Wənməkkpaŋga 16 - Bible en Guidar

Daya addəv ənziya pay pakə

¹ Ɗəf waynan a makran naɗɗa zəga, əɗɗa nan a ma Yawe yi.

² Tive na ɗəf pak lewi arani, ya Yawe dədawsla mekret ɗiyi.

³ Arbet wəzeɗe nok aba Yawe, asna an məs kiynə naɗɗa wagəɗə.

⁴ Yawe aɗɗak zəga pak də ətərwəray nani, gəm məsdaraw sən pay na tatwãhã.

⁵ Məɗi kizən pak daryawi ara Yawe, dəɗi akan ta' na, kappani bartata ɓa.

⁶ Də moggoni gəm də gegesiŋ ki mambray adazzəɗa; də geslne na Yawe ɗəf adamzlah sən mambraya.

⁷ An Yawe annekik də ənziya na ɗəfa, meseŋgiɗin dayday wasleret dəndəni.

⁸ Ɗəɗah ərəh siɗikke də təstəsə, ki ərəh diyɗa məza də tiven ɓa.

⁹ Makra ɗəf dədaɗɗumon sən tive nani ya Yawe dədawga ədaw nani.

Dəwəl sit məlyeŋge

¹⁰ Əpel na Maŋgəlva tay a ma məlyã, aslokoron na ətawwən ɓa.

¹¹ Məsləgagdak na zəga də hilu nakan pak na Yawe əŋgə, ndən dədawɗi gagadak na təbəz nawslan dəndəni.

¹² Əɗɗa mbərayən daryawi ara məlyã, vi də təstəsi mazaŋga na məlĩ adawziwe.

¹³ Əpel an aka tələn dədawda zə məlyã, məpel wən təstəs adaŋgəla.

¹⁴ Herɗe na məlĩ na, maslən na əmtaŋgə! Ya ɗəf məsmaɗɗula waffeteti.

¹⁵ An kihara məlĩ apparka, adaki ənziya egge! Əsa' nan tay va slaybuwən na məndəvən.

Ənziya a walaŋgit ɗiyi gəm əssa də maɗɗula

¹⁶ Ərəh maɗɗula adayək ki meleŋge an saksak pelepele; ərəh əsən tam ɗəɗah ki təbəz babara.

¹⁷ Tive net ɗiy en təstəs amzlah sən mambraya; dəŋgəl əga kiyən na, wazgə sləma aka ədaw nani.

¹⁸ Əkaɓi yi daabəŋ ki əraya; əɓaygən zə ɗəfi yi daabəŋ ki əzbəra.

¹⁹ Ɗəɗah əɓe'gən kizə ɗəf azet məssehẽŋɗe ki uɗakan ərəh dit məɗiyən-kiziti.

²⁰ Dəzgə sləma aka əpel na, warah moggon nani. Dəppan makran sən Yawe na, ənnek nan tay.

²¹ Məsmaɗɗula adawyaŋ na məsən zəga; əpel an nenek dədaprəmgən ɗəf day.

²² Maɗɗula na, iŋkile mima na zeŋgile yi aza ɗəf an dəndən; əzga' net ɗiy mətemit na, ndəni əteme.

²³ Makra məsmaɗɗula dədappeten sən mani, ndən əkkpaŋgan əpel nan naprəma.

²⁴ Əpel nenek tay va seɓe na amama, nek a bara ɗəfa, mihã na gəɓa zə ɗəfi.

²⁵ Ɗəf wawla tive naban sarara, ya əbayman na, tive na əmta.

²⁶ May dədaɗɗa ka məgəɗ wəza dəgəɗgən wəza, gədəvən dədawslaŋgan adaka.

²⁷ Ɗəf mbərayən nan tatwãh adahẽwẽ; man va offo məzuzla gidigidi.

²⁸ Ɗəf məsdaraw nan isilgin əgaya; məwə wən tam uɗakan bayna.

²⁹ Məŋgəl əgay na, nan əmbəɗan galani, vi dəlgən aka tive məs tay moggon ɓa.

³⁰ Ɗəf dəɗup haran na, kaɗɗum mambray yi; dəŋgba' man na, abayək ki mambraya.

³¹ Muhur babar na, mətərkiya na sləmayi, kawrəhni də əɗɗa təstəsə.

³² Məs makran zay moggon day ki gərom; məgəkiyən adayək ki ɗəf dəzəm walaŋgəla-metiŋ.

³³ Ɗəf wagəɗ vẽpəlwa, ya əzlan nan pak sə ma Yawe yi.