Wənməkkpaŋga 14 - Bible en Guidar

¹ Guluk məsmaɗɗulat tərkak gəla nata, dərwaŋgək nat təɓzluwək də vata.

² Mədaw də təstəsi məgeslne' sən Yawe; məs dəmzlah səka tive dədawzeleni.

³ Əpel sə ma məsdərwa məkaɓgən kizən na, waki sən azlawar akani; net məsmaɗɗulet na, əpel na met wage.

⁴ An wasliɗe nanse nok tahəŋ ɓa na, maha foŋlorro adawsani; gbogboŋ na wasli anzlərgən zəga nawrəha.

⁵ Məziwe an təstəs awa wən ɓa; məziwe an ɗar nan uwawəni wəza nani.

⁶ Məzukaɓ wakayan maɗɗula ya warah ɓa; aza ɗəf məs maɗɗula na, əsən tay tuwãh ɓa.

⁷ Azar səza dərwa! Əsən tay kədawrəh səddəv əpel nan ɓa.

⁸ Maɗɗula na ɗəf an petpet na, ndəni əsən gabba tive nani; vadərwa net ɗiy məza kiyit ɓa na, ndəni vurum.

⁹ Dərweŋge net əmasaŋ aka əzaɓan wən an dərayə; əsa' tay a weleŋgit ɗiy en təstəsə.

¹⁰ Makra ɗəf dədawsən tatwãh nani, ɗəf tay asap dəndən aka ənnek nan ɓa.

¹¹ Gəla net məsdarawɗe waɓəzlə, gəzlirke net ɗiy en təstəs wasan zayə.

¹² Ɗəf wawla tive naban sarara, ya aza əbayman na, tive na əmta.

¹³ Addəv əmas dayday makra ɗəf attəman tatwãhã, əgrak na ənneke ndəni əzəmsãhã.

¹⁴ Ɗəf makra mbərayən wabə də ərəh na ədaw nani, ya ɗəf moggon tamə, wabə day kiyən də ərəh na moggon nani.

¹⁵ Mətiɓiɓ wataf an məpel pakə, ya ɗəf an petpet nan wawelen təki nawɗi tələn.

¹⁶ Məsmaɗɗula məzugeslne' sən mambraya, məzəmzlah səni; dərway məzəddan kiyən foŋgo.

¹⁷ Mədəgədəv go' wagəɗ zəga na dərwa, ɗəf məɗɗum kpum wasan kiyən trãhə.

¹⁸ Mətiɓiɓɗe na, vadərwa yi haran neti, məs pepetɗe na, əsəni mətərkiya neti.

¹⁹ Ɗiy mbəreyit waɓe'eŋ sitin ɗiy moggeti, məsdarawɗe wassoŋ a maddambet ɗiy en təstəsə.

²⁰ Megge məssahã dayday tay əzeleni, ya məŋglaŋ məsarya na, aŋɗaŋ ɓa.

²¹ Ɗəf dəzel ɗəf na, agəɗək mambraya; ya an dəwəl sahã aka məssahã, əzaɓ tay viyən.

²² Minaŋ əɗɗa mambray na əza adawzaŋ ɓa sa? Ya minaŋ əɗɗa moggon na, tahəŋ də bayna gəm əziw aka gesiŋ.

²³ Addəv wəza pak zəga tay nawrəha; ya əpel ɗar na, sãhã adawki kaka'ə.

²⁴ Mətərkiya net məsmaɗɗulet na, arya neti, vadərwa net dərweŋge, ndəni zəga na dərwa vani.

²⁵ Məziwe an təstəs na, awkõhgən zeŋgilet ɗiy diyɗa; məsan sit tepelkeɗ na, awmbəɗan ɗəfa.

²⁶ Addəv geslne sən Yawe na, təki an nassa fendeŋ day yi, təki nawɗam net kirtini.

²⁷ Geslne sən Yawe na, suwer zəŋgile yi! Vi kamzləh səka bizwil na əmta.

²⁸ An ɗiy tahəŋ diyɗa aka dələv na, ndəni gagdak na məlyã, an ɗiy tahəŋ ɓa na, zev məlĩ waddakə.

²⁹ Dəf məs awgəm zən ədagədəv ɓa na, aɗɗumuk kpumu; mədəgədəv go' na, warban vadərwa.

³⁰ Makra an zayə, ndəni əmpəs na zlem zə ɗəfa; kotoroku, ndəni yoro na sleŋsleŋ.

³¹ Dəzəmgən sãhã na məssãhã na, məs dəzəməɗ adawra; dəwəl sahã aka məssahã na, kiyən adawɗiya.

³² Mambray na məsdaraw wazlba, ya ɗəf an təstəs addəv əmta nan zlaŋ tay də təki nawɗama.

³³ Maɗɗula a makra ɗəf məs əsən adawsani, ya a weleŋgit dərweŋge na warbə.

³⁴ Əssa təstəs dədawɓaygit ɗiyi, mambray zəga net wili yi azet ɗiyi.

³⁵ Əsa' na məlĩ aket gewleɗ nan en petpet adawsani; ya ədagədəv nan aka məgəɗ zəga net wil adawsani.