Wənməkkpaŋga 4 - Bible en Guidar

Əkaya gəm ərma maɗɗula

¹ Kirni, məprəm ərba na afukum, məsla zukum nawsən zəga adawyan na əsəna.

² Vi zəga nawsən moggon nərbə sukum, kədazganən əyak naw ɓa.

³ Vi naw pak nəsawək wiyən moggon ava əbba, kiyəw nek takərgu avat əmma.

⁴ Ndən əyagansu zəga gəm ndən ənah su na: «Aɗi əpel naw akoko, arme mahenziŋɗe nawa wakəsok madoroko.

⁵ Akayan maɗɗula, akayan əsəna, kədazgət ɓa, kədamzləh səka əpel na maw ɓa.

⁶ Kədappan maɗɗula ɓa, wataɗko, aŋgluwa, wakõhguko.

⁷ Ətəŋ gabba maɗɗula na, akayan maɗɗula, akayan əsən də zəga navok pakə.

⁸ Aɗi ki maɗɗula waɓayguko, waɗi kiyko an kəmbu'ək a mokroko.

⁹ Wapsuk everzle na kinenek akoko, mətərkiya na gagdaki, wataɗko.»

Əɓaŋga' sən ədaw net məsdarawɗe

¹⁰ Aprəmwã, wətuwa. Ataf an nədawnəhã, ənziya egge nok wazzeki.

¹¹ Nərbəsukuk zəga aka tive na maɗɗula, nədawgukuk dəka batam təstəsə.

¹² Vasna an kawdaw na, təluk attapna ɓa, an kanzok na, kətaŋgbãy na ɓa.

¹³ Arma əyaka, dədək adaɗɗuk ɓa; azgə sləma akani, vi ndəni ənziya egge noko.

¹⁴ Kədazban batemit məsdarawɗe ɓa, kədawdaw dəka tive net ɗiy mbəreyit ɓa.

¹⁵ Apppani, kəmbat dəkan ɓa. Amzlah səkani, dok zəga noko.

¹⁶ Awleŋgeŋ an dəɗɗaŋ mbərayən ɓa ɓa. Sin assoŋ aret an dəzbərgənən ɗəf ɓa ɓa.

¹⁷ Vi də way na daraw adazgələn kiyti gəm əsaŋ bazla na əgaya.

¹⁸ Tive na ɗəf təstəs na, tay va əkeɗeɗe'e, məzukekeɓe' abe abe hã gap aza kapaya.

¹⁹ Tive net məsdarawɗe tay va guzluyo, awsənənən na aza miyi adawtaŋgbayaŋ di ɓa.

Əziw ɓəlɓəl aka ədaw an təstəsə

²⁰ Wətuwa, agəɗ maɗɗula sən əpel nawa, apak sləmok ammba an nədawnəhã.

²¹ Adawzaraŋ faraɗa sə mahorok ɓa, azeɓet addəv kpukpum na mokroko.

²² Vi zeŋgileŋ azet ɗiy en dərihini, əmbla yi aka gəɓa zit pakə.

²³ Ataɗ mokrok day ki zəga pakə, vi səzani yi səwer ənziya egge temtem asili.

²⁴ Atak əpel məslokorslor sə boroko, azargən əpel naɗɗa mbərayən sə moko.

²⁵ Horok dəsan sek kəlabe, ula nok dəziw təstəs aboko.

²⁶ Aziyan tive na təlko, tiveɗ nok pak dəssoŋ aka tilti.

²⁷ Kədamzlah səkan dəka dəzəŋ may dəka zlaɓay ɓa. Amzlahgən təluk səka mbərayən.