Wənməkkpaŋga 7 - Bible en Guidar

Məpolkoyok tat əmbəɗan gawla

¹ Wətuwa, arma əpel nawa, arme mahenziŋɗe naw kãwə.

² Arme mahenziŋɗe nawa asna wakəsok madoroko, ərba naw dəsan va wawyãk horoko

³ Aynet azet kirtin voko. Aver a mokroko.

⁴ Anah sən maɗɗula na: «məlmu məguluŋgut kənani», kəyagən əsən na həlfu məguluŋguta;

⁵ vi kawtaɗuk səzat guluk na gizbe, məpolkoyok ma neneke.

⁶ Intat a ma təkifoŋgo məppa naza gəla nawa, nəwələk appaka.

⁷ Yaŋ nəwəl gawla dərwa səret mətiɓiɓɗe.

⁸ Adawtoŋ dəka tive də maŋgava təki təsata, agəm tive nadda anatda.

⁹ Moskoyi, aka pay atəpka, dəfəɗ tiŋgbizlim.

¹⁰ Guluk məs kuketək nak dal əddat ələmsən də lukut na polkoyo azata.

¹¹ Mə wawatə məɓoŋta, tələt awziw eŋgil anadda ɓa.

¹² Gəgaŋka tat aka tive, gəgaŋka tat a lumuɗi, a təki an zlurzlur pak ndət adak səŋgəŋga.

¹³ Yaŋ təsupo, təfyokoni, tənah sən məza də wil arat ɓa na:

¹⁴ «Əzaɓ-Maŋgəlva nawrəh zəzay naw tay nawda dərəŋ na, dəpaŋ nəpələk kiwa.

¹⁵ Ndəni nəgil kalma də isi, kawla horoko, ya nərəhkuko.

¹⁶ Nəpakək borgeɗ aka zəga nafna nawa, gabagaɗe na Eziptə muhẽt də ngərayã.

¹⁷ Nərdəsək təki nawvoŋ naw də tursan na mir, na tigbire gəm na sinnamom.

¹⁸ Ade mərbangən əŋgla sən zəmə hã təki dədaŋgə. Məttəmangən nenek əŋgla.

¹⁹ Vi zəlu tay eŋgil ɓa. Ambatək malaka faraɗa.

²⁰ Agəmək pertete net koɓeɗ avani. Təla muguluŋgun adawmilyen eŋgili.»

²¹ Yaŋ tədoɗ kiyən də kuket nat gbaŋ naka. Təkkən də manenek nata.

²² Ndən ammbat tiɓiɓ va wasli daddan a təki nawtaw wəlani, va ɗəf mətemin məɓrukun narbəsəni!

²³ Har watilik hã aza memɗekeni, va bəŋga adawgəm zən ətoŋ addəv zəva, awsənən na kizən ama əzay ɓa.

²⁴ Yaŋ kan na kirni, məprəm suwa, məpak sləmokum ammba əpel na mawa.

²⁵ Mokrokum adawgəm tive natəs ɓa, kədawza aket tiveɗ nat ɓa.

²⁶ Vi kigəbayɗe net en təzbərgit diyɗaŋgə, en badawayɗe zlaŋ təbeyik pakə.

²⁷ Gəla nat na ndəni tive nadda a təki namta, tay əpirken addivit giziŋɗe na əmta.