Yakob 3 - Bible en Guidar

Məzutafa gəm hərzlumən ( 3:1-18 ) Hərzlum ɗəfa

¹ Milmiŋgiɗwa, ɗiy adassoŋ diyɗa mərbaŋ wən na Maŋgəlva səwalaŋkum ɓa. Kəsənənka mənam mərbəwən kawtawi wən akam daykiyit ɗiy pak də tatwãha.

² Mənam pak mənam tat əraygən wən pay pak də tive temtem diyɗa. Ɗəf məs awraygən wən də wəpel nan ɓa, nan ɗəf moggoni sawɓa, asənək ərma zən səza mambray pakə.

³ Mula va mədawgul sit elzeɗ amet pilseŋge, vi dədawaŋgən a təki məs məŋgələ, mərahgən wəket a təki məs məŋgəl pakə.

⁴ Məɗɗumon wən net bəlayɗe də gugriɗe net pakə, də səmyã adazan də gagay aket pakə, ya məzəŋkoron tay əŋkoron dət zəgak muzliyakə, tay əkan a təki məs aŋgəl pakə.

⁵ Vaski'e də hərzlum ɗəfa, də muzliyak nan pakə, tay əpel wən nawla zən diyɗa. Məɗɗumon va slayoffo muzliyak tədawzla muya pakə.

⁶ Hərzlum ɗəf pak tay va offo, akkalanək mambray naka dələv pak azani, tay əsan addəv gəɓa zə ɗəfa, tay ətraygən mambray addəv gəɓa zə ɗəf pakə. Hərzlum ɗəf tay əsɗa offo məs nawzla pay nanziya nam pak təŋ səza uwa namə hã gap pay namta, hərzlum ɗəfa offo nan tay va offo məs amta ɓa.

⁷ Ɗəf waɓap wəsərəkgən zəgeɗ nawra pakə: Biŋgeɗi, zəga məkrokoni dit kilif pakə.

⁸ Ya ɗəf tay nawɓap wəsərəkgən hərzlumən ɓa, məkuni sawɓa ɗəf tay nawɓap wəsərəkgən ɓa, vi aknahək də muwən nawbay ɗiyi.

⁹ Də hərzlum ɗəfi mədawgakdakan Daya nam Afəmə, ndəni mədawret ɗiy məs Maŋgəlva azəməɗ dəgulyoŋ va ndəni.

¹⁰ Wən nawgagdakani, wən na wəra pak səza ma ɗəf takaŋ pak adawgilyani. Milmiŋgiɗwa an vas tay law kpak ɓa.

¹¹ Heret iŋkile taka ayəm na iŋkile nenekɗe, dit iŋkile nzonzomɗe pak ɓa.

¹² Milmiŋgiɗwa, sokoyo awəna hereme ɓa, megezlembirke awəna sokoyo ɓa'a. Vaski'e iŋkile mbreyit akkpaŋgaŋ na iŋkile gənɗət ɓa.

Wəsən məs dəde sə disiŋ

¹³ Ɗəf tay də maɗɗulan məzusən zəga awalaŋkum sa? Dərbangən də wənziya nan moggoni, də wəɗɗa wəza moggoni, də wəɓe'gən kizəni də maɗɗulani.

¹⁴ Ya an kotorok tay azokum, an makrokum tay mbərayən, an wəɗɗum nokum pak aka zukumi kaka'ə, kədawɓaygənən kizukum ɓa, kədawaŋ tepelke vi kawzla ki gegesiŋ ɓa.

¹⁵ Maɗɗula nawsən zəga zemvin aska, dəde sə disiŋ ɓa, nan səka dəlvafuŋ ade, səza wən na gəɓa zə ɗəf ade, nan səza Satan ade.

¹⁶ Vi a təki məskotorok də wəgay asani adaki'e wəsler tay ɓa də mambray pak asani.

¹⁷ Ya maɗɗula an nawsən zəga məs dəde sə disiŋ, nan salalayi. Nan tay əki əssa zay də ɓatɓatə, də bayna, awɗeket ɗiy ɓa, awa tepelke aket ɗiy ɓa.

¹⁸ Ɗiy məs mekret zayə, tahəŋ wəsleretin ɗiyi, ətərwəray neti, ndəni wəza moggon a mahara Maŋgəlva.