Wənməkkpaŋga 13 - Bible en Guidar

¹ Wiyən məs maɗɗula na, azani iyak na afən adarba, an kiɓəɓəl awtaf əsəɓ ɓa.

² Ɗəf wazəm zəga moggon səza ətərwəray na əpel na mani, əssa net ɗiy mbəreyit na, sən əgayi.

³ Ɗəf məzərma man na, zeŋgilen adawga, mə wowo na, əray tay viyən.

⁴ Mətampəl waŋgəl zəga ya arəh na ɓa; net məɗɗaŋ wəza na, əkəraŋgə.

⁵ Ɗəf an təstəs azelik əpel na tepelke; məsdaraw nan tay əŋgənəw təkiya gəm ərba wili.

⁶ Əssa təstəs awtaɗ ɗəf məgə kini; mambray awki əray aka məs mambraya.

⁷ Ɗəf mbərən əɗɗa zən va məsarya ya zəga tay avan dayday ɓa; ɗəf mbərən əɗɗa zən va məssãhã, ya arya avan diyɗa.

⁸ Zəga nawbit ɗəf na, arya nani yi; ya məssãhã na, zəga tay nawgeslne'gən ɓa.

⁹ Ɗiy en təstəs na, pitipiti adawiɗeŋgə, lalam net məsdarawɗe na wamtə.

¹⁰ Də əkaɓ na, əgay yi kaka' nawrəha. Maɗɗula aket ɗiy mətafaŋ əsəɓ adawsani.

¹¹ Fitfit na arya adayək ki səmyã ya məs dədakkalan telle na, wawan zəni.

¹² Ənziya diyɗa aka əga assan makra ɗəfa; ərəh an ɗəf aŋgələ, ndəni wəlaŋga na zeŋgile!

¹³ Məs dəzelen əsəɓ na, wafaɗ akani; məs dəzban mahenziŋ na, warah zəga na vani.

¹⁴ Ərba na məsmaɗɗula na, suwer zəŋgile yi, vi kamzləh səka bizwil na əmta.

¹⁵ Əsən moggon awki mbəlembəle'i; ya tive net məsvurumɗe na, addəɗ ɓa.

¹⁶ Ɗəf an petpet na əɗɗa zəga dəka əsən nani; ya dərwa nan əppasan ətem nani.

¹⁷ Maslən məsdaraw watoŋ addəv tatwãhã; ya maslən an makran bar na, mihã yi.

¹⁸ Sahã dit wil aka dəf an dəzelen əyaka; məs dərma əsəɓ na, warah gagdaka.

¹⁹ An ɗəf arəhək an aŋgəl na, nek adawsan azani; ya əmzləh səka mambray na, daryawi yi azet dərweŋge.

²⁰ Mədaw dit məsmaɗɗulet wasan də maɗɗula, məmbat anet ɗiy dərweŋge da na, tatwãh warəha.

²¹ Mambray ɗiy mbəreyit adazba ya kaɗɗay moggon sit ɗiy en təstəsə.

²² Ɗəf moggon na, awzaɓ arya sit dihiŋgiɗni; Arya na ɗəf mbərayən na, məzaɓani sən ɗəf an təstəsə.

²³ Guli net məssehẽŋɗe də zəga nawzəm diyɗa adawsan addəvən; ya ɗəf mbərən əmta sən tay ədaw sarara ɓa.

²⁴ Ɗəf an awgəm zleŋge aka wətən ɓa na, dəŋglu ɓa; məs dəŋglu na, wagəm zən əyagani.

²⁵ Ɗəf an təstəs na, wazəm kpe'i, ya gədivit məsdarawɗe na, warah zəga ɓa.