Wənməkkpaŋga 12 - Bible en Guidar

¹ Ɗəf dəŋgəl əyaka, əsən aŋgələ; dəzel əsəɓa, kiyən tay ɓa.

² Ɗəf məgəɗ moggon na, warah kinenek ava Yawe; ɗəf məgəɗ vurum na, watawwən akani.

³ Ɗəf aziw na ɓəlɓəl də daraw ɓa; ya suwerit ɗiy en təstəs na aɓəl na ɓa.

⁴ Guluk akən tektek na, mətərkiya na zələttə; akən məza wil arat ɓa na, yorotə addivit sleŋsleŋɗe nani.

⁵ Ɗiy en təstəs na, əɗɗum net aka an dəslə yi; net məsdarawɗe na aka vurum.

⁶ Əpel net məsdarawɗe na nawbay ɗəfi, əpel net ɗiy en təstəs awkõhgiti.

⁷ An məsdarawɗe azbəraŋgək na, kule na ɗah orok ɓa; ya gəla net ɗiy en təstəs aɓəsl na ɓa.

⁸ Kawgagdakani ɗəf ammba maɗɗula nani; ɗəf məs əɗɗum mbərayən na, wasan məzelin.

⁹ Ɗəf məzelin məs də gawla nani, adayək ki məgagdakan zən məs zəga nawzəm nan tay ɓa.

¹⁰ Ɗəf an təstəs awsən wəray na zəga məmayã nani; ya makra məsdaraw awla sahã ɓa.

¹¹ Ɗəf dədense guli nani, wabə waya; ya ɗəf məs dəzban wən ɗar na, məmbərsəni yi.

¹² Məsdaraw dədawsim bizwil net ɗiy mbəreyti; ya suwerit ɗiy en təstəs dədawki ərəha.

¹³ Addəv mambray na əpel na ma ɗəfa, bizwil mbərayən tayi; ya ɗəf an təstəs dədawkõh səma tatwãhã.

¹⁴ Ɗəf wabəh də zəga moggon səza ətərwəray na əpel na mani; warah iya na wəza na vani.

¹⁵ Ɗəf dərwa tay ulan na, zəga naɗɗa nan təstəsi yi; ya ɗəf məs dətaf əsəɓ na, məs maɗɗula yi.

¹⁶ Go' ləŋ ədagədəv na dərwa adarba; ya ɗəf dəɓəs əra na, petpeti yi.

¹⁷ Ɗəf məzupel wən an gesiŋ na, zəga təstəs adarbani; məziwe net tepelkeɗ tamə, əmbəɗan ɗəfi.

¹⁸ An ɗəf tay məpel məza əsla zən ɓa na, agilik va əbəl də masalam ya əpel net ɗiy məsmaɗɗulet mihã yi.

¹⁹ Ɗəf na gegesiŋ wasan hã faɗə; na məwəwən na ənziya gba hara ɗəf pilim taka.

²⁰ Tepelkeɗiŋgə a mekret miynaŋ wən mbərayən, ya məsəɓaŋ aka wən na zazay na, ənneki yi!

²¹ Tatwãh tay nawrəh ɗəf an təstəs ɓa; ya məsdarawɗe na, tatwãhɗe wakinən meti.

²² Ma net tepelkeɗ daryawi aza Yawe; ya məɗɗaŋ moggoni, ndən əŋgla wən neti.

²³ Ɗəf petpet məzəɗaman əsən nani; ya mekret dərweŋge tay ərban dərwa.

²⁴ Vet məɗɗaŋ wəza dədawzəm məlyã, tampəl tay vi wəza na balam.

²⁵ An əɗɗum tay a makra ɗəf na, awsirip zəni, əpel an moggon ənneken zəni.

²⁶ Ɗəf an təstəs awzaɓan tive səba galani, tive net məsdarawɗe dədawzeti.

²⁷ Mətampəl apsa slu an abay ɓa, ya moggoni aza ɗəf dəsangən məgəɗ wəza.

²⁸ Aka tive na təstəsi zeŋgile asani, tive moggon məza əmta akan ɓa yi.