Wənməkkpaŋga 19 - Bible en Guidar

¹ Məssãhã mədaw addəv təstəs nan adayək ki ɗəf məpel slokorslokor dərwa ɗarəŋka.

² An əsən tay ɓa na, asan na nek ɓa. Ɗəf dəgəm tələn də kakara na, wazə ki tive.

³ Ətem na ɗəf waraygən ənziya nani, asna ndən əke herɗe aka Yawe.

⁴ Arya anzlərgən əŋɗa na bayna; ya məssãhã nan wawɗak də baynani.

⁵ Ɗəf asan na məziwe net tepelkeɗ məza ərəh wən ɓa ɓa. Məstepelke akõh na ɓa.

⁶ Diyɗa dədawgagdakanən ɗəf an tektek vi kawmbəɗani. Nawaydi pak aŋgələk əsan bayna də məzuvəla.

⁷ Milmiŋgiɗ məssãhã pak əzelnəni, beyneŋgiɗin dayday əzaraŋ səzani. Wayə əpele, ya arah na səmmbet ɓa.

⁸ Ɗəf dəkay maɗɗula na, aŋgluwək kizəni; dəzgə sləma aka əsən na, wanan neki.

⁹ Ɗəf awsan məziwe net tepelkeɗ məza ərəh wən ɓa ɓa; məstepelke wazə.

¹⁰ Dəslə dərwa dəsangən a təki na sləma ɓa, va balam dəslə nawsan daya aket ɗiy gugriɗ ɓa.

¹¹ Maɗɗula na ɗəf dədaffeten sən ədagədəv nani, əzgət ki mambray an məgəɗ sən adawla azan ka zəga na sləma.

¹² Ədagədəv na məlĩ agilik va əhəm na gawla ɓoolu, kinenek navan tam va minɗe aka kevile.

¹³ Uwa an dərwa na, mandarayi aza afəni. Ərma mama nat guluk tay va ima na gəla məs awsuk ɓa.

¹⁴ Gəla gəm arya afən ɗəf adappa nawzəmgəla, ya guluk məs maɗɗulat na, əvəl na Yawe tə.

¹⁵ Tampəl awki sin kpukpumɗe; ya may warma gədəv mətampəla.

¹⁶ Dəzgə sləma aka mahenziŋ na, aka kizən azgə sləma. Dəzelen tive nan na, wamtə.

¹⁷ Dəwəl sãhã aka məssãhã na, dəmən apsən Yawe, wapsən zəga navan.

¹⁸ Azga' sən wətuko, tak pay nan dətoŋ ɓa, ya kədawgul zuk gala nawbayən ɓa hara.

¹⁹ Məs herɗe nawda gədəv adaɗɗaŋ pak, warah ammba vani; an kəppanək əmpa, watəpsəni.

²⁰ Aprəm əsəɓa, ataf əzban an mərbə suko, vi abe na, kəkkpaŋgən məsmaɗɗula tamə.

²¹ Əɗɗumɗe naɗɗa zəga diyɗaŋgə a makra ɗəfa! Ya an Yawe aŋgəl dədawziwe.

²² An məŋgla aza ɗəf na, moggon nani yi; ɗəɗah məssãhã ki məwə wəna.

²³ Geslne na Yawe awka ɗəf aza zəŋgile, wavoŋ addəv əba, məza irgisl də tatwãh ɓa.

²⁴ Mətampəl waska van addəv hilĩw na waya, ya awkan a man dayday ɓa.

²⁵ An mərgay ɗəf məkuwən na, mətiɓiɓ wakkpaŋ petpeti; azga' sən ɗəf məs əsəna, warəh gabba əsən vani.

²⁶ Məs dərga afəni gəm dərɓahat man na, nan uwa an məki wil ara ɗəfi yi, məsər ma ɗəfa.

²⁷ Wətuwa, əŋga appan gabba əprəm an məyagan suk kana, an kəzgət ki əsən ɓa.

²⁸ Məziwe mbərayən na, wamas aka wən an təstəsə; met məsdarawɗe sirsir adawsan aka əɗɗa mambraya.

²⁹ Məɗi əzga' na, ammbet məmasaŋ aket ɗiyi; ərga tam sən gəɓet dərweŋge.