Wənməkkpaŋga 15 - Bible en Guidar

¹ Əzlan an də nenek affeten ədagədəva, əpel nassa awsilgin ədagədəva.

² Hərzlumit ɗiy məsmaɗɗula akkpaŋgan əsən neki; met dərweŋge tay əgilgən əpel na dərwa.

³ A təki pak hara Yawe tay əsəŋglet ɗiy mbəreyit dit moggeti.

⁴ Əpel an nek na, wəlaŋga na zeŋgile yi! Əpel net tepelkeɗ awraygən əɗɗumo.

⁵ Dərwa dədawzelen əzga' na afəni; ɗəf an dətaf əzga' na, petpeti yi.

⁶ Gəla na ɗəf an təstəs də arya adawsan addəvən diyɗa; ya ərəh na məsdaraw na, awkisən tatwãhã.

⁷ Ma ɗəf an təstəs na, əsən adawpele, ya mekret dərweŋge nan tay vas ɓa.

⁸ Əzaɓ-Maŋgəlva net məsdarawɗe daryawi ara Yawe, əkkam net ɗiy en təstəs na, neki azani.

⁹ Ədaw net məsdarawɗe daryawi ara Yawe, məzbaŋ əɗɗa təstəs adaŋgla.

¹⁰ Əzga' məza ulasahã ɓa tay vi ɗəf an dəmzlah ki tive; dəzelen əsəɓ na, wamtə.

¹¹ Təki nanziya net ɗiy mimtiti də təki nawza kaɗay pak aba Yawe ŋgə, ya mbəksa makra ɗəf titir sa?

¹² Məzəguzlo aŋglu ɗəf məzusəɓsən ɓa, addan azet ɗiy məsmaɗɗulet ɓa.

¹³ Makra an də ənneke akkpaŋgan kihara ɗəf lewi; ya addəv əzəmsahã na, makra ɗəf zam adamta.

¹⁴ Makra an də əsən məzukayan əsəna; ya met dərweŋge nan əzəm dərwa.

¹⁵ Pay digil pak mbərayni aza məssahã, ya aza məs makran moggon na, waynabaya yi pay pakə.

¹⁶ Ɗəɗah siɗikke addəv geslne na Yawe ki arya diyɗa də gəgrəŋ addəvən.

¹⁷ Dəɗah təki net teɓ gaslamba məs əŋgla asan adak, ki təki na slu na wasli məkərən də əzel addəvən.

¹⁸ Maŋrazla awsilgin əgaya; makra zəzay affeten əgaya.

¹⁹ Tive na mətapəl tay va mambara net gedirgeɗi; ya tive net ɗiy en təstəs na məzaɓani yi.

²⁰ Wiyən an məsmaɗɗula anneken zə afəni; dərway məzuzelet mani.

²¹ Dərwa, ənnek na ɗəf məza kiyən tay ɓa yi; ya ɗəf məwelen wən na, tive nan sarra addadani.

²² Əɗɗum naɗɗa zəga warayə an əzga meŋ akan tay ɓa, an məzusəɓaŋ tahəŋ diyɗa na, ndən əɗɗa.

²³ Neki aza ɗəf an dəzlan aka tələn də man tusso! Əpel an dəslə də pay nan lewi sawɓa.

²⁴ Tive na zeŋgile kəla disiŋgi aza ɗəf məsmaɗɗula, vi kamzlahgən səfuŋ sə təki net ɗiy mimtiti.

²⁵ Yawe gəla net məzuguzloɗe adabzla, ndən əziwgin meŋge na təki nat gagəbaya.

²⁶ Əɗɗum mbərayən daryawi aza Yawe, ya əpel an moggoni lewi azani.

²⁷ Məŋgəl arya na vurum wattapan gəla nani, məzel zəga na makaryam wasan madarani.

²⁸ Makra an təstəs waɗɗum tagayɗa kawzlani; met məsdarawɗe nan əpor zəgeɗ mbəreyti.

²⁹ Yawe faraɗa yi səzet məsdarawɗe, ndən əprəm əkkam net ɗiy en təstəsə.

³⁰ Hara ɗəf bodoŋbodoŋ anneken makra, alabara nenek aɓɓəlan ma sleŋsleŋ.

³¹ Dəpak sləman ammba əzga' nawkõh na, waddaŋ təki aweleŋgit məsmaɗɗuleti.

³² Dəzgan əsəɓ na, kizən adawzeleni, məprəm əsəɓ na, warah maɗɗula.

³³ Gəslne sən Yawe na, ərba na maɗɗula yi; dərɓaga əɓe'gən kizə ɗəfi gagdak asan.