Wənməkkpaŋga 29 - Bible en Guidar

¹ Ɗəf an dəɓəlan kiyən sən əsəɓ kaŋzlani girziki, mihã nan tay ɓa.

² An ɗiy en təstəs tahəŋ aka məlĩ na, ɗiy ənnekeŋgi; ya an məsdaraw dədawzəm məlyã, ɗiy ənɗəsaŋgə.

³ Ɗəf an dəŋgəl maɗɗula wanneken zə afəni. Dəzbet gil məpolkoyeɗ na, wazan arya nani.

⁴ Məlĩ məgəɗ zəga də tiven na, waziwgin dəlva, məs dəŋgəl nzalaka diya diya wapiweni.

⁵ Dəmakan meggen na, zəva adanslən ammba tələn tusso.

⁶ Bizwil tay addəv mambray na ɗəf mbərayən, ɗəf an təstəs nan wapeɓɗeki, wanneken zəni.

⁷ Ɗəf an təstəs asənək tatwãh net məzurayɗe, ɗəf mbərayən tay də əsən naprəm wənəs ɓa.

⁸ Məmasaŋ aket ɗiy aɓlanən walaŋgəla-metiŋ dəwənnani, ɗiy məsmaɗɗula net əffetenin ədagədəva.

⁹ An məsmaɗɗula asanək aba ətawwən də ɗəf an dərwa, kəta gədəvən dədə awaniɓa dəmas zlaŋ, asan na kiyən foŋgo ɓa.

¹⁰ Məziyaŋ mbel dədawzelenən ɗəf an təstəsə, ɗiy mogget tam əkayanəni.

¹¹ Dərwa na, nan ərban ədagədəv nan bayman; ya məsmaɗɗula na, nan ərma makran, əffeteni.

¹² An məlĩ azga sləma aka əpel na tepelke na, gewleɗ naban pak əssoŋ məsdarawɗe.

¹³ Tay dəsapan məssãhã də ɗəf məzuzəmgən sãhã: Yawe yi dəkol sit heret sulegiti.

¹⁴ Məlĩ mətawwən də tiven aket məssehẽŋɗe na, mazaŋga na məlĩ nan waziw ka faɗə.

¹⁵ Zleŋge gəm əsəɓ sən ɗəf awki maɗɗula; muzliya nappa dəman slo' awzi wil arat mani.

¹⁶ An ɗiy məsdarawɗe awanənək ziti, asna mambray əwan zəni; ya ɗiy en təstəs wawlanən əzbər net ɗiy veti.

¹⁷ Azga' sən wətuko, kəsokgən kiyuk foŋgo, wanneken suk zuko.

¹⁸ An ula nabe tay ɓa, kiyit ɗiy awtak ɓa; ya an dəzgə sləma aka mahenziŋ na, wanan neki!

¹⁹ Azga'aŋ sənən balam də ma ɗəf ɓa, vi waprəma ya aɓe' sən na ɓa.

²⁰ An kərahək ɗəf məgəm zən aza əpel nan na, aza dərwa kədawrəh an nawtəruk dayki səzani.

²¹ Dəsa' balam nan səka sawãn na, əgrak nan na wasan kiyən ɓələ.

²² Murkufo aɗiyaŋgan əgaya, ɗəf məs gədəvən adə na, ndən uwan mambray nani.

²³ Əkaɓ na ɗəf warbə sən wili; məɓe'gən kizən warah gagdaka.

²⁴ Duɗakan zəga də məhãla na, kizən azeli; asənək mefɗeke nakani ya dəssak ɓa.

²⁵ Geslne sən ɗəfa, anslin bizwil; ya ɗəf dəppan kizən sən Yawe wasan zayə.

²⁶ Ɗiy diyɗa dədawkayaŋ kinenek ava ɗəf metiŋ na dəlva, ya səza Yawe yi an dəslə sən ɗəf adazzani.

²⁷ Ɗəf mambray daryawi aret ɗiy en təstəsə, ɗəf məs tive nan sarara daryawi ara məsdaraw.