Yeremiya 11 - Bible en Guidar

Ɗiy məs dədawraygənən an aynaŋ naɗɗa

¹ Əpel an sən Yeremiya səza Yawe yaŋ dawnəh na:

² Məprəm wən na wənmiynaŋka! Kənah sitgin ɗiy na Yuda dit en dəssoŋ a Yerusalem,

³ kənah sitgin na: «Vaŋki Yawe Maŋgəlva na Israyel anahə: Əray aka ɗəf məs aprəmna əpel na wənmiynaŋ,

⁴ məs nəɗi wən nan sit efiŋgiɗkum gala nəgilgit səddəv movoro offo nawhə̃s təbəz ana Eziptə dawnəh na: “Məprəm əpel nawa, kəɗɗeningin zəgeɗis pak va nəɗi sukum wən nani. Asna wakəssoŋ ɗiy nawa, naw nəsawgən Maŋgəlva nokum.

⁵ Vi nəknahangən əsway məs nəsway sit efiŋgiɗkum napsit dələv məs moŋvo də amama adawdaw akan loklok va asan nokum dəpaŋkəŋka.”» Yaŋ nəzlani, nəmna: «Dəsan vaska Yawe.»

⁶ Yawe anah suwək əmpa na: Aslan wəlok a walaŋgəleɗe gugriɗ na Yuda gəm aket tiveɗ na Yerusalem apel əpeləŋ də ənəh na: Məprəm əpel na wənmiynaŋka, vi kəɗɗaŋgən wəza dəndən.

⁷ Vi nəsəɓsitik efiŋgiɗukum gala nəgilgit səka dələv na Eziptə, hã gap dəpaŋka, nəppan gabba əsəɓ sit dawnəh na: məprəm əpel nawa ɓa.

⁸ Ya dəprəmaŋ ɓa, dəpakən sləmet ɓa, naway pak azbanək əɓɓəlan kiyni. Ndəni nəɗɗa əpel naddəv wənmiynaŋ pak aketi, məs nəɗi sit wən nan dəɗɗanəngəni ya dəɗɗanən ɓa.

⁹ Yawe aɓsu na: «Mərəhi wən mətuvuro aweleŋgit ɗiy na Yuda dit en dəssoŋ a Yerusalem.

¹⁰ Amndoŋguk azet heslepeɗe net efiŋgiɗit, məs dətəŋgaŋ əɓoŋ daprəm əpel nawa. Net azbetinik meŋgilveɗ meɓɓet kawgəɗ sit wəza. Ɗiy na Israyel gəm en na Yuda Aŋzluwənək wənmiyna naw an niynə dit efiŋgiɗti.

¹¹ Vi as kana, an Yawe anah yaŋka: In yakəŋ əki əray məs aɓapaŋ na əgilyoŋ sədəvən ɓa aketi. Wahəmaŋ suwəni, ya neprəmsit na ɓa.

¹² Walaŋgəleɗe gugriɗ na Yuda gəm ɗiy en dəssoŋ a Yerusalem wahəmaŋ sitin meŋgilveɗ məs adawzlaŋ sitin tursan ya əkõh tay adawkõhgitin aka pay na əray net ɓa.

¹³ Yuda əŋɗa net walaŋgəleɗe gugriɗ nok tay gba net meŋgilveɗ noko gəm gəleɗe net matuyaɗe məs kərkaŋ sən ərba wili, Yerusalem, əŋɗa net gəleɗe net matuyaɗe nok nawzla tursan sən Ba'al tahəŋ gba tiveɗ noko.

¹⁴ Ya nok na, kədakkam viyit ɗiyiŋ ɓa; kədawhəm ammbet ɓa; vi nəprəm na pay an adakkamawən an tatwãh arihik ɓa.»

Israyel, hereme na Daya

¹⁵ Miy gəraw təde əɗɗa anawda əmpa di? Zəga naɗɗa nat də pepeti diyɗa! Azat na iynan mata may slu na matuya wazargənən əray səkat sa ka tənnekengən zət sa?

¹⁶ «Hereme məndəfən dit kirtin məzulaŋ lelewɗe,» Yawe alvoko. Asɗak offo akan ayãyã, van awirke, məŋgluni kivani.

¹⁷ Yawe Məzuɓappak məs dəmpuk apelik aka wən noko, vi mbərayən məs ɗiy na Israyel dit ɗiy na Yuda aɗɗaŋgə: adansuwənək gədəvu də əzla tursan sən Ba'al.

Ɗiy na Yeremiya tusso asulyoŋguk akani

¹⁸ Yawe assak suwəka, ndəni nəsəna. Yaŋ kərban su əɗɗa neti.

¹⁹ Naw intat va ndargayãk məprəm ma, məkət a təki nawtaw wəlata, nəsən na ahẽweŋgək wən akawa ɓa, aɓɗaŋ na: «Məbəl səm wəlaŋga van də suwerin pakə, məzansəm səka dələv net ɗiy medereti, iya nan adawya əmpa ɓa.»

²⁰ Ya Yawe Məzuɓappak ndəni mətawwən təstəsə, məkkesen megenegene gəm makra ɗəfa. Wanula əmpəlkiya nok aketi, vi suk nəppan wən nawa.

²¹ Vi vaski Yawe anah vaŋ aket ɗiy na Anatot məzukoyokun dawnəh na: Kədaɗɗa kəleŋ aka əya na Yawe ɓa, vas ɓa wakəmtə a vamə.

²² Vi vaski Yawe Məzuɓappak anah na: «In yakəŋ əsilyaw aketi. Gewleɗ wamtaŋ a ma masalam, kirtit mezeŋgleket dit muguluŋgit wamtaŋ sən mayã.

²³ Tay nambra səmmbet pay nədawki əray hã gap aket ɗiy na Anatot, əzva məs nədawsilye aket ɓa.»