Wənməkkpaŋga 8 - Bible en Guidar

Maɗula tay iya əmpa

¹ Askəs maɗɗula dədawya, əsən dədawslan wəlan lah ɓa sa?

² A dadwar kiyit mossorgoɗe en zigiɗzigiɗ aba tive, aka zləzlaŋgray tive pak tay ziwwe;

³ abet metiveɗ nawtoŋ a walaŋgəla, a təki nawtoŋ temtem pak tay əŋzla vaŋvəl na:

⁴ «Ɗiyi, azokum nədawtəl mawã, wəlaw tay əmbat azet ɗiy nammba dələv pakə.

⁵ Mətiɓiɓɗe, məssoŋ ketketi, məza kiyit ɓa, məyagan maɗɗula.

⁶ Məprəma, vi wən moggon nədaŋgla əpele, wən an təstəs nədaw hã' maw səkani.

⁷ Vi wən an gesiŋ dədaɓla aza geŋɗetwa, daraw daryawi aza mawã.

⁸ Əpel na maw pak təstəsi yi, zəga tay azan va tepelke may slokorro ɓa.

⁹ Bayman pak sararayi azet ɗiy en dərəhaŋ əsəna, tay horvosso aza ɗəf məzəprəm ɓa.

¹⁰ Mətaf ərba nawa, ki əkayan təbəz babara; gəm əsəna, dayki meleŋge an saksakə.

¹¹ Vi maɗɗula moggon daykiyit everzleɗ na sləma, zəgeɗ na sləma tahəŋ dəslaŋ dəndən ɓa.»

Maɗula tay ərban kizəni

¹² In maɗɗula na, əsəni yi təki nassa nawa. Nərəhək gabba əɗɗumo.

¹³ Geslne sən Yawe na, ndəni əzel zəga mbərayən, nəzelik əkaɓa, əɓaygən-kizəɗəfa, tive na mambraya, gəm əpel net tepelkeɗi.

¹⁴ Əsəɓa may əsla-zəɗəfa, zəgeɗ nawəŋgə, in adawyaŋ əsəna, gbogboŋ zəga nawi.

¹⁵ Də iyni milyeŋge adawzəmaŋ məlyã, may mətawaŋwən adarbanən əɗɗa təstəsə.

¹⁶ Də iyni yi deyeɗe adadawgənən dəlva, ɗiy na məlyã may mətawaŋwən na təstəs pakə.

¹⁷ Naw ɗiy en dəŋgluwən nədaŋgla, en məzukayawən pak warəhwənən.

¹⁸ Əzaɓa də gagdak pak azawəŋgə, may arya nawzəmgəla gəm təstəsə.

¹⁹ Ətər wəray naw moggoni day ki meleŋge day ki meleŋge an saksakə, ərəh səzaw adayək ki təbəz babar məwele.

²⁰ Aka tive na təstəs nədawdawa, aka tive na an dəslə.

²¹ Kapsit zəga nawzəmgəla sit en dəŋgluwəni, wanəknih sit mehẽɗ na arya neti.

²² Yawe azəməɗwəka, intə ətəŋ na wəza nan daabəŋ ki an agəɗ lahəŋka.

²³ Gala farfar məzəməɗwa, gala ətəŋ nani, gala ətəŋ na dəlvafuŋgi.

²⁴ Gala delŋgeɗek kpak tay ɓa məwuwa, gala iŋkile mima tahəŋ tagay ɓa.

²⁵ Tak məziwgiti yi mossorgoɗe gugriɗ tagay ɓa, tak mossorgoɗe tahəŋ ɓa, məwuwi egge,

²⁶ aka dəɓəl əzəməɗ dəlvafuŋ may muyã tagay ɓa, may burɗuk naka dəlvafuŋ dayday ɓa.

²⁷ Gala aziwgin disiŋ na, naw in tat adak səkay, gala aver zəga kuɗuvurro aka pehe,

²⁸ aka akkpuɓ slaybuwən a disiŋ, aka iŋkile na pehe adarbanən gərom neti;

²⁹ aka azi meŋge sən pehe, iŋkile awtoŋgoŋ ki man ɓa, aka aɗi gabba dəlvafuŋ.

³⁰ In tat dasək a maŋgavan va məsən zəga, intə ənnek na makran gərak məsmay aban pay pakə.

³¹ Məsmay də ənziya egge dəsan dələv nani; a weleŋgit ɗiy nədawrəh ənnek an na makraw gərakə.

Əzaɓ aka ɗəf məprəm ma na maɗɗula

³² Ya gəgaŋ na kirni, məprəm suwa. Əzaɓ aket ɗiy en dəzbanən tive nawa.

³³ Məprəm ərba nawa kəssoŋgən məsmaɗɗula, kədasmaygənən ɓa.

³⁴ Zəzay aka ɗəf an dəprəm suwa, məzusan ɗeŋge aza əsɓəta pak a maddambawa, məzusan məga aka metive nawa!

³⁵ Vi ɗəf an dərəhu na, arahək zeŋgile, arahək kinenek aza Yawe.

³⁶ Ɗəf dəgəɗ su mambray hara na, mbərayən adaɗɗa aka zəni, məs dəzelwən pak na, əmta adaŋlaŋgə.