Wənməkkpaŋga 2 - Bible en Guidar

Maɗula awga dəf səza mambraya

¹ Wətuwa, an kətafək əpel nawa, gəm kərmak an nəɗi suk naɗɗa temtem avoko,

² ka sləmok dəpakgən ammba əsəna, asna wakəɗi mokrok aka əwelen wəna.

³ Sessel, an kiyak əsəna, kəslanək wəlok ammba əwelen wəna.

⁴ An kəkayanək va əkayan təbəz net koɓeɗi, va kədawkayan arya məɗamni,

⁵ asna wakəsən gabba geslne na Yawe, wakərah əsən aka Maŋgəlva.

⁶ Vi Yawe dədapsa maɗɗula, səmani əsəna də əwelen wən adawgulyoŋ.

⁷ Ɗiy en təstəs na, tay əpsit əsən aka an naɗɗa. Tay va baray sit ɗiy en mekret barə.

⁸ Tay ətaɗ tiveɗ na ənziya təstəsə, waga tive net məzəzbanəni.

⁹ Asna, wakəsən an dəslə, an gesiŋ, an moggoni gəm tive naɗɗa wəza moggon pakə.

¹⁰ Vi maɗɗula wade akoko, əsən wasan azok neki,

¹¹ əɗɗumon wən wataɗko, əwelen wən wakõhguko.

¹² Vi kawkõhguk səka tive mbərayən, gəm səza ɗəf məpel əpel mbərayən,

¹³ may səvet en məzəppetin tiveɗ na moggon vi kadda dəket tiveɗ na guzluyo,

¹⁴ məs zit nek dəɗɗa mambraya, zit babyak-babyak də kuket na mambraya:

¹⁵ məs ədaw net məslokoroni, tiveɗ net mədoɗti.

¹⁶ Gəm vi kawkõhguk səvat məpolkoyoku, ɗak məs məsənti ɓa, məlluɓon ɗəf də əpel nata,

¹⁷ məs təppan zələt mədaha nata, təzgət ki wənmiyna na Maŋgəlva nata.

¹⁸ Vi gəla nat dəka əmta aɓe'i, tiveɗ nat kəlanet məsvevɗe da adaddoŋgu.

¹⁹ En dəddoŋ anadda pak amulyoŋ na ɓa, almaŋ na aza tive na zeŋgile ɓa.

²⁰ Vini kan na, kədawgən aka tive net ɗiy en moggeti, tiveɗ net ɗiy en təstəs kədazba.

²¹ Vi ɗiy en mekret bar dədassoŋ aka dəlva, en təstəs-gərak dədambraŋ akani.

²² Məsdarawɗe na, kawzeti səka dəlva, məzəmaŋ ki ɗəf pak kawndolti səkani.