Wənməkkpaŋga 27 - Bible en Guidar

¹ Kədawkaɓ ammba pummo ɓa, vi kəsən an dəpaŋ adawa ɓa.

² Malaka dəgagdokoko, məza is də mok ɓa; ɗəf ɗarə məza is sən kiyuk ɓa.

³ Gərəm teɓelteɓeli yi, hoyoŋko gədakə; ya ədagədəv na dərwa gagdak daykiyit sulegiti.

⁴ Ədagədəv awbaya, herɗe tahəŋ va məlpa dəsulup mabuzgum; nawãy nawziw aba kotorok nan di?

⁵ Ɗəɗah əhãy deredere ki əŋgla məɗama.

⁶ Vaŋvi na ɗəf an dəŋgəluk awsan də wən ɓa, əsɗa na məzuzel na, akan akani adawsan day.

⁷ An mawəla ɗəf abək na, ndən əzelen seɓe na amama; mawəla ɗəf an də may na, zəga tatrãh pak azan neki.

⁸ Va bəŋga adabbal faraɗa səza gəla nanəŋka, vaski ɗəf məbbal farada səza gəla nani.

⁹ May mẽl də tursan annekenin makra ɗəfa; nenek na bayna adayək ki əsəɓ nok sən kiyko.

¹⁰ Kədappan baynoko may bayna afuk ɓa gəm kədoddok ana məlmukda an is tat addəv tatwãh ɓa; ɗəɗah megge an go'o ki məlma an faraɗa.

¹¹ Asok məsmaɗɗula wətuwa, anneken su makrawa, nəmndagansəngən əpel sən məzurawa.

¹² Ɗəf an petpet an awlak əraya, ndən əɗama; ya net mitiɓiɓɗe na, ədawaŋ dəkani, asna ndəɗaŋ əɓuh meti.

¹³ Ataf lukut nani vi aɗiyək kiyən ka məziwe na dəmən na molhõyõ; ataf zəga səvan taf bas, vi akə wən ammbat molhõyõkə.

¹⁴ Ɗəf məmbat əsɗan meggen pum wəlan koɓokoɓo' na, wakkpaŋ azan va əra.

¹⁵ Gəla məs dədayma yororo pay na buna gəm guluk məŋgəl əgay na, məstakaŋgə.

¹⁶ Ɗəf an dəziwgət na, tay va aziwgin səmyã awaniɓa va arəm melẽ.

¹⁷ Təbəz aka təbəz adawtakaɗa, ɗəf tam əsɓan maɗɗula ɗəfa.

¹⁸ Məzgə sləma aka sokoyo wazəm uwa nani; məzgə sləma aka daya nan wara gagdaka.

¹⁹ Va hara ɗəf adarba aret iŋkile vaski makra ɗəf adarban ɗəfa.

²⁰ Təki nassa net ɗiy mimtiti gəm delŋgeɗek awbaŋ ɓa, vaski hara ɗəf pak awba ɓa.

²¹ Vov tay vi nawhə̃s təbəz babara, movoro vi nawhə̃s meleŋge; na gagdak na ɗəf tam əpel nawɗi kiyən.

²² Kəta arga dərwa a saŋni də wəlaŋ saŋni sap də hay zlaŋgə, vadərwa nan aproɗ na səzan ɓa.

²³ Asən va zəga mamayã nok asan lewlewi, aɗi kiyuk aka gazlaŋ noko.

²⁴ Vi arya tay ammba faɗ ɓa, mətərkiya tay nawsan təŋ səza sayit ɗiy hã gap sayit mbirit sa?

²⁵ An məndani marbaza, an kevile van andəfka, akkalan marbaza səket mossorgoɗe gugriɗe,

²⁶ asna, arah kirit timeŋgiɗ nawkay zəga azoko gəm porsokɗe nalbəh gulyo,

²⁷ gəm moŋvo net gilew gala nazgəl kiyko, nazgəl gəla noko gəm narma vet gil məɗɗaŋ wəza noko.