Wənməkkpaŋga 5 - Bible en Guidar

Əsəɓ aka wən nat məpolkoyokə

¹ Wətuwa, aɗi kiyuk aka maɗɗula nawa, apak sləmok ammba əsən nawa.

² Vi kawsən əkoson wəna, gəm mok dərmagən əsəna.

³ Vi mat guluk məpolkoyok aymu emelemele, mat neki də mẽl azani.

⁴ Ya sə dərɓagan na, tərãhtə va ndərzla, mat hoɓhoɓ va masalam məs man sula.

⁵ Tələt əpərkan aza əmta, ədaw nat əne' aza təki net ɗiy mimtiti.

⁶ Faraɗatə səza əkay tive na zeŋgile, tiveɗ nat əzaŋ məza ndət əsənən ɓa.

⁷ Ya gəgaŋ na kirni, məprəm suwa. Kədamzlahaŋ səka əpel na maw ɓa.

⁸ Appan tive nat faraɗa, kədadder aza maddamba na gəla nat ɓa,

⁹ vi kədapsit gagdak nok sit ɗiyi, may əzva na way nok sən ɗəf məs awla sahã ɓa ɓa.

¹⁰ Ka melekeɗ adawbaŋ də arya noko gəm wəza nok kakkpaŋ zəga nawrəh na ɗəf ɗar ɓa.

¹¹ Əbay kiyən na, haɓlakhaɓlak kədawsoko, pay slu zuk də gəba zuk adaggrakaŋgə.

¹² Wakənah na: «Kami nəzel əyak di? Kami makraw azel əzga' di?

¹³ Vimi nəprəm əyak net mərbaŋ suwən zəga ɓa gəm nəpak sləmaw ammba əyak net məzəyagawən ɓa di?

¹⁴ Siɗikke ɓa na, mandara an dəday pak akay ərəhu addəv əkkal aret ɗiy ngboŋgu.»

Guluk na gawloko

¹⁵ Asə iŋkile en dədawgulyoŋ sə gagiya noko, en səddəv vov net iŋkile noko!

¹⁶ Heret iŋkile nok dəzlbaŋ appaka may iŋkile en net lolohẽɗ nok dənzoŋ a kapta ɗar sa?

¹⁷ Dəssoŋ suk anok kaka'ə, məza sit ɗiy ɗar sap də is ɓa.

¹⁸ Afet aka heret iŋkile noko, annek dət guluk akən na gawloko,

¹⁹ lelew na gele, moggottə va mawnaŋkə; dewɗe pak bide nat dətemgukunən, əŋgla nat dəmbədok pay pakə.

²⁰ Mə dəgəɗ guluk məpolkoyok tədawmbəɗok di wətuwa, is əsmaygən makrat akən məs kəsənət ɓa di?

²¹ Vi tiveɗ na ɗəf pak tahəŋ a mahara Yawe, tay əsəŋglan bataməm bayman.

²² Heslepeɗe na məsdaraw warmanəni, warəm addivit helegeɗ na mambray nani.

²³ Nan wamtə, vi dərah əyak ɓa, kawmbəɗani sən dərwa nan day.