Wənməkkpaŋga 23 - Bible en Guidar

¹ An kəsokuk əzəm way sap də ɗəf metiŋ na, agəɗ maɗɗula moggon sən an dəsan aboko.

² Aɗi slohõ ama wəloko, an məsmamayã kənani!

³ Kədawsim way nan van ɓa! Vi way məmbəɗan ɗəfi yi!

⁴ Kədawyan zuk əkkal arya ɓa, appan əɗɗum akani.

⁵ Vi kədawsilgin kiyuk ulan na, tay ɓa. Vi awgilgin perslekeni, ndən əveŋ a disiŋ va gazla.

⁶ Kədawzəm way na ɗəf məs haran ɓa, kədawsim teɓ nan moggetiŋ ɓa;

⁷ vi tay va an aynan a makrani. Wanah suk na: «Azəmə, asə», ya makran tay azok ɓa!

⁸ Məs kəzəm vani, wakəpara; vasna kəraygənək əpel nawɗi kiyən nak ɗarə.

⁹ Kədawpel sən dərwa ammba sləman ɓa, vi wazelen əpel noko.

¹⁰ Kədaddergit meŋge məzvet ɓa, kədarsla guli net mitiweɗ ɓa.

¹¹ Vi məkə net gboŋgboŋgi, ndəni dədawpel aka wən net akoko!

¹² Aɗi mokrok aka əyaka, sləmok tam dəza əpel nawsən zəga.

¹³ Kədawɓoŋ dazga' sən muzliya ɓa! Vi kəpək də azlawar na wamtə sən ɓa.

¹⁴ Nok də azlawar kədawpəkən, ya wakəkõhgən zeŋgilen sə təki net ɗiy mimtiti.

Əsəɓ na afən wiyən sən wətəni

¹⁵ Wətuwa, an maɗɗulok tay, naw pak makraw wanneki.

¹⁶ Megenegenew pak wakaɓ pay mok adawgilgin əpel an təstəsə.

¹⁷ Kədawsok də kotorok net ɗiy mbəreyit a mokrok ɓa, asɓət pay pak dərəŋ də geslne na Yawe.

¹⁸ Vi Gesiŋ, wən tay abe, vasna zəga nawga nok azə na ɓa.

¹⁹ Ya nok na wətuwa, aprəmə, asok məsmaɗɗula; adawgən mokrok aka tive.

²⁰ Kədawsok aret mətemeŋ də mbazla may məzəvəreŋɗe ɓa.

²¹ Vi mətem də mbazla may məsgolvoŋ wakkpaŋgan zən məssãhã; mətapəl tamə, kesekese adawgulo!

²² Aprəm ma afuko, ndəni dəwuko; kədawzelet mok vi təgal ɓa.

²³ Albah gesiŋ, kədawvəl maɗɗula ɓa, əyak ɓa gəm əsən ɓa.

²⁴ Afən ɗəf an təstəs na, əpeɓɗek adawpeɓɗeke; ɗəf dəwə məsmaɗɗula na, zən wanneki.

²⁵ Kəta may afuk dət mok dənnekenən ziti, akən təwuk egge təpeɓɗeki.

²⁶ Wətuwa, aprəmu də mokrok taka, ədaw naw dəgəm horoko.

²⁷ Vi məpolkoyok vov kpukpumtə, guluk na guw vov net iŋkile feŋge fətəkfətəktə.

²⁸ Nat van pak va məvoŋtive tədaw soro; ndət əwan ɗarɗar a weleŋgit zeli.

Va məs mbazla abay adarba

²⁹ Aka naway adawnahaŋ na: «Əraya!» Nawãy dədaɗɗa «E'eh» di? Nawãy dədawgay ɗarɗar di? Naway dədawɓuh man di? Nawãy də vaŋvi azan ɗarɗar di? Nawãy məs haran adawla turum-turum di?

³⁰ Ɗiy mənziyaŋ a gəla mbazlaŋgə, məkayaŋ gəla mbazla tatrãhəŋgə.

³¹ Kədawla aza pepreŋ na mbazla ɓa, may va adawpilmis addəvət huloŋku, may va adawtoŋ laɗaɗa awla ɗəf ɓa.

³² Sə dərɓagan na, wahoruk va dohõ, wabuluk va barway.

³³ Horok wawəl zəgeɗ məs kəwəl ɗah ɓa, maɗɗulok waki suk əpel ɗarɗarə.

³⁴ Wakəsok va ɗəf məvoŋgən addak pehe, dəvoŋ aza gabba bəlay.

³⁵ Wakənah na: «Mərguwi ya dəssaw ɓa! Məkapwi ya nəttəman azaw ɓa! Dewɗe nədafɗah kpak di? Maw akan əmpa!»