Wənməkkpaŋga 30 - Bible en Guidar

Əpel na Agur ( 30:1-33 )

¹ Əpel na Agur wətən Yake. An ɗəf van aɗiyman də iya na Itiyel yaŋka, sən Itiyel də Ukal.

² Vaski, intə dərwa daykiyit ɗiy pakə, əsən na ɗəf titir tay akaw ɓa.

³ Nəyagan ərəh maɗɗula ɓa, in tat də əsən net en salala ɓa.

⁴ Nawãy dəpeŋ a disiŋ dəprik sədak di? Nawãy dəkkal ɗah səmyã a dagrakay van di? Nawãy dətər ɗah iŋkile addəv lukut nan di? Nawãy dəziwgit meŋge na dəlvafuŋ pakəŋ di? Mbari iya nan di? Iya na wətən mbari di? An kəsənka.

⁵ Əpel na Maŋgəlva pak təsi. Baray net ɗiy en dəɗamaŋ azani yi.

⁶ Kədawtep ama əpel nan ɓa, vi adawɗi suk heslepe kawɗiyuk ka məstepelke ɓa.

⁷ In tat əssõhõk zəga sula, kədawɓoŋ su tak əmta naw ɓa.

⁸ Azargən əɗɗum mbərayən də əpel net tepelkeɗ səzawa. Kədawvay arya ɓa, sahã ɓa; avay əzəm an haran naw kaka'ə,

⁹ vi nədawba ka in kawzelok də ənəh na: Naway Yawe di ɓa? Gəm nədakkpaŋ məssãhã in kawhala kawraygən iya na Maŋgəlva naw ɓa.

¹⁰ Kədawraygən sləma məgəɗ wəza aza daya nan ɓa, vi adawrayguk ka is kawsok də wən akoko.

¹¹ Sayit ɗiy tay məzeletin efiŋgiɗti, awɗinən kiyit may met ɓa!

¹² Sayit ɗiy tay məɗinən zit ka ɗiy salala ya dəskoɓnən haramba səzet dayday ɓa!

¹³ Sayit ɗiy tay məɗinən ki zit diyɗa, ulenin ɗiy pak guffo azeti.

¹⁴ Sayit ɗiy tay məs sleyit va masalam, polkomit va slohõ vi kawzet məssehẽŋɗe səka dəlva gəm məzurayɗe səweleŋgit ɗiyi.

Wənməkkpaŋga də əŋɗa

¹⁵ Darna'ãy tay dit kirtin muguluŋgit sula: ənta gəm ənta. Zəgeɗ hoku məs awbaŋ ɓa, poɗo məs awnəhaŋ na: «məkə ɓa!»

¹⁶ Təki nanziya net ɗiy mimtiti, gədəvət ndarzlaykə, dələv məs awba iŋkile ɓa gəm offo dənah ɗah na məkə ɓa!

¹⁷ Məmas aka afəni may məgəsat man na, gaŋgrekeɗ na məlpa waksolonəni, kirtin kopo wazlornəni.

¹⁸ Zəgeɗ tahəŋ hoku dəgəɗ suwən gərəŋgə, dədayaŋ kiwa, poɗo tam nawsən gebbet ɓa:

¹⁹ Batam kopo a disiŋ, batam dohõ aka milɓe, batam bəlay a pehe gəm batam əŋgla na ɗəf kəlazat gulku.

²⁰ Va ənziya nat guluk məpolkoyoku: ndət namnamə, mat kəlɓətə, ndət ənah na: «mbərayən tay nəgəɗ ɓa!»

²¹ Zəgeɗ tahəŋ hoku məs dələv adakker ammbeti, mopoɗon tam məs aɓap na əslan ɓa.

²² Ndəni an balam akkpaŋgək məlyã gəm an dərwa an abək waya,

²³ an ɗak məzelət təɗiyək zile gəm an balamək təmohuk gəlat dayak nata.

²⁴ Zəgeɗ tahəŋ memeɗeŋɗe poɗo aka dəlvafuŋ, ya net məs maɗɗulaŋgə, arəhaŋgək maɗɗula.

²⁵ Ndəɗaŋ yeŋ may monzoloko. Tay də gbogboŋ ɓa, ya də təlapay na, ndən əkkalan zəga nawzəm nani;

²⁶ koyɗoŋɗe zəgeɗ də gbogboŋgəŋ ɓa, yaŋ adaɗɗaŋ gəla net a waleŋgit gərmeŋge;

²⁷ zaray, məlĩ nan tay ɓa, yaŋ adabbal ammba zən də tiveni;

²⁸ gaslərgã məs kədarma də voko, wakərəh na tay addəvit gəleɗe na məlyã.

²⁹ Zəgeɗ tahəŋ hoku mədawaŋ moggoni, mopoɗet tam dəsən əɗi təlni,

³⁰ Ndəɗaŋgə: ɓoolu məs makran səret zəgeɗ məmeyẽɗ pakə, məs amndan dirɓe sən zəga kpẽh ɓa;

³¹ bazlay məs kofforən ɓələ awaniɓa porsoku, gəm məlĩ aba dula net məzəlpaŋ nani.

³² An kətemik əɓaygən kizuko, an kəɗɗumonək kiyko, asuk vok a moko.

³³ Əbay moŋvo akkalan ləbam, əbay məŋkən ɗəf mbel adawgilgiti. Əgilgin ədagədəv awki əgaya!