Wənməkkpaŋga 17 - Bible en Guidar

¹ Ɗəɗah əzəm mepteke mekeleŋ də maɗɗula, ki əzaɓ-Maŋgəlva mədan zaɗaɗa addəv gəla məzəmən də əgaya.

² Balam an petpet waday ki wiyən mərbə wili, hara zəga nawzəmgəla nan tay a walaŋ məlma.

³ Vov tay vi nawhə̃s təbəz babara, movoro vi nawhə̃s meleŋge; Yawe tam dədawsəŋgləkan mekret ɗiyi.

⁴ Məgəɗ mambray dədazga sləma aka əpel mbərayən; məwə wən dədawpak sləman ammba əpel nawraygən təkiya.

⁵ Məs dəmas aka məssãhã na, məs dəzəməɗ adawra; dənnek sən tatwãh na, kappani bartata ɓa.

⁶ Mətərkiya net mezzeɗ na, ndəni kirtit kirtini; gagdak net kirin na, ndəni efiŋgiɗti.

⁷ Əpel an aka tələn awdah aza dərwa ɓa, səsak uwa tepelke aza ɗəf metiŋ.

⁸ Zəga nawvəl dəndən tay va mihã na kinenek ara ɗəf an dəndəni; də təki akkpaŋ pak zəga ədaw ammbani.

⁹ Məɗup ki mambray na, məkayan əŋgla yi; dəmsak əpel aka heslepe van na wawɗakan bayna.

¹⁰ Əsəɓ təl taka dədawmbat sən ɗəf məzəprəm day ki ərga dərwa təl səkatə.

¹¹ Ɗəf mbərayən nan əgay adawkayan kaka'ə, ya kawsilgini maslən mətemin akani.

¹² Ɗəɗah əbəta ama zəga darawən adawyaŋ na Ursə məs mənde kirtini, ki aka dərwa daɗɗa zəga nawtem nani.

¹³ Dəmndagan moggon də mbərayən na, tatwãh azar na səza gəla nan ɓa.

¹⁴ Ətəŋ əkklop na, əkol met iŋkile yi; tak əgay adaɗɗa na, agdəh kiyko.

¹⁵ Dəɗi ɗəf məs dəraygən wən ka ɗəf təstəsə gəm dəɗi ɗəf an təstəs ka məs dəraygən wəna, sulagən pak daryawi ara Yawe.

¹⁶ Miyi ətərwəray net koɓeɗ ava dərwa di? Kalbəh maɗɗula sa, ya kiyən tay ɓa!

¹⁷ Pay pak bayna na, tay də əŋgla; məwa məlma na, vi pay na tatwãhĩ.

¹⁸ Ɗəf dəsan məziwe aka dəmən na ɗəf də meggen na, kiyən tay ɓa.

¹⁹ Dəŋgəl əkay mama, məŋgəl mbərayəni yi; dəɓaygən kiyən na, əray adawkayani.

²⁰ Dəzlzlaɓan makran na, arah na əssa nek ɓa; məzlzlaɓan əpel nan wabət addəv tatwãhã.

²¹ Dəwə dərwa na, wasan də əɗɗumo; afən ɗəf mətemin annek na ɓa.

²² Makra an də ənneke mihã moggoni; maɗɗula an də əɗɗum awbay met sleŋsleŋɗe.

²³ Ɗəf mbərayən dədawtaf zəga na makaryam mahaɗama, vi kamzlahgən wən səka təstəsə.

²⁴ Maɗɗula arba aka hara ɗəf an də əsəna, ya hara dərwa nan mammba dələv adawla.

²⁵ Uwa dərwa awdan gədəv afəni, assan makrat ɗak akən təwa.

²⁶ Əfaɗgən ɗəf an təstəs na tay moggon ɓa; ərge ɗiy gugriɗ na, təsi ɓa.

²⁷ Ɗəf dərma man aza əpel na, tay də əsən diyɗa; ɗəf məɓatɓatə, məsən əwelen wəni.

²⁸ Ɗəf mətemin zlaŋ an tay ɓatɓat na, kawɗini ka məsmaɗɗula, an amsanək mani, kawɗini ka məs əsən akan.