Wənməkkpaŋga 9 - Bible en Guidar

Maɗula tay əkkelet ɗiyi

¹ Maɗula arkak gəla nani, ampek dədəkeɗ nan buhul.

² Atawək zəga na taw ammbani, adak mbazla nani, akiyək zəga nawzəma.

³ Yaŋ aslən gorɗeŋge nan aka təki ɗogro'o iye ɗiy na walaŋgəla-metiŋ:

⁴ «naway mətiɓiɓ di? Dəmzlah dəŋka!» Aɓsən sən ɗəf məzakiyən ɓa na:

⁵ «Məde məzəm way nawa, məsə mbazla naw məs nədəŋka.

⁶ Məppan əssa tiɓiɓ-tiɓiɓi, məssoŋ madorokum, mədaw aka tive na əsəna.»

Məɗikizəni gəm məsmaɗɗula

⁷ Ɗəf məs dəsəɓsən məzəguzlo na, zəga net wil dədawrəhən. Dəhãyaŋ məsdaraw na, əra dədawmatən.

⁸ Kəsəɓsən məzəguzlo ɓa, vi adawzelko; asəɓsən məsmaɗɗula waŋgluko.

⁹ Avəlsən məsmaɗɗula, wakkpaŋ məsmaɗɗula day ki lahəŋka. Arbə sən zəga sən ɗəf təstəsə, əsən nan wambat abe abe.

¹⁰ Geslne sən Yawe na, ndəni əɗi gabba maɗɗula, əsən net en salala na, ndəni əsəna.

¹¹ Vi dənduwi ənziya egge nok adazzeke, wəzveɗe nok wanzləraŋgə.

¹² An məsmaɗɗula kənan na, maɗɗula sən kiyuk anoki. An məzəguzlo kənani, is kədarda takərguko.

Dərwaŋgək tat iya

¹³ Guluk dərwaŋkə, mə wawatə tiɓiɓ-tiɓiɓi, tay təsən sa?

¹⁴ Tat ɗewwe a metive na gəla nat aka mazaŋga, a təki an zollo na walaŋgəla-metiŋ,

¹⁵ vi kawye ɗiy mətoŋgoŋ tivetive, məzəddoŋ tive net ziwwe.

¹⁶ «Naway mətiɓiɓ di? Dəmzlah dəŋka!», Aɓsən sən ɗəf məzakiyən ɓa na:

¹⁷ Iŋkile məhẽlit nenek aɓɗaŋɓa, way nawzəm mahaɗama neki sawɓa.

¹⁸ Ya nan dəsən na adaki guzluyo ɓa, ɗiy en təyə pak tahəŋ addəv kpukpum na təki net ɗiy mimtiti!