Wənməkkpaŋga 31 - Bible en Guidar

Magawla təmtəmi ( 31:1-31 ) Əsəɓ sən məlyã

¹ Əsəɓ an Lemu'el məlĩ na Massa, an man təsəɓ səni.

² Anoko wətuwa, anoko wətu na uwa nawã, wətu nayna ma nawa!

³ Kədawzan gbogboŋ nok azet gil ɓa, may əppan zuk sit en dədawzetin milyeŋge ɓa.

⁴ Zəga net milyeŋge yi ɓa Lemu'el nawã, əsa mbazla zəga net milyeŋge yi ɓa, zəga məhə̃sən dədah sit ɗiy gugriɗ ɓa.

⁵ Vi an asaŋgək na, wazgətaŋ ki mahenziŋ, azgaŋ na sləma aket məzurayɗe ɓa.

⁶ Məpsən zəga məhəsən sən ɗəf məzəmta, may mbazla sit ɗiy en də əɗɗum diyɗa.

⁷ Wasə, wazgət ki sãhã nani, aɗɗumon na tatwãh nan əmpa ɓa.

⁸ Akol mok apel agəla ɗəf məs hərzlumən arəmə may ammbet ɗiy məddekit kpak ɗa.

⁹ Akol moko, atawwən də təstəsə, ahãy aka wən na məzuraya gəm məssãhã.

Va guluk na sləma təsata

¹⁰ Guluk akən na sləma na, nawãy nawrəhət di? Əlbəh nat adayək kiyit everzleɗ na sləma.

¹¹ Makra zələt akati, ərəh akkpap sən na ɓa.

¹² Moggon tədawgəɗ sən addəv ənziya egge nat gərakə məza mbərayən ɓa.

¹³ Ndət əkay zeŋze na time may helege na ngərayã, ndət əɗɗa wəza nan makrat taka də vata.

¹⁴ Tat va bəlayɗe net məɗɗaŋ terere, sə faraɗa tədawki zəga nawzəm nata.

¹⁵ Ndət əsilyat pumu əda way sən gəla nata, may ənah sit an naɗɗa sit gil en məɗɗaŋ wəza a bata.

¹⁶ Ndət əɗɗum aka wən na gulyo, ndət əlbəhən də zəga na vata, ndət əmpa megezlembirke.

¹⁷ Ndət iynan dədakat ɓəlɓələ, ndət əsɓan vata.

¹⁸ Ndət əttəman an tədawrəh neki, lalam nat amta də dəfəɗ kpẽh ɓa.

¹⁹ Vat aza kaɗasar kawwã, pirŋgiɗ vat aka paɗam ɓəlɓələ.

²⁰ Vat viŋge tədawsat dit məzurayɗe gəm əvəl sit məssehẽŋɗe.

²¹ Tawgeslne' sən təki zazay pay ɓeɓrezlerizze addəv gəla nat ɓa, vi ɗiy neŋgil anadda pak tahəŋ dit lukutɗe na səmyã.

²² Ndət əhõ zəgeɗ nazəɗ akat na helege kukuɗ na ngərayã, lukutɗe nat pepreŋɗe ɗiwɗiw lelekeɗekɗe.

²³ Zələt sənsa an tay ɗewwe aret ɗiy gugriɗ na dələv a təki nawtawwən na walaŋgəla.

²⁴ Ndət əhõ lukutɗe lelekeɗekɗe na ŋgərayã may maslapa na gize, ndət əvilit sən məgəɗ terere.

²⁵ Gbəgboŋ gəm gagdakəŋ lukut nata, də əmas amat tədaɗɗum aka an nabe.

²⁶ Də maɗɗula tədawhã' mat əpele, ərba an moggon tay aka hurzlumta.

²⁷ Ndət əzga sləma aka ənziya na gəla nata, tawzəm way na tampəl ɓa.

²⁸ Kirtət əsilyoŋ əsokota, zələt tam əɗi kiyta.

²⁹ Gil diyɗa dərbanən əssa nat guluk na sləma; ya nok kədayək kiyit beymeti.

³⁰ Kinenek awmbəɗan ɗəfa, lelew zəga ɗari; guluk məgeslne' sən Yawe, nat kawgagdakati yi.

³¹ Məpsət zəga na vata, wəzeɗe nat wapsətən gagdak a walaŋgəla-metiŋ.