Yakob 4 - Bible en Guidar

Məzutafa gəm ənziya egge ( 4:1—5:6 ) Mədarma bayna də ənziya egge ɓa

¹ Səŋgay wəzlba də wəgay ade awalaŋkum di? Səza wəsim zəga nokum məs dədawgay a makrokum məza awɓəta ɓa ade.

² Mokum tay aka wərah zəga, ya kawrəhaŋ ɓa, vini kan kədawzaɓanən zukum kawbay ɗiyi, munokum tatəɗɗa kotoroku. Munokum tat əkayaŋ zəga, ya kərəhaŋ ɓa. Vini kan kədawgayaŋgə, kədazlbaŋ vi kərəhaŋ an məs kəŋglaŋ ɓa, vi kəssohõnən ava Maŋgəlva ɓa.

³ Ya an munokum tat əkkamanən Maŋgəlva, dəpsukumgəni, kərəhaŋ na ɓa, vi wəkkam nokum də wəɗɗum mbərayni yi, munokum tat əssohoŋ vi kanneken gəɓa zukum dəndəni.

⁴ Munokum məɓoŋkum aka Maŋgəlva, kəsənən na an kəɗɗaŋgək bayna də ənziya egge na məzuzeleŋ na Maŋgəlva kənanaŋ ɓa sa? Ɗəf məs dəŋgəl wəzban wən negge na wakkpaŋ məzuzel na Maŋgəlva.

⁵ Kədaɗɗumoŋ na an məs Əver anah na, ɗar mekeleŋgi ɓa, amna: Maŋgəlva tay də kotorok vi əmpəs məs aɗi a makram dəsangən dəndəni.

⁶ Ya gbogboŋ məs Maŋgəlva apsukuməŋka ndən dayki zəga pak də metiŋgini. Vi ɗerewel na Maŋgəlva anahək na: Maŋgəlva atokuk ki haran sit ɗiy məzəgakdakanən ziti, ya tay əpsit gagdak sit ɗiy məzuɓe'gənən ziti.

⁷ Məɓe'gən kizukum aba Maŋgəlva, məsok zukum Satan wanzan sukum.

⁸ Məzar aza Maŋgəlva nan pak wazar azokum. Məɗa vokum səza mambraya, məskoɓ mokrokum munokum muluvuluvuɗe.

⁹ Məssahan zukum məskə morkoyo, məhəmə vi mambray nokum, wəmas nokum dəkkpaŋ wəhəma, kədannekenən zukum ɓa məssahan zukum.

¹⁰ Məɓe'gən kizukum aba Daya, asna ndən sən kiyən waɓaygukum.

Kədawtaw wən aka məlmuk ɓa

¹¹ Milmiŋgiɗwa, kədawndanən gebbet ɗiy meɓɓet ɓa, ɗəf dəpel mbərayən aka məlməni, awaniɓa dənda gabbani, apelik mbərayən aka mahenziŋ na Maŋgəlva, wən ataw aka mahenziŋ na Maŋgəlva. An kətawək wən aka mahenziŋ, asna ɗəf məzəzban kənan ɓa, nok mətaw wən akan kənani.

¹² Maŋgəlva yi takərgən dəpsəm mahenziŋ ndəni dədawtaw wən akan takərgəni, ndəni takərgən dədawɓap wəkõhgit ɗiyi, ndəni dədawzeti. Ya nok istə nawa kədawtaw wən aka məlmukəŋ kan di?

Kədawgakdakanən zukum ɓa

¹³ Munokum, məprəm an məs nədaŋgəla wənahəŋ ɗa, munokum məzunahaŋ na: Dəpaŋka awaniɓa pumpum waməmbat a walaŋgəla, a təki vana məzəvgən taka adaka, məgəɗgən terere, mərahgən deleɗ diyɗa.

¹⁴ Kəsənən an məs dədaɗɗa pumpum ɓa. Munokum tat va enene məs dədawgulyoŋ an anziyaŋgək siɗɗike ətrayaŋ go'ləŋgə.

¹⁵ Aslək kənahaŋgən na: An Daya aŋgerke appamək madaramə, waməgəɗ vana də zəga vana.

¹⁶ Ya munokum dal wəgakdakan zukum də wəɗi kizukum də wəpel nokum. Zev wəɗi kizukum an vas tay lew ɓa.

¹⁷ An ɗəf asənək wəɗɗa moggoni, ya dəŋger wəɗɗan ɓa, asna mambray agəɗə.