Wənməkkpaŋga 10 - Bible en Guidar

Wənməkkpaŋgaɗe na Salomoŋ ( 10:1—29:27 ) Wənməkkpaŋgaɗe aka ənziya də maɗɗula

¹ Wənməkkpaŋgaɗe na Salomoŋ. Muzliya məs maɗɗulan annek zə afəni, muzliya dərwa awdan gədəvət mani.

² Arya mərəhən məza də tiven ɓa awtər ɓa, təstəs awkõgən ɗəf səma əmta.

³ Yawe appan ɗəf an təstəs də may ɓa, ndən əzgan wəray net məsdarawɗe.

⁴ Va məddakən awki sahã, vet ɗiy en məzuɓe'eŋ akkpeŋget məsaryeɗi.

⁵ Məkkalan zəga na mabardaw də mawala na, uwa an ketketi yi; məleŋ də mawala na, uwa məki wil ara ɗəfi yi.

⁶ Əzaɓ tay aka ki ɗəf an təstəsə, met məsdarawɗe aka mambray amsə.

⁷ Əɗɗum na ɗəf an təstəs na, nawki əzaɓi yi; sləmet məsdarawɗe na, nan waŋgənə.

⁸ Makra məsmaɗɗula awtaf mahenziŋ, məs met teɓ dərwa azan na, kawndapani.

⁹ Mədaw addəv təstəs na, kiyən foŋgo adawdawa, məs dəslokoron tive nan na, kawporni gabbani.

¹⁰ Məpel də haran awdan gədəv ɗəfa, məs ma dərwa azan na, kawndapani.

¹¹ Ma na ɗəf təstəs na, vov na zeŋgile yi, met məsdarawɗe aka mambray amsə.

¹² Əzel awsilgin wəna, əŋgla awɗaman mbərayən mawandi pakə.

¹³ Maɗɗula addəv əpel na məs əsən adawsani, zleŋge tam sən gəɓa məzakiyən ɓa.

¹⁴ Məs maɗɗuleɗ na, əsən adakkalanəni; əpel na dərwa na, əray an go'o yi.

¹⁵ Ərəh na məsarya na, tay azan va marba gbogboŋ nani; əray net ɗiy məddekti ndəni sãhã neti.

¹⁶ Wəza na ɗəf an təstəs na, ammba zeŋgile yi, ərəh na məsdaraw na, ammba mambray yi.

¹⁷ Məs dərma an məyagan sən na, aza zeŋgile adaddan, məs dəppan əzga' na, wasan slorslorə.

¹⁸ Ma na uwa tepelke yi məzuɗaman əzele, məzakiyən ɓa məzəppasan wən mbərayən.

¹⁹ Addəv əpel diyɗa na, mbərayən awbew dawsan ɓa; məs dərma man na, ndəni ɗəf məsla zəni.

²⁰ Hərzlum ɗəf an təstəs na, təbəz babar məwele yi. Makra məsdaraw na, sləman siɗikkey.

²¹ Ma ɗəf an təstəs azgəl ɗiy diyɗa, dərweŋge wamtaŋ sən kiyit tay ɓaŋka.

²² Əzaɓ na Yawe dədakkpaŋgan ɗəf məsarya, wəza na ɗəf titir tay adawsləroɓ akan ɓa.

²³ Əɗɗa zəga net wili aza ɗəf məzakiyən ɓa na va əsmay yi; maɗɗula tamə, na ɗəf məwelen wəni yi.

²⁴ An məsdaraw adawzele, ndən dədaɗɗa akani; an ɗiy en təstəs adaŋglaŋgə, anan adapsitini.

²⁵ Məshenzleɗ atoŋgoŋko, məsdaraw tay ɓa, ya ɗəf an təstəs na, gabba gəla an faɗi yi.

²⁶ Va moɗokroy aza slay ɗəfa may enene aza ara dəfa, vaski mətampəl azet ɗiy en dədawslənəni.

²⁷ Geslne sən Yawe azzeken ənziya egge ya əzva net məsdarawɗe waduduɗuku.

²⁸ Zəga nawga net ɗiy en təstəs na, ndəni ənneke; zəga nawga net məsdarawɗe wazə.

²⁹ Tive na Yawe na, təki nawɗam na ɗəf an təstəs yi, ya azet məɗɗaŋ mambray na, əzay yi.

³⁰ Ɗəf an təstəs aɓəl na sə gəlan kpẽh ɓa, məsdarawɗe assoŋ na aka dələv ɓa.

³¹ Ma ɗəf an təstəs awki maɗɗula, hərzlum ɗəf məpel tepelke na, kawtawni.

³² Ma ɗəf an təstəs anneken zə ɗəfa; met məsdarawɗe nan sit tepelkeɗi yi.