Wənməkkpaŋga 25 - Bible en Guidar

¹ Wənməkkpaŋgaɗe na Salomoŋ yeŋ meɓɓet məs ɗiy na Hizkiya məlĩ na Yuda avereŋgi.

Wənməkkpaŋgaɗe temtemi

² Gagdak na Maŋgəlva ndəni əɗaman əpele, gagdak net milyeŋge tam ndəni əkoson əpele.

³ Disiŋ də ləklək nani, dəlvafuŋ də kpukpum nani, ya mekret milyeŋge awsən ɓa.

⁴ Ahõk zəga an dəslãh ara təbəz babara, asna məhə̃s təbəz wazaɓ mesteɓe dəndəni;

⁵ Azargən məsdaraw səba məlyã, asna mazaŋga na məlĩ nan waziw aka təstəsə.

⁶ Kədawkaɓ aba məlĩ ɓa, kədawziw a təki net ɗiy gugriɗ ɓa.

⁷ Ɗəɗah dənah sukungən na: «Ade ahəŋka! Ki ərbəsuk wil aba gawla na məlyã.»

⁸ Kədawgəm zuk əka wən na meggok aba təki nawtawwən ɓa, mbar kədaɗɗa aza əbayman an arbək na vaski ɓa di?

⁹ An is tat aba ətawwən də meggoko; kədappasan an ɗəf mbərən apel suk məɗama ɓa,

¹⁰ vi adarbə suk wil an aprəmək ɓa, ya an kəpel mbərayən azaɓ na ɓa.

¹¹ Va zəga na təbəz babar məbay sən gawla də meleŋge, vaski əpel an aka tələn asani.

¹² Va ndamak na meleŋge gəm mipa'a na meleŋge saksakə, vaski əzga' na məsmaɗɗula a sləma ɗəf məzəprəma.

¹³ Va səmyã zazay pay na ɓeɓrezlerizze, vaski maslən an mədaw təstəs akan na ɗəf məs dəsləna: alhəɗan sən makra daya nani.

¹⁴ Slaybuwən də səmyã məza buwən əzi ɓa! Vaski ɗəf məzuɗi zən ka məzuvəl də man uwawən ɗarə.

¹⁵ Də əɓəs na, ɗəf waɓap ədoɗ ki mətawwəna; hərzlum ɗəf nenek waɓap əŋzlu sleŋsleŋ.

¹⁶ Kərahək amama sa? Azəm gala may noko, vi kədawba dəndən is kawparən ɓa.

¹⁷ Dok təltak-təltak ana meggok da, vi adawya də is ka ndən kawzeluk ɓa.

¹⁸ Tandaŋ, maslalam, har məs mani, vaski ɗəf məziwe net tepelkeɗ aka meggen asani.

¹⁹ Va slay ɗəf an arayka, va təl vədal, vaski əppan əɗɗum nok aka məzəmki ɗəf pay na tatwãhã.

²⁰ Əkgbuk lukut səza ɗəf pay na səmyã, əman moɗokroy aka bətuwa, as pak məstakayi də iya gəlya nannek sən məs gəbay dəgəɗ azani.

²¹ An may tay əda məzuzelko, apsən əzəma; an meme tay ədanəni, apsən iŋkile dəsə.

²² Vi vasna, slayoffo kədakkalan aka kiyən. Yawe wapsuk zəga na voko.

²³ Səmyã na kəla disiŋ dədawki buna, əpel sekeseke awros kiheret ɗiyi.

²⁴ Ɗəɗah əvoŋ aka metteɓ ma gəla məggbo'o, ki əsap gəla dət guluk məŋgəl əgaya.

²⁵ Va iŋkile zazayɗe sən ɗəf məyan, vas alabara nenek dəde səka dələv fafraɗa asan.

²⁶ Va iŋkile məndikti, va iŋkile məŋginti, vaski ɗəf təstəs məzəkker aba məsdaraw asan.

²⁷ Moggoni əzəm amama diyɗa ɓa, may əkay gagdak aka gagdak ɓa.

²⁸ Va walaŋgəla məpiwen tay də zlava akan ɓa, vas ɗəf məs man arma ɓa asani.