Wənməkkpaŋga 21 - Bible en Guidar

¹ Makra məlĩ tay va lolohõ a dagrakay va Yawe, tay ədawgən dəka an dədannek zən pakə.

² Tive na ɗəf pak sarray arani, ya Yawe dədawsla mekret ɗiyi.

³ Əɗɗa an də tiven gəm təstəs Yawe aŋgəl day ki əzaɓ-Maŋgəlva.

⁴ Ula nawkaɓa, makra na kiɓəɓəla, ndəni lalam net məsdarawɗe, as pak mambrayi.

⁵ An ɗəf məsok zən əɗɗa zəga aynə naɗɗa pak, dəka zəga nawrəh adaddani; ɗəf məgəɗ kakara na, zəga nan wakkpapə.

⁶ Arya mərəhən də uwawən na, səmyã yi ɗar azet məkayaŋ əmta!

⁷ Mama net məsdarawɗe dədawzeti, vi tay əɓoŋgoŋ daɗɗa təstəsə.

⁸ Ədaw na məbaygəbay slokor-slokori; zəga naɗɗa na ɗəf moggon na sarara.

⁹ Ɗəɗah əvoŋ aka metteɓ ma gəla məggbo'o, ki əsap gəla dət guluk məŋgəl əgaya.

¹⁰ Zlem zə məsdaraw pak mambray adaŋgla, awla ɗəf sãh aran ɓa.

¹¹ An məzga' səni məzuguzlo na, mətiɓiɓ wakkpaŋ məsmaɗɗula. An mərbəsəni zəga sən məsmaɗɗula, ndən ərəh əsəna.

¹² Ɗəf an təstəs haran ɗəhərra adawsan aka gəla net məsdarawɗe, vi kawsleŋget addəv tatwãhã.

¹³ Ɗəf dəsuk sləman sən əhəm na məssãhã na, nan pak waŋgəsl vaŋvəla ya kawzlan səni ɓa.

¹⁴ Zəga na makaryam məɗɗan mahaɗama affeten ədagədəva; an əvəl atoŋguk a taɓak na, awɓətgit herɗe.

¹⁵ Əɗɗa an dəslə na, ənneki yi aza ɗəf an təstəsə; ya azet məɗɗaŋ mambray na, zəga nawgeslne' sən diyɗa yi.

¹⁶ Ɗəf dəzə səka tive na moggon pak, wal əffet addəv əkkal net ɗiy na guzluyo.

¹⁷ Ɗəf dəɗi kiyən aka ənnek na, watoŋ addəv sãhã; məŋgəl mbazla may zəga də mel na, agəɗ na arya ɓa.

¹⁸ Məsdaraw na zəga nawbit ɗəf təstəsi yi; an nawrih məs mekret bar tamə, aket məzəmaŋ kiya.

¹⁹ Ɗəɗah əssa də gəla a kapta-muyã, ki ərəh guluk məŋgəl əgaya, mədan gədəv ɗəfa.

²⁰ Zəga na sləma gəm mẽl tahəŋ ana məsmaɗɗula da; ya dərwa na, nan əzeti!

²¹ Mədaw təstəs də əɗɗa moggon na, warah zeŋgile, əssa təstəsə gəm gagdaka.

²² Məsmaɗɗula watoŋ a walaŋgəla net məskaŋwəla, watərayan gbogboŋ an walaŋgəla van aɗi kiyən akani.

²³ Ɗəf dətaɗ man gəm hərzlumən tay əga kiyən səza tatwãhã.

²⁴ Ɗəf məza wil aran ɓa məɗikizəni, iya nan məzuguzlo. Əɗɗa zəga nan na məza wil aran ɓa dərwadərwa.

²⁵ Əsim zəga an dəsan a makra mətampəl dədawbayən, adan van dəŋger əɗɗa zəga ɓaŋka.

²⁶ Hurruɓ adasɓəta aka əsim zəga! Ya ɗəf an təstəs nan əvəl van viŋge.

²⁷ Əzaɓ-Maŋgəlva məsdarawɗe azaɓaŋ pak daryawi yi, səsak an akiyənək də əɗɗum mbərayən.

²⁸ Məziwe net tepelkeɗ wamtə; ɗəf dəsən əpak sləman na, pay pak wapeli.

²⁹ Məsdaraw haran ɓəl adawsani ya na ɗəf an təstəs na, gabba ədaw nan adaɓɓəlani.

³⁰ Maɗɗula tay ɓa, əwelen wən tay ɓa, may əsəɓ tay aba Yawe ɓa.

³¹ Kakyaki pələs pay nalpa; ya əska wəla na, ava Yawe yi.