Wənməkkpaŋga 20 - Bible en Guidar

¹ Mbazla akkpaŋgan ɗəf məmas aka ɗəfa, mbazla tatrah tam məklopo; dəppan zən sit pak asan na məsmaɗɗula ɓa.

² Va əhəm na ɓoolu, vaski ədagədəv na məlyã; dədansən gədəvən na, mbərayən adaɗɗa aka zən tusso.

³ Zəga na sləma yi aza ɗəf məs dəsan faraɗa səza əgaya, ya dərwa na, nan appay man ɓa.

⁴ Dabya na, mətampəl anse ɓa; ya mawala na, wassõhu ya tay adawrəh ɓa.

⁵ Əɗɗum a makra ɗəf na, tay va iŋkile kpukpumɗe; ɗəf an dəsən əwelen wən na, wambaɗə.

⁶ Ɗiy tahəŋ diyɗa məzulanən zit va ɗiy məɗɗaŋ moggoni; ya ɗəf an moggon kpak na nawãy nawrəh di.

⁷ Ɗəf an təstəs na, tive an təstəs adazba; kirtin wassoŋ zay dərɓagani!

⁸ An məlĩ asanək aka mazaŋga nawtaw wən na, wasən mbərayən də harani.

⁹ Nawãy nawnəh na, nəbburuk makrawa, mambray naw askoɓko di?

¹⁰ Mətəma temtem sula nawsla gagdak na zəga gəm marga temtem sula nawsla zəga; sules pak daryawi ara Yawe.

¹¹ Gawla zlaŋ arban zən də zəga naɗɗa nani: an moggoni awaniɓa an təstəsə yi.

¹² Sləma ɗəf məzəprəma; hara ɗəf məzula: Yawe diɗɗe sulegit pakə.

¹³ Kədaŋgla sin ɓa, vi kədawtoŋ addəv sãhã; akol horoko wakəbə waya.

¹⁴ Məlbah zəga dawnəh na: «moggoni ɓa, moggoni ɓa!» Ya daddan na zən neki.

¹⁵ Meleŋge gəm everzleɗ na sləma tahəŋ diyɗa; ya zəga an na sləma day na, ndəni hərzlum dəf an də əsəna.

¹⁶ Ataf lukut nani vi aɗiyək kiyən ka məziwe na dəmən na molhõyõ; ataf zəga səvan taf bas, vi akə wən ammbat molhõyõkə.

¹⁷ Way na zəga mərəhən də vurum əttəm nek ama ɗəfa; ya səɓɓan na baran waknah də hoyoŋko!

¹⁸ Inan zəga naɗɗa na, də əzga meŋ akan adawziw moggoni. An kalpa na, azgə meŋ akan lewlewi.

¹⁹ Məppasan wən na, məndə gebbet ɗiyi; kədawsok də ɗəf məmbəɗan ɗəf ɓa.

²⁰ Dəzelen afən dət man na, lalam nan wamtə ara guzliyo.

²¹ Arya məkkalan də kakara də ətəŋ nan na, asan na də əzaɓ akan aza əbayman ɓa.

²² Kədawnəh na: «wanəmndagan mambraya ɓa!» Appan mokrok sən Yawe, wakõhguko.

²³ Mətəma temtem sula nawsla gagdak na zəga daryawəŋ ama hara Yawe, zəgeɗ nawslagagdak na zəga də vurum moggoni ɓa.

²⁴ Yawe dədawdawgən təl dəfa, vasna mbarmbar ɗəf adawsən tive nan di?

²⁵ Bizwili aza ɗəfa, an tay əpel də man ɗar na: «As zəga salala yi əŋka!» Məstakayi də əɗɗum dərɓaga iynama aba Yawe.

²⁶ Məlĩ məsmaɗɗulan na, watəreyet ɗiy mbəreyti, wadawgən təl mawta dəketi.

²⁷ Zeŋgile ɗəf na, lalam na Yawe məs dəsən kpukpum na zlem zə ɗəfi yi.

²⁸ Əɗɗa moggoni gəm əzban təstəs dədawga məlyã; tay əpa' mazaŋga na məlĩ nan də əɗɗa moggoni.

²⁹ Gbogboŋ net gewleɗi, ndəni gagdak neti; magalagala, ndəni zəga na gawla net mezzeɗi.

³⁰ Ərga hã də vaŋviya, mihã nawzan darawi, vaski də ərga tam nanzaɗ zlem zə ɗəfa.