Wənməkkpaŋga 1 - Bible en Guidar

Dəwəl sən əɗi ki əsəna ( 1:1—9:18 )

¹ Wənməkkpaŋgaɗe na Salomoŋ wətən Davit məlĩ na Israyel.

An ɗerewel van azi haran akani

² Vi kawsən zəga maɗɗula gəm əyaka, may kawsən gebbet əpelɗe na əsəna.

³ Kawrəh əyak nawsən gabba zəga, an dəslə, an gesiŋ gəm an moggoni.

⁴ Vi kapsən kuket sən dərwa, sən gawla tam na, əsəna gəm əwelen wəna.

⁵ Məs maɗɗulan dəprəma, wanzlərgən əsən nani, məs əsən akan tam tive nanziya temtemi.

⁶ Vi kaprəm gabba wənməkkpaŋga də magawla, gabba əpel net məsmaɗɗuleti dit asənasənaɗe neti.

⁷ Geslne sən Yawe na, ndəni ətəŋ na ərəh əsəna, ya məza maɗɗulet ɓa na, tay əzelenən əsəna gəm iyaka.

Əzga' sit gewleɗ mbəreyti

⁸ Wətuwa, aprəm əzga' na afuko, kədawzelen iyak nat mok ɓa.

⁹ Wassoŋ va zəga na gawla na sləma aka kiyko gəm va everzleɗ awloko.

¹⁰ Wətuwa, an məɗɗaŋ mambray tay əŋglaŋ əkkənkun na, kədawtafən ɓa.

¹¹ An tay ənəhaŋ na: «Ade! Dam əvoŋ tive məzigən mbeli, məwaksəngən ɗəf aka mekeleŋ ɗar mahaɗama!

¹² Məndəkigin mederet ŋgbuɓɓo va təki net ɗiy mimtit adaɗɗa, va en adawtoŋgitin addəv vovu.

¹³ Wamərah zəgeɗ na sləma temtemi, wamikni gəleɗe nam də zəga nawrəha.

¹⁴ Wakərah haran nok a walaŋmə, an mədawrəh pak nam adawsan sapə!»

¹⁵ Wətuwa, kədaddok tive dənɗaŋ ɓa. Aɗi təluk faraɗa səket tiveɗ neti.

¹⁶ Vi tilit kafat kafati ənza aza mambraya, əgəm zit vi kawzi mbeli.

¹⁷ Mazzaɗ mənslənən keret biŋgeɗ na, ɗari yi.

¹⁸ Ya net ka kiyit adanslənnən mazzaɗə, əɗɗaŋ zəga mahaɗama ka kiyti.

¹⁹ Tive na ɗəf məŋgəl zəga nawrəh də vurum vas adawsani. Awzan ənziya egge na ɗəf məzəzbani.

Iya də əzga' na maɗɗula

²⁰ Maɗula tay əŋzla vaŋvəl aka tive, a təki nakkal pak wəlan tay əprəma.

²¹ Tay əska wəla gugoyo, tay iya ɗiyi; a maddambeɗe, a walaŋgəla pak, tay ənah əpel nan na:

²² «Hã gap dewɗe mənokum mətiɓiɓ-tiɓiɓɗe kədassoŋ sən əŋglu tiɓiɓ-tiɓiɓi, məs fərkẽɗ tam sən əssim fərkã, may dərweŋge tam sən əzelenən əsən di?

²³ Məprəm əzga' nawa! Yaŋkəŋ na, wanəprikgin əmpəs naw akokum, wanəprəman sukum əpel nawa.

²⁴ Adan nəyukumko, kəɓoŋgoŋko; nətəl sukumək vawa, ya ɗəf tay dəzlək sləma ɓa.

²⁵ Kulanən əsəɓ naw bayman va zəga ɓa, kəŋgluwən əzga' naw ɓa.

²⁶ Ya naw zlaŋ, pay na ərba wil nokum na, wanəmasə, wanəkaɓ pay geslne adawgulkum.

²⁷ Pay geslne namtəsən adazzan sukum va mandara may əzəmsahã nokum adazzan əgulkum va vẽŋvil, pay tatwãh gəddak gəm gəgrəŋ adawteheŋ akokum,

²⁸ asna, wayəwəni ya nəzlan na ɓa. Wakayawəni, ya arəhwən na ɓa.

²⁹ Vi azelenənək əsəna, dəwelin geslne sən Yawe ɓa.

³⁰ Dətafnən əsəɓ naw ɓa, azelenən əzga' naw baymanə.

³¹ Wazəmən zəga nawrəh na ədaw neti, keketɗe net mbəreyit tusso waki meti.

³² Vi kiyɓəɓəl net mətiɓiɓ-tiɓiɓɗe wabeye, əssa fiwwe net dərweŋge wazeti.

³³ Ya ɗəf an dəprəm əpel nawa, wasan kiyən foŋgo, nzeŋge, faraɗa səza geslne na tatwahã.»