Wənməkkpaŋga 26 - Bible en Guidar

Wən net dərweŋge

¹ Va ɓeɓrezlerizze təlapaya awaniɓa buwən maŋgalaw pay əpete vaska'e gagdak awsla aza dərwa ɓa.

² Va gogoyõ adabbala, va bəŋgək na pələs tədabbala, vaskəŋ mefɗeke en ɗar armaŋ ɓa.

³ Helze sən pəlsa, azlawar sən koro, zleŋge tam sən gəɓa dərwa.

⁴ Kədawzlan sən dərwa va aza vadərwa nan ɓa, vi kədassok va ndən tam ɓa.

⁵ Azlan sən dərwa dakadaka də vadərwa nani, vi adawla zən va məsmaɗɗula ɓa.

⁶ Ɗəf dəslən dərwa də alabara na, tələn tusso adarsla, wazəm sãhã.

⁷ Va təl vədal adawya səmmbani vas wənməkkpaŋga adawsan ama dərwa.

⁸ Va əɗi gərəm addəv mabəŋbəŋga vaski əpsən gagdak sən dərwa.

⁹ Va kiva degirge məs ɗəf mbazla abay atəl a disiŋ, vaski wənməkkpaŋga ama dərwa.

¹⁰ Va gaw məhẽt ɗiy pak ɗarə, vaski ɗəf məgəm dərwa awaniɓa mədawaŋ tive ɗar aka wəza.

¹¹ Va kəra adawmilyen əzəm əpar nani, vaski dərwa adawsilgin vadərwa nani.

¹² Kəwələk ɗəf məzula zən va məsmaɗɗula sa? Səza dərwa kədawrəh nawtəruk day ki səzani.

Va mətampəl asani

¹³ Mətampəl amna: «zəga darawən tay aka tive, ɓoolu tay aka walaŋ.»

¹⁴ Va maddamba adakkpaŋ aka əŋzla nani, vaski mətampəl adakkpaŋ aka zəga nawvoŋ nani.

¹⁵ Mətampəl waska van addəv hilĩw na waya ya əmndagan a man iyani.

¹⁶ Mətampəl ula zən məsmaɗɗula day kiyik migil əsən buhul.

Wənməkkpaŋgaɗe meɓɓeti

¹⁷ Mədaw tive məs dətoŋ addəv əgay məs dəwəl sən ɓa na, tay va adarma kəra aza sləman.

¹⁸ Va ɗəf mətemin gədəvən mədan adazgan seseme də offo amani, herɗe may əmta:

¹⁹ Vaski ɗəf məmbəɗan meggeni, ndən ənah səɓɓan na «Əsmay nədasmay ɗarə ə'!»

²⁰ An seseme tahəŋ ɓa na, offo wamtə; an mədə wayawaya tay ɓa na, əgay waɓərə.

²¹ Holyoffo sən slayoffo, seseme sən offo, vaski məzugayaŋ adanzlərgənən əgaya.

²² Əpel na məndə gabba ɗəf tay va vəreŋ; ndən ətoŋ hã addivit herɗe.

²³ Va təbəz babar məbay gawla sən zəga mərkan də dəlva, vaski əpel moggon də makra mbərayən.

²⁴ Məzuzel awzi kiste aka əpel nan ɓa, zəknan kan əsan məknəhən də əmaka.

²⁵ An akkpaŋganək wəlan zay na, kədawtafən ɓa, vi əɗɗumɗe daryawɗe temtem buhul tahəŋ a makrani.

²⁶ Əzel awɗam addəv məluvluvu, ya mambray nan əppas aret ɗiy pa'ə.

²⁷ Dəso' vov na, wabət addəvən. Məkəɗŋgəl gərma, gərəm van wamil akani.

²⁸ Uwawən aka ɗəf na əzelni. Ma nenek awzan ɗəfa.