Wənməkkpaŋga 3 - Bible en Guidar

Maɗula gəm əprəm ma Maŋgəlva

¹ Wətuwa, kədazgət ki ərba naw ɓa, mokrok dərme mahenziŋɗe nawa.

² Vi wazzekenin əvoŋ noko, əzva noko gəm zazay noko.

³ Moggon də gegesiŋ adazgokun ɓa, aynet awloko, aver a mokroko.

⁴ Asna wakərah kineneke gəm əsən əsla zuk lew ama hara Maŋgəlva də ɗəf titir pakə.

⁵ Appan kizuk sən Yawe də mokrok taka, kədawziw aka əsən nok ɓa.

⁶ Tive an kəgəm pak, asən na tay, nan wakkpeŋget tiveɗ nok sarara.

⁷ Kədawɗi zuk ka məsən zəga ɓa, ageslne' sən Yawe, akkpaŋ səka mambraya.

⁸ Wasan ka mihã sən morboko gəm zəga nawsa sit sleŋsleŋɗe noko.

⁹ Aɗi ki Yawe də zəga voko, də zəga an daabəŋ na zev ərəh nok pakə.

¹⁰ Asna mehẽɗ nok waknəhaŋ də haykəmari, mbazla na meketepe waknih mozgoyɗe nok hã əggbo' afuŋ.

¹¹ Wətuwa, kədawzelen ərba na Yawe ɓa, kədawda gədəv sən əzga' nan ɓa.

¹² Vi Yawe ana ɗəf an aŋgəl adazga' səni, va afən ɗəf adazga' sən wətən an adawsa'a.

Maɗɗula gəm ənneke

¹³ Zazay tay aza ɗəf məs dərah maɗɗula gəm ɗəf məs dərah əsən əwelen wəna!

¹⁴ Vi ətərwəray an adawtər adayək ki ətərwəray an təbəz babara adawtəra, an adawki adayək ki an meleŋge saksak adawkiya.

¹⁵ Adayək kiyit everzleɗ na sləma, zəgeɗ en kəŋgəl pak aslaŋ na dəndən ɓa.

¹⁶ Zezek na əvoŋgo ammba van dəzəŋ, arya gəm gagdaka, ammba van zlaɓay.

¹⁷ Tiveɗ nan tiveɗ na nenekəŋgə, tiveɗ nan pak na zazayəŋgə.

¹⁸ Wəlaŋga na zeŋgileyi sit ɗiy en dətafnəni, en dərmanən ɓəlɓəl na, zit neki.

¹⁹ Yawe də maɗɗulay aɗi dəlvafuŋ, aziwgin disiŋ də əsəna.

²⁰ Də əsən nani, delngeɗekɗe akoloŋgu gəm slaybuwən aymu buna.

Daya tay əga məs maɗɗula

²¹ Wətuwa, arma maɗɗula gəm əwelen wəna, adawtəpaŋ səma horok ɓa.

²² Wassoŋ ka ənziya egge noko gəm zəzay sən mawəloko.

²³ Vasna wakəl tive nok kiyuk foŋgo, təluk ataŋgbãy na ɓa.

²⁴ An kawvoŋ na, gəslne armuk na ɓa; an kəvoŋko, sin nok wassoŋ neki;

²⁵ kəgeslne' vi zəga na geslne an girzik ɓa may watala net məsdarawɗe pay adaɗɗa ɓa.

²⁶ Vi Yawe wasan addəv zlem-zuko, waga təluk səza bizwil.

Əŋglu megge

²⁷ Kədawɓoŋ daɗɗa moggon sit ɗiy en də wəray nan an vok waɓap əɗɗan ɓa.

²⁸ Kədawnah sən meggok na: «Doko kəmilgəni, pummo na wanəpsuko», mbaraka zəga tay avokəŋ ɓa.

²⁹ Kədaynan əɗɗa mbərayən aka baynok dəka nan tay kiyən foŋgo də isəŋ ɓa.

³⁰ Kədaklop ɗar də ɗəf ɓa, an mbərayən agəɗ suk ɓa ɓa.

³¹ Kədawsim zəga naɗɗa na ɗəf məkaymama ɓa, kədazban ədaw nan ɓa.

³² Vi Yawe azelik ɗəf məslokorslokor, wənməɗama nan a met ɗiy en təstəsi yi.

³³ Mefɗeke na Yawe tahəŋ aka gəla na məsdaraw, ndən əɗɗa əzaɓ aka gəla net ɗiy en təstəsə.

³⁴ Dit ɗiy en məkaɓaŋgə, ndən əkaɓa; en mekret barə ndən əɗɗa sit əŋgla nani.

³⁵ Gagdaki haran net ɗiy en məs maɗɗula, məza kiyit ɓa na, wil adarbaŋgə.