Wənməkkpaŋga 24 - Bible en Guidar

Məsmaɗɗula gəm məsdaraw

¹ Kədaɗɗa kotorok net ɗiy məɗɗaŋ mambray ɓa, kədaŋgla əssa dənɗaŋ ɓa.

² Vi aka əraygən təki yi mekret adaɗɗumo; an adawpeleŋ pak tay aka tələn ɓa.

³ Də maɗɗulay gəla adarka, də əsən əwelen wən tam adawsan gboloŋgboloŋgu,

⁴ də əsəni gədivit gəleɗe adaknəhaŋ də arya na sləma may zəgeɗ moggeti.

⁵ Ɗəf məsmaɗɗula na, tay də gbəgboŋgo. Ɗəf an də əsəna, wasɓan gbogboŋ nani.

⁶ Də əsən gabba ədawgən wən kədadawgən wəgay noko: əska wəla aza diyɗa net məzusəɓaŋ adawsani.

⁷ Aza dərwa na, maɗɗula na tay hã disiŋ; a təki nawtokon wən kan na, awɓap əhã' man ɓa.

⁸ Minə əɗɗa mbərayəni, dawyanən na daya nawraygən təkiya.

⁹ Əɗɗum na dərwa pak mambrayi. Məza wil aran ɓa awsan lew aret ɗiy ɓa.

¹⁰ An mokrok amtək pay na tatwãh na, asna mokrok tay ta'sa lahəŋ van ɓa.

¹¹ Akõhgit ɗiy en adawkaŋ kawbeyti, atak met en məzəddoŋ troktrok a ma masalam.

¹² Wakənah yas na: «Ha'aw sa, nəsən akaw ɓa'ə!» Ya məkoson mekret ɗiy tay ɓa sa? Nan asənək gabbani; ndən dədawluko, nan asənka, wapsən nawãy pak va aza wəza nani!

¹³ Azəm amama wətuwa, neki yi; seɓe na amama taka wasan suk gənɗət a boroko.

¹⁴ Asən na vaski maɗɗula adawsan vi gəɓa zuko. An kərəhəka, asna əzaɓ nok tayi, zəga nawrəh an kədawga aggbi' na ɓa.

¹⁵ Iskəŋ məsdaraw kədawsor a ma gəla na ɗəf an təstəs ɓa. Kədawraygən sən təki naffet nan ɓa.

¹⁶ Vi ɗəf təstəs waskot təl buhul, wasili, ya net məsdarawɗe ətaŋmgbãyaŋ na aza tatwãhã.

¹⁷ Kədanneken zuk sən əzbər na məzuzel nok ɓa; kədawpeɓɗek vi tələn azlzlaɓ ɓa,

¹⁸ Vi Yawe adawlan kawsan mbərayən ama haran ndən kakkpagan ədagədəv nan səkan ɓa.

¹⁹ Kədawdagədəv aket ɗiy mbəreyit ɓa, kədaɗɗa kotorok net ɓa.

²⁰ Vi tay an məs mambray adawrəh abe ɓa, lalam na məsdaraw wamtə.

²¹ Wətuwa, ageslne' sən Yawe gəm sən məlyã. Kədawsap dit məs awziweŋ aka əpel net ɓa ɓa!

²² Vi tatwãh girzik adazzan aketi. Ya nawã dəsən əza net sulegitis di?

Əsəɓ maɓɓan səmet ɗiy məsmaɗɗulet əmpa

²³ Aŋ pak səmet ɗiy məsmaɗɗula yi. Tay lew ula aza ɗəf tagay kawtawwən akan ɓa.

²⁴ Ɗəf dənah sən məsdaraw na: «bartata kənani» na ɗiy wəranəni, mammba dələv pak wadəgədəv akani.

²⁵ Ɗiy en dəzga'aŋ sənən na, ənnek tay viti, əzaɓ də zəzay wapurkoŋ aketi.

²⁶ Ɗəf məzuzlan təstəs tay va əfyokon ɗəf aza mani.

²⁷ Azaɓan wəza nok an nappaka tagay, atəŋ a guli noko, səbbərən na wakəɓap ərka gəla nok kana.

²⁸ Kədassok məziwe na wən ɗar narma meggok ɓa, mok aka əmbəɗeɗ ɗiy də mok sa?

²⁹ Kədawnəh na: «Va agəɗ suwa, vas nədawgəɗ səni ɓa;» wanəmndagan sən nawãydi pak aza wəza nani.

Va mətampəl asani

³⁰ Nətoŋguk dəma guli na mətampəla, dəza guli na megezlembirke na ɗəf məzakiyən ɓa.

³¹ Nərəh na, pak gedirgeɗiŋ kaka'ə, degirgeɗ asərnəkənək pak, məbzluni mambara mərket dit gərmeŋge.

³² Naw nəziyək harawa, nəɗɗumko, nərahək əyaka.

³³ Nəleŋ siɗikke, nəvu' siɗikke, nəmmaɗan zu siɗikke, vok kan slakatgən kawvoŋgo,

³⁴ ya sahã nok tay əbbala, əzəmsãhã tam va məzəlpa.