Yeremiya 10 - Bible en Guidar

Maŋgəlva madaran gəm Zəgeɗkameŋgilveɗi

¹ Məprəm əpel an Yawe apel aka wən nokum ɗiy na Israyel.

² An Yawe anah yaŋka: Kədayaganən əzban tive net ɗiy-ɗar ɓa; kədawgəslne'en sitin zəgeɗ en dədarbaŋ a disiŋ ɓa vi ɗiy-ɗarə vet tay əppanən zit zəgeɗ vet əgeslnegiti.

³ Əzba net ɗiyiski atərna ɓa. Vi wabəlaŋ wəlaŋga sura məzaɓ-zəga wazaɓ də məsseɗe.

⁴ Kakkəɗ sən təbəz babar də meleŋge. Karman dit ponteɗe kakkpa'ən də ndəvəl vi adaɓla ɓa.

⁵ Va zəga məɗɗan nawraket biŋgeɗ addəvit tassekeɗi, meŋgilveɗiski awpeleŋ ɓa; kawslet dəsle, vi awdawaŋ ɓa. Kəgeslne sitin ɓa: Vi aɗɗaŋ zəga sən ɗəf ɓa, atəraŋ sukumən na wəray ɓa.

⁶ Ɗəf tay va is ɓa Yawe, matuŋguk kənani iya nok metiŋgini sən gədak nani.

⁷ Naway məs awgəslne suk ɓa is Daya məlĩ net ɗiy-ɗarəŋ di? As adahsukko. Adan səret məsmaɗɗulet net ɗiy-ɗar naka dəlva gəm nammba dələv pak na ɗəf tay va is ɓa.

⁸ Beymet pak maɗɗula tay aket ɓa mətemtiŋgə, mi adawyaganən səza tuya na wəlaŋga ɗar di?

⁹ Təbəz babar məbayən məkiyən sə Tarsis, gəm də meleŋge dəde sə Ufaz. Wəza na məŋzlay gəm na məhəs zəgaŋ. Mugulsit lukutɗe pepreŋɗe gəm va əffiyo na muŋgus baymet pak wəza net ɗiy məs kokoneɗiŋ.

¹⁰ Ya Yawe yi Maŋgəlva gegesiŋ, ndəni Maŋgəlva madarani, məlĩ an faɗə. An adək gədəva, dələv tay əkkere; ɗiy naket dəlveŋge awɓəsən ədagədəv nan ɓa.

¹¹ Vaŋ kədawnah sitini: Meŋgilveɗ məs ndəɗaŋ dəzəməɗən disiŋ gəm dəlvafuŋ ɓeŋki, wazaŋ səka dəlva gəm səmmba disiŋ.

¹² Daya dəɗɗa dələv də gagdak nani; aziwgin dəlvafuŋ də maɗɗula nani apakək disiŋ də əsən nani.

¹³ Dəka əpel nan iŋkile adawbayaŋ gəgay a disiŋ, adawsilgin slaybuwən hã sə təki dələv abaymani adaɗɗa əwiɗ na buna adawgilgin səmyã siddivit bətəŋɗe nani.

¹⁴ Ɗəf titir pak dərwayi əsən tay akan ɓa. Məhəs zəga pak wil ədanni aka wən na zəgakamaŋgəlva, vi zəgeɗkamaŋgəlva zəga məɗɗan də təbəz van uwawəni ɗarə. Əmpəs tay addivit zəgeɗ vet ɓa.

¹⁵ Zəgeɗ ɗarəŋgə, wəza nawmas akani yi. As pak wazə pay nedawsilyew aketi.

¹⁶ An na Yakob na va zəgeɗiski ɓa, ndən dəzeɓ zəgeɗ pakə, Israyel dəsan mahəlfa an haran nani. Iya nan na Yawe Məzuɓappakə.

Əza go'oy yi

¹⁷ Məkkelet zəgeɗ nokum səfuŋ mənokum məs kəssoŋ a walaŋgəla-metiŋ məsərŋgəslni.

¹⁸ Vi aŋki an Yawe anahə: in yakəŋ əzget ɗiy naka dələv va də məbəŋbəŋga; aka aŋ na wanəmbese adawkõhoŋ ɓa.

¹⁹ Haya iyna, məɗiysuwi vamviya! Uwwa naw anzaɗna ɓa. Naw nəmna: Aski əzəmsãhã naw kaka' wanəɓəs kəta.

²⁰ Gəzlirke naw apiwke məɓuhti helegeɗ nan pakə. Kirtiw agilyoŋguk sənawda, tahəŋ ɓa. Ɗəf tay əmpa nanslənsu gizlirke naw ɓa may naynet su məzlaraɗe naddəvən ɓa.

²¹ Vi ɗiy gugriɗ pak mətemtiŋgə, dəkayanən Yawe ɓa, vini, dədaw ammbet ɓa, gibek net atrayək pakə.

²² Məprəma, alabara tay əzani. Gogoyo metiŋgin tay əzan səka dələv na kəla disiŋ; kawzet walaŋgəleɗe gugriɗ na Yuda kakkpaŋget ka təki nassa net kirɗemuyã.

Yeremiya tay əkkam ammbet ɗiy nani

²³ Yawe nəsənəka, tive na ɗəf titir na avani ɓa ɗəf dədadawgən tələn va an dəslə aka tive ɓa.

²⁴ Azgasuwa, də təstəs Yawe, məza də ədagədəv ɓa hara, vi kədakkpaŋgaw ɗar ɓa.

²⁵ Ake herɗe nok aket ɗiy en ɗar məs dəsənkun ɓa, aket ɗiy en awyanən iya nok ɓa, vi azanənək Yakob azanənka, akkãhnənka, araygənək dələv nani.