Wənməkkpaŋga 28 - Bible en Guidar

¹ Məsdaraw na, ɗəf tay məzərɓahan ɓa dayday na, ndən ənzani; ya ɗəf an təstəs na, nan tay va wət ɓoolu, kiyən foŋgo.

² An ɗiy naka dələv aɓoŋgoŋguk aka məlĩ na, deyeɗe dassoŋ diyɗa; ənziya də tiven adawsan na, də ɗəf məsən gabba zəga, məs də əsəni yi.

³ Ɗəf məssãhã məzəmgit sãhã net ɗiy məddekit na, tay va buwən məraygən təkiya: zəga nawzəm awsan ɓa!

⁴ Ɗiy en dəppanən mahenziŋ dədawɗiynən kiyit məsdarawɗe; ɗiy en məzəzbanən mahenziŋ dədawgayaŋ dənɗaŋ.

⁵ Ɗiy mbəreyit awsənnən an dəslə ɓa, ya ɗiy məkayanən Yawe asənnənək zəga pakə.

⁶ Ɗəɗah məssãhã məzusan təstəs ki ɗəf məsarya məslokorslokor.

⁷ Dərma mahenziŋ na, ndəni wiyən məs dəsən gabba zəga; məsan dit məpolkoyeɗ na, awki wil ara afəni.

⁸ Dənzlərgən arya nan də əŋgla akan gəm dit iŋkile ammban diyɗa na, sən məwəlsãhã aket ɗiy məddekit adakkalan səni.

⁹ Məs dəsuk sləman daprəm mahenziŋ na, əkkam nan pak wasan daryaw.

¹⁰ Məzet ɗiy en təstəs dəka tive mbərayən na, wabət addəv vov nan tusso; ya ɗiy en təstəs-gərakə, net warəhaŋ moggon ka haran neti.

¹¹ Məsarya ula zən na məsmaɗɗula; məssãhã məs dəsən gabba zəga wakkes nammbani.

¹² An ɗiy en təstəs askaŋgək wəla na, ənnek diyɗa adawsani; ya an məsdarawɗe asilyoŋko, nawãydi pak əɗama.

¹³ Dəɗaman mambray nan na, ahhar na ammban ɓa; ya an dəɗi marava dəppan gabbani, warah ulasahã.

¹⁴ Ɗəɗah na ɗəf məzugeslne pay pak sən əɗɗa mambraya, məs kiɓəɓəla wabət addəv tatwãhã.

¹⁵ Va ɓoolu adawbay gagay, va zəga darawən adawyaŋ Ursə adawzlaha, vaski məsdaraw məs dəsan məlĩ aket ɗiy məddekti.

¹⁶ Məlĩ məzakiyən ɓa dədawsok zən aza əmõh zəga; ya ɗəf an dəzel əmõh zəga, nan wazzeken pay nani.

¹⁷ Ɗəf dəbay ɗəfa, addəv magamas nan tusso adanzan ətoŋgo, kədarmanən sam ɓa!

¹⁸ Mədaw də təstəs-gərakə, wakõhu; ya ɗəf an tiveɗ nan slokorslokor na, wazbər aka taka.

¹⁹ Ɗəf dədense guli nani, wabə waya; ya ɗəf məs dəzban wən ɗar na, wardə də sãhã.

²⁰ Ɗəf an təstəs də əzaɓ adawsan akan diyɗa; məŋgəl əkkpaŋ məsarya go' na, asan na bartata ɓa.

²¹ Uɗeket ɗiy aba ətawwən na, tay lew ɓa, ya ɗəf aɗɗa mambray ammba ərəh way baran taka.

²² Mənzan ammba arya na, ɗəf van haran mbərayni yi, awsənən na zəga wakkpap səvani ɓa!

²³ Məzga' sən ɗəf na, ɗəf van wasa' səɓɓan day ki məpel nawmbəɗa.

²⁴ Məhãl səmmba afən dət man də ənəh na «zəga mbərayni ɓaŋ na», makkaya ɗəf məraygən zəga yi.

²⁵ Ɗəf məsgolvoŋgən gəsa adawki əgay ɓa; dəppan zən ava Yawe wakərə.

²⁶ Dəppan zən aka əɗɗum nan na, dərway yi; mədaw də maɗɗula na, nan wasan zayə.

²⁷ Məpsən zəga sən məssãhã na, tay dədakkpap səvan ɓa; an dəkkpaŋgan haran səkan na, wabə mefɗeke.

²⁸ An məsdarawɗe asilyoŋko, nawãydi pak əɗama; an amtaŋka, ɗiy en təstəs əwanən ziti.