Yeremiya 1 - Bible en Guidar

Va məya Yermiya aka wəza ( 1:1-19 )

¹ Əpel na Yeremiya wətən Hilkiya, taka səret məsdəlveŋge na Anatot, aka dələv na mahəlfa na Benyamin.

² Yawe apel sənək aka pay na Yosiyas wət Ammon, məlĩ na Yuda aka əzva makəlaw kiyən hoku na wəzəm məlĩ nani.

³ Yas apel sən əmpa aka pay na Yoyakim wətən Yosiyas, məlĩ na Yuda, hã əmbat aza əgrak na wəzva makəlaw kiyən ma taka'ən na Sedekiya wətən Yoziyas məlĩ na Yuda aka əzəm məlyã, hã gap pay məzuzelɗe asimgitin ɗiy na Yerusalem addəv təla masle'eni.

Maŋgəlva ayak Yermiya dəsangən məman ma nani

⁴ Əpel na Yawe ade suwək də wənah na:

⁵ Tak nəɓəl ərkuk addəvət mok ɓa nəsənkuko; nəwelkuk tak məɓəli əwuk tagay ɓa. Nəɗikuk ka məskəleŋ abet ɗiyi.

⁶ Nəzlanək na: «Awwo Yawe Maŋgəlva, awla naw nəsən əpel ɓa, vi wiyən nani.»

⁷ Yas Yawe amna: Kədawnah na naw wiyən nani ɓa; dərəŋ na dok azet ɗiy en məs nəslənuk azet pakə, apel sit an nəɗi suk wən nani.

⁸ Kəgeslne sit ɓa, vi in tat də is kawkõhguko Yawe aɗiymani.

⁹ Yas Yawe atəl vani, arəŋgən mawa yas Yawe amna: Awle nəɗiyək əpel naw a moko.

¹⁰ Awle nəwelkuk dəpaŋ kawslənuko, azet ɗiyi gəm azet milyeŋge: kəptugəni gəm kəkkpaŋgangəni, kəɓzlugəni gəm kəkrapgəni, gəm əmpa kərkagəni gəm kəmpagəni.

Tenɗeke gəm mesteɓe məzugəbəɗa

¹¹ Yawe apel suwəka amna: «Mə kədawla di Yeremiya?» Nəzlanək na: «Kiva teŋɗeke nədawla.»

¹² Yas Yawe aɓsu na, kulak təstəsə, vi wanəsaw ɗəhərra, kaknahan əpel nawa.

¹³ Yawe apel suwək masula'ən amna: «Mə kədawla di?» Nəzlanək na, mesteɓe məzugəbəɗ məɓe'gin man nadda kəla disiŋ nədawla.

¹⁴ Yas Yawe anah su na: Sə kəla disiŋgi yi tatwãh adazzan aket ɗiy naka dələv pakə.

¹⁵ Yawe aɗiymani, vi inyakən kawye mahəlfaɗe dit milyeŋge na kəla disiŋ pakə. Asna wazzoŋgu naway pak waɗi mazaŋga na məlĩ nan a maddamba na Yerusalem go'o. Wassoŋ ki zlava nan tərwəslə, warmaŋ mama aza Yuda.

¹⁶ Wanətawwən naw aketi vi mambray neti: azgawənka, yas azlaŋ tursan sit meŋgilveɗ meɓɓeti, gəm appu'oŋ abet zəgeɗ wəza na veti.

¹⁷ Nok na aynan dadakko. Asil dok əpel sit an nəɗi suk wən nan pakə. Kəgeslne' sit ɓa vi nədawgeslneguk abet ɓa.

¹⁸ Nəɗikuk dəpaŋ va walaŋgəla na korgu, va dədəka na təbza, gəm zlava na təbəz pepreŋge, aka dələv pakə, gəm abet milyeŋge na Yuda, abet deyeɗe, məsdəlveŋge gəm abet ɗiy naka dəlva.

¹⁹ Wagayaŋ də isi, ya askanən na wəlok ɓa, vi in tat də is kawkõhguko Yawe aɗiymani.