Wənməkkpaŋga 6 - Bible en Guidar

Əsla zə ɗəf səza əslan wən na əgəm dəmən sən ɗəfa

¹ Wətuwa, an kəsokuk məziwe aka dəmən na meggoko, awaniɓa kəzlanək a gəla dəf mbərən,

² kəɓrukuk kizuk də əpel na moko, kərmak kizuk də əpel na moko,

³ asna an kədaɗɗa yaŋka wətuwa: amõh zuko, adan kəbətək a dagrakay va meggoko na, doko, aɓegən kizuko, ayan meggok vani.

⁴ Kədappet sin əzzoŋ aroko, may horok əɗup ɓa.

⁵ Amõh zuk səddəv bizwil va mune, va bəŋga səmmba va mərəm biŋgeɗi.

Əsla zə ɗəf səza tampəla

⁶ Dok a ma monzoloko ɗa, zəga mətampəla! Awla ənziya neti, akkpaŋ məs maɗɗula.

⁷ Ndəɗaŋ məs daya net tay ɓa, məzuhẽyẽt gəm məzəska wəlet tay ɓa.

⁸ Tahəŋ əkayaŋ zəga nawzəm net də təlapaya, də mawala adakkalanən zəga nawzəm neti.

⁹ Hã dewɗe kədassok ɗuffo di zəga mətampəla? Dewɗe kədawsilyok səket sin nok di?

¹⁰ Nəleŋ siɗikke, nəvu' siɗikke, nəmmaɗan zu siɗikke, vok kan slakatgən kawvoŋgo,

¹¹ ya sãhã wade suk va məvoŋtive, əzəmsãhã tam va məzəlpa.

Va ɗəf muluvuluvu asani

¹² Ɗəf mədaw də muluvuluvu a man na, ɗəf ɗari, mbərayən!

¹³ Ndən əmbəsl harani, ərga tələni, may əpel dit pirŋgiɗ vani.

¹⁴ Muluvuluvu a makran pasə, nan tuŋ sən mambray pay pakə, ndən əsilgin əgaya.

¹⁵ Vini yi kan, ba' taka ləŋ tatwãh nan adazzan səni, gurzik na tay ɓa, mihã nan tay ɓa.

An Yawe azeli

¹⁶ Zəgeɗ tahəŋ sləre məs Yawe azeli, gəm buhul məs daryawɗe arani.

¹⁷ Ula na əkuwa, herzləm ɗəf məwə wəna, va ɗəf məzi mbel na ɗəf də mezlibezlibe na man,

¹⁸ makra ɗəf məzaɓ wən mbərayən, təl ɗəf an kafkaf nadda aza mambraya,

¹⁹ məziwe məwə tepelke gəm məsilgin əgay a walaŋ məlma.

Əzga' aka wən na əku a gizbe

²⁰ Wətuwa arma mahenziŋ na affuko, kədappan əyak nat mok ɓa.

²¹ Aynet paypak addəv mokroko, alew awloko.

²² An is tat əddoko, warban suk tive, an kəvoŋko, wataɗko; əfɗah nok na, nan wazək meŋ də isi.

²³ Vi əsəɓ na, ndəni lalam; mahenziŋ na, ndəni əkeɗeɗe'e; əzga naddəv əyak na, ndəni tive na zeŋgile,

²⁴ vi kawtaɗuk səzat guluk mbərayta gəm səza ma nənek nat akən məsənti ɓa.

²⁵ Kədawsim lelew nat a mokrok ɓa, tədawsuɓuk də harat ɓa.

²⁶ Vi məpolkoyok na, zəga na way moŋgosok galatiyi, ya guluk na ɗəf na, zeŋgilok bayman tədawkayani.

²⁷ Ɗəf wagul offo a ziba nan məza lukut nan əzla ɓa sa?

²⁸ Awaniɓa, an tay ədaw aka slay offo na, tələn azlə na ɓa sa?

²⁹ Vaski də ɗəf an məmbat azat ga meggeni: ɗəf dərəŋgət pak assan na bartata ɓa.

³⁰ Kawzelen səni məhãla məs dəhãl naknəh godomblokən vi may arma ɓa.

³¹ An mərmani hara na, wafaɗ təɓələn buhulu, wazan zəga nawərəh neŋgil ananda baymani.

³² Ɗəf an dəku a gizbe pak mətemni yi, kizən adawzan də əɗɗa vaska.

³³ Warah ərga, may ərba wili, ərba wil nan aggrak na ɓa.

³⁴ Vi kotorok wasilgin makra zəlta, appan na pay əmpəlkiya ɓa.

³⁵ Azi na haran aka an nawfaɗ sən ɓa, anzlərgən əvəl van zlaŋ, ataf na ɓa.