Wənməkkpaŋga 11 - Bible en Guidar

¹ Məsləgagdak na zəga an də vurum na, zəga daryawi aza Yawe, məsləgagdak na zəga an təstəs na, neki azani.

² An əkaɓ adeke, asna əzel tam əzzani, ya maɗɗula na, azet ɗiy en məgəsanən ziti yi.

³ Moggon net ɗiy en təstəs dədadawgiti, ya məluvuluvu net məzəmaŋ ki ɗəf hara na, əzeti.

⁴ Arya awtər wəray pay nawdagədəv ɓa, təstəs awkõgən ɗəf səma əmta.

⁵ Təstəs na ɗəf məs təstəs-gərak dədakkpaŋgan tive nan sarara, məsdaraw addəv daraw nan adazbəra.

⁶ Təstəs net ɗiy en təstəs dədawkõhgiti, əsim zəga net məzəmaŋ ki ɗəf məzərmeti.

⁷ Də əmta na məsdarawi an aɗɗum nawrəh adawza, an adawga nawrəh də arya nak mbo'u.

⁸ Ɗəf an təstəs akõhuk səza geslne, məsdaraw pay a gəlani.

⁹ Məs dəsən Maŋgəlva ɓa pak wazan megge də əpel nani, ɗiy en təstəs na əsən wakõhgiti.

¹⁰ Walaŋgəla tay ənnek vi zəzay net ɗiy en təstəsə, an məsdarawɗe amtaŋgək na, ndən əɗi salalay.

¹¹ Walaŋgəla waɓay də əzaɓ naket ɗiy en təstəsə, met məsdarawɗe watəraygəni.

¹² Məs dəzel meggen pak kiyən tay ɓa; ɗəf məs dəsən əgohon gabba wən ɓatɓat adawsani.

¹³ Məndə gabba ɗəf məzəppasan wən məɗama, məs əɗɗum nan moggon awsərət ki əpele.

¹⁴ An mədawgit ɗiy tay ɓa, warayaŋgə, əkõh addəv diya net məsəɓsitin ɗiy adawsani.

¹⁵ Ɗəf məs dəzeŋ sən malaka na, wazəm sahã, dəɓoŋ dawzeŋ sən ɗəfa, ndəni kiyən foŋgo.

¹⁶ Guluk moggot tawrəh gagdaka, ɗiy en gboŋgboŋ tam ərəhaŋ arya.

¹⁷ Məzuvəl na, sən zən tusso adaɗɗa moggoni; məsdaraw kizən adattapani.

¹⁸ Məsdaraw na, wəza na uwawən adaɗɗa; ɗəf məgəɗ təstəsə, zəga an gesiŋgesiŋ adawrəh na hanza nani.

¹⁹ Vasna, əssa təstəs aka zeŋgile adawka ɗəfa, məzban mbərayən na, sən əmta nani.

²⁰ Məs mekret mbərayən daryawəŋ ara Yawe, ɗiy en təstəs-gərak dədawrəhaŋ mbəlembəle nani.

²¹ Tay va məsdaraw adawkõh səddəv əzga' ɓa, zəv ɗəf an təstəs na, nan wakõhu.

²² Va ndama aka məŋkən vedem, vastə guluk lalawək məza kiyət ɓa.

²³ Zəga ɗiy en təstəs adaŋglaŋ na, əssa neki yi kaka'ə, zəga nawga net məsdarawɗe na, ədagədəvi yi.

²⁴ Ɗəf aŋ nan tay əvəl diyɗa diyɗa, ya ndən əkkpaŋ məsarya day ki lahəŋka, ɗəf mbərən wakkal arya day ki an dəslə, ya ndən əkkpaŋ məssãhã.

²⁵ Məzuvəl na, nan wakərə, məs dəpsən iŋkile nawsa sən ɗəfa, nan pak kapsəni.

²⁶ Ɗəf məɗaman hay nawzəm na, ɗiy waranəni, əzaɓ tay aka ɗəf an məzuvəlni.

²⁷ Ɗəf məzban əɗɗa moggon na, mbəlembəle adawkayani, məkayan mambraya, mambray wade azani.

²⁸ Ɗəf məs dəppan kiyən sən arya nan na wazbərə, ɗiy en təstəs na, wandufoŋ va gaslamba.

²⁹ Ɗəf məs dəttapan gəla nan na, wazəm gəla aza səmyã, dərwa na, balam na ɗəf məs maɗɗulani.

³⁰ Wəza na ɗəf an təstəs na, ndəni wəlaŋga na zeŋgile, məs maɗɗulan awziwgit ɗiyi.

³¹ Ɗəf an təstəs tay ərəh zəga na van aka dəlvafuŋ, ya məsdaraw də məgəɗ mambray warəhən ammba veti!