋgəl avet meseŋgiɗni.

⁸ Ɗiy zəganawzəmgəla nawa akkpaŋgaŋgək va ɓoolu addivit wəleŋɗe: Abayaŋgək gagay viwa. Vini neŋgliw əmpa ɓa.

⁹ Ɗiy zəganawzəmgəla naw akkpaŋgaŋgək va gbuzlu məs biŋgeɗ assoŋ kiyən karkar sa? Məddoŋ məkkelet zəgeɗ nawra baymeti! Miki aka əzəma!

¹⁰ Məzuteɗeŋɗe diyɗa araygitinik megezlembirkeɗ nawa, andapanənək guli nawa. Akkpaŋganənək guli məs nəŋgəl ka kapta-muyã daŋdaŋgə,

¹¹ Məkkpaŋgani va kapta akkpaŋgək daŋdaŋ abawa, dəlev dəwən nan arayka vi ɗəf tay dəɗi makran akan ɓa.

¹² Aket mossorgoɗe məs daŋdaŋ na kapta-muyã pak məmõhẽtin ɗiy azzoŋko. Masalam na Yawe tay əzəm dələv təŋ sə metteɓ man hã metteɓ man mbərən, ɗəf tay dədawnan nek ɓa.

¹³ Aslgaŋgək haykəmari, yaŋ apeteŋ tintifɗe. Ayanənək ziti ya zəga tay arahaŋ ɓa. Wil dədukum sən əpet nokum! Vi ədagədəv na Yawe vakvaki.

Daya dit meggeŋgiɗit mə Israyelɗe

¹⁴ Aŋki an Yawe anah aket meggeŋgiɗu mbəreyit pakə, en məzurəŋgənən zəganawzəmgəla naw məs nipsit ɗiy naw ka neti: sən Israyel. In yakəŋ əptiwit səka dələv neti, wanəptiw ɗiy na Yuda səweleŋti.

¹⁵ Sədərɓaga an niptiwik na, wanəmsak ula sasẽhti, wanəmndegeti, ɗəf pak aka va nani, ɗəf pak aka dələv nani.

¹⁶ An iyak ayaganən ədaw net ɗiy naw kasway də iya naw na: «Də Yawe madarani!» Va ayagan sitin ɗiy naw əsway də ba'al asna wassoŋ də gəla a waleŋgit ɗiy nawa.

¹⁷ Ya an dəprəmaŋ ɓa, asna wanəptiw ɗiy veti, wanəptiwe, wanəzeti, Yawe aɗiymani.