Yakob 2 - Bible en Guidar

Wəzga' aka uɗeket ɗiyi ( 2:1-13 ) Kədawɗeket ɗiy aba Maŋgəlva ɓa

¹ Milmiŋgiɗu na makrawa, adan kətafənək Daya nam Yesu Kristu məs də gagdaka, kədawɗeketin ɗiy ɓa.

² An ɗiy azzoŋguk sula a təki nakkal nokum, məsarya aguluk lukut moggoni də ndama na meleŋge aka vani, ɗəf maɓɓan tam məssãhayi, aguluk lukut mərga'ən.

³ Wakəgakdakanən ɗəf də lukut moggoni, wakənahsənən na: Asok aka mazaŋga moggoni. Asna wakənahsənən məssahã tam na: Aziw eskiŋ awaniɓa asok afuŋ ammba təlwa.

⁴ An munokum tat əɗɗa vas na, uɗak kədaɗɗaŋ a walaŋkum ɓa sa? Wən kədawtawaŋ də mokrokum mbərayən ɓa sa?

⁵ Milmiŋgiɗu na makrawa, məpak sləmokum ammba wəpel nawa. Maŋgəlva awelik məssehẽŋɗe na maheret ɗiy negge dəssoŋgən məsaryeɗ də wətafa gəm nawzəmaŋ gəla na məlĩ məs aynan napsit en dəŋgluwəni.

⁶ Ya nokum munokum tat əzeletin məssehẽŋɗe. Ya naway dədawzəmgukum sahã gəm dədawkukum abet mətawaŋ wən di? Məsaryeɗəŋ ɓa sa?

⁷ Namna ndəɗaŋgəŋ məzuraygənən iya moggon məs Maŋgəlva apsukuməŋ ɓa sa?

⁸ An kəzbanənək mahenziŋ na Maŋgəlva, məs məverin addəv ɗerewel na Maŋgəlva məs dənah na: Aŋglu meggok va kəŋglu ki zuko, asna kəɗɗaŋgək moggoni.

⁹ Ya an mənokum tat uɗeket ɗiyi, mambray kədaɗɗaŋgə ya mahenziŋ tay ətawwən akokum va kəgaraŋgək ki mani.

¹⁰ An ɗəf azbanək mahenziŋ pakə, ya dəɓe' sən an taka ɓa, kawtawi wən akan va dəɓe' sit mahenziŋɗe ɓa pakə.

¹¹ Vi Maŋgəlva məs dənah na kədawkuh a gizbe ɓa, anahək əmpa na: Kədawbay gəbay ɓa. An kəkuh a gizbe ɓa, ya kəbayək gəbaya, kəɓe' sən mahenziŋ ɓa yi.

¹² Məpeli gəm mənzi va ɗiy məs nawtawwən aket də mahenziŋ nawpilit dəssoŋgən na kiyti.

¹³ Vi ɗəf məs awla sahã aka ɗəf ɓa, Maŋgəlva pak watawwən akan məza ulasahã akan ɓa, ya an kawla sahã aket ɗiyi, asna nok pak wən armuk na ɓa.

Ətafa gəm wəza ( 2:14-26 ) Ətaf məza wəza ɓa

¹⁴ Milmiŋgiɗwa, an ɗəf anahək də man ɗar na atafək Maŋgəlva, ya wəza nan dəgilgən wətaf nan ɓa, mi adawtərsən di? Wətaf zemvin as wakõhgən sa?

¹⁵ An milmiŋgiɗuk məkristuɗe tahəŋ dit lukutɗe ɓa, tahəŋ də zəga nawzəm ɓa,

¹⁶ an kənah sitik na: Maŋgəlva dəgəɗ sukum zəzaya, dəpsukum lukutɗe dəzəmgukum kəbaŋgəni. Ya an kəpsit zəga məs wərayit asan azan ɓa na madawtər di?

¹⁷ Vaski'e an ɗəf atafək Maŋgəlva, ya tay əɗɗa wəza məs Maŋgəlva anah ɓa, wətaf nan atərna wəray ɓa.

¹⁸ Ya an ɗəf anahək na: Atafək Maŋgəlva, naw tam in tat də wəza. Wanəzlan sən na: Arban su wətaf nok məza wəza nan ɓaŋka, naw tam wanərban suk wətaf naw də wəza nawa.

¹⁹ Kətafək na Maŋgəlva, ndəni taka kaka'ə, lewi kəgəɗə, tuyeŋge pak atafənək vaska hã wəkereŋ sən geslne nani.

²⁰ Dərwa kənani, wakəŋglu nərban sukgən na wətaf məza wəza ɓa na atərna wəray ɓaŋ sa?

²¹ Də mi dəhəm Abraham asan ɗəf təstəs aba Maŋgəlva di? Vi wəza nani, məs apsən wətən an Isak ka əzaɓ-Maŋgəlva aka matuya.

²² Kulaka, ətaf na Abraham asapək də wəza nani. Ndəni kan wəza aknahan wətaf nani.

²³ Vaski aknahan wən an məs Maŋgəlva anah addəv ɗerewel məzvani, amna: Abraham atafək Maŋgəlva, Maŋgəlva aŋɗanək ka ɗəf təstəs abani. Yas Maŋgəlva aya na baynawa.

²⁴ Kəsənək kana, ɗəf wasan təstəs aba Maŋgəlva vi wəza nani də wətafi kaka ɓa.

²⁵ Vaski məɗɗumon wən nat Rahap məs akən təsat məpolkoyok lahəŋka. Təkkpaŋgək ɗak təstəs aba Maŋgəlva vi wəza nata, məs tətef maslənɗe net mə Yudeɗ anat da, təɗɗa dəddoŋgən dəka tive maɓɓani.

²⁶ Vaski'e an gəɓa zə ɗəf tay də əmpəs ɓa amtəka atərna wəray əmpa ɓa, vaski wətaf məza wəza ɓa məmtəni atərna wəray ɓa.