Yakob 5 - Bible en Guidar

Məsaryeɗ dəzinən ziti

¹ Məpak sləmokum ammba wəpeləŋka, munokum məsaryeɗi. Məhəmə məngəsl vaŋvəla vi wəzəmsahã məs dədazan diyɗa akokum.

² Arya nokum arayka, ɗəmyã azəmək lukutɗe nokum.

³ Təbəz net dələɗ nokum azəlahka, wəzəlah nan wasan nawpel akokum wazlukum va offo adawzla təkiya, vi kəkalanənək arya nokum hã gap pay nagraka.

⁴ Kəfaɗ sitin deleɗ sit məɗɗaŋ wəza aguli a nokum da ɓa. Məprəm va adawhəmaŋ də munokum, vaŋvəl net məzubəlaŋ nokum agapək a sləma Maŋgəlva Məzuɓappak məs də gbogboŋ aka zəga pakə.

⁵ Wəsuwa nokum egge addəv aryayi də wəɗɗa an nanneken zukum. Kəkərgənənək zukum va wəzgəl hãwa hã gap pay nawtaw wəlani.

⁶ Kətawənək wən aket ɗiy məs tahəŋ də mambray ɓa, kəbeyinke. Net dəɓoŋgoŋ ɓa.

Əyak temtemi ( 5:7-20 ) Wəɓəsən gəm əkkama

⁷ Milmiŋgiɗwa, məɓəsa hã gap pay Daya Yesu Kristu adazzani. Məssoŋ va məzənse adawɓəsən wəga buwən na mənziya də buwən na mawala, vi zəga nan dəsəɓgən moggoni.

⁸ Nokum pak, məɓəs vaska, kədawyaŋ də wən nan ɓa, vi pay nazza na Daya go'oy.

⁹ Milmiŋgiɗwa, kədaɗɗaŋ wərwər aket ɗiy meɓɓet ɓa, vi Maŋgəlva adawtaw wən akokum ɓa. Mətaw wən tay ziwe, a maddamba man aka ətoŋgo.

¹⁰ Milmiŋgiɗwa, məɗɗumon wən net məskəleŋɗe məs dəpeleŋ də iya na Daya va azəmaŋ sahã, də as pak aɓəsənka, məɓəs səm wən nawzəmsahã nan tam va neti.

¹¹ Mənam tat əɗiyit ka ɗiy məs dərəhaŋ zəzaya, vi dəpanən wəɓəs net ɓa. Kəprəmənək wən na Yob pak va aɓəsa. Kəsənnənka Daya atər sənək wəray nan dərɓaga wəzəmsahã nani. Vi Daya məwəl-sasãhi gəm məgəɗ moggoni.

¹² Milmiŋgiɗwa, an məs nədawnah sukuməŋ na wən metiŋgini, an munokum tat əpeleŋ wən na, kədasuwayaŋ ɓa, kədasuwayaŋ də disiŋ ɓa, kədaswayaŋ də dəlvafuŋ ɓa, awaniɓa kədaswayaŋ də zəga maɓɓan ɓa. Abbər wənah na: Ha'aw awaniɓa awwo məkki kədawdaygənən ki as ɓa, vi Maŋgəlva adawtaw wən akokum ɓa.

¹³ Ɗəf tay dədawzəmsãhã awalaŋkum sa? Dəkkaman Maŋgəlva. Ɗəf tay a walaŋkum də zən nek sa? Dəyə gəlya nawgakdakan Maŋgəlva.

¹⁴ Məsgbəgba' tay a waloŋkum sa? Dəye ɗiy gugiriɗ naddəv gəla na Maŋgəlva dəzzoŋgən wəppay sən mẽl də iya na Daya, dəkkamanəngən Maŋgəlva vini.

¹⁵ An wəkkam asapək də wətafa, wambəlgən məsgbəgba'a, Daya wapsən gbogboŋgo gəm wavvuyon sən mambray nan an agəɗəŋka.

¹⁶ Vi vaski mərban mambray nokum awalaŋ zukum aba Maŋgəlva, viyit ɗiy nokum, vi kəmbəlaŋgəni, wəkkam na ɗəf təstəs tay də gbogboŋ naɗɗa zəga metiŋgini.

¹⁷ Məɗɗumon wən na Eliya, ɗəf an lahəŋka, ɗəfi va mənamə, akkamanək Maŋgəlva zən soksok də makran taka, vi buwən adawzi ɓa, agəɗək wəzva hoku də mani, buwən dəzi ɓa.

¹⁸ Yaŋ akkaman Maŋgəlva əmpa ka buwən dəzigəni, Maŋgəlva aziyək buna zəga pak agilke.

¹⁹ Milmiŋgiɗwa, an ɗəf amzlahək ki tive na Maŋgəlva, yaŋ ɗəf amilgin aka tive,

²⁰ məsən na, ɗəf dəmilgən ɗəf mambray səka tive na mambray nani, akõhgənək ɗəfəs səma əmta, sən an məs agəɗəska mambray nan dəsan diyɗa zlaŋ, Maŋgəlva waviyan səni.