Va'Atəŋ 8 - Bible en Guidar

¹ Maŋgəlva aɗɗumuk aka Nuwe, zəgeɗ memeyẽɗ neŋgil dit en nawra naddəv bəlay azaniŋki; afu'uk səmyã aka dəlvafuŋ, iŋkile atəŋgaŋgək əsõ'õtoŋgu.

² Heret iŋkile nafuŋ asukoŋguk dit met en na disiŋ pakə. Buwən aɓərka,

³ iŋkile akkpa'aŋgək telle səka dəlvafuŋ. Də əgrak na əvoŋ səkat də kaklaw sle', təŋ səza əzza na buwən məvekeveke na, iŋkile andanənək ziti

⁴ aka təla mabuhuloni, də wəvoŋ kəlaw kiyən buhul nani, bəlay asanək aka Mossorgo metiŋ na Ararat.

⁵ Iŋkile tahəŋ əkkpa'aŋ abe abe, gap təla makəlawani; əvoŋ taka na təla makəlawan naka, dadwar kiyit mossorgoɗe arbanənək ziti.

⁶ Də əgrak na əvoŋ kaklaw poɗo, Nuwe akoluk ma təkifoŋgo apəl naza bəlay naka.

⁷ Ndən mbəgən gaŋgraka aveŋgi, ambat gəm amil təl ɓaɓayə, hã gap iŋkile akkpa'aŋ səka dəlvafuŋ.

⁸ Sissiŋ ndən mbəgət bəŋgək na maha, kawlan na, iŋkile andaŋgək səka dəlvafuŋ soko.

⁹ Bəŋgək na maha nak, tərah təki nawɗi gədəv tələt kaffet ɓa; ndət buryok kəlazan addəv bəlay, vi iŋkile tahəŋ suzliya aka dəlvafuŋ gboŋgu. Atəl van armət atoŋgət addəv bəlay azani.

¹⁰ Agak pay buhul maɓɓan əmpa, amsak appat bəŋgək na maha nak səddəv bəlay.

¹¹ Də pay moskoy na, bəŋgək na maha buryok azan də gaslamba na hereme məkdəkan amata! Vasna Nuwe asənək na, iŋkile andanənək zit səka dəlvafuŋ.

¹² Agak pay buhul maɓɓan əmpa, appat bəŋgək na maha nakə, təmsak əmilyet azan əmpa ɓa.

¹³ Aka wəzva səkat sləre də ma taka'əŋ, də wəvoŋ taka na təla maddaabəŋ, iŋkile aso'õtoŋguk səka dəlvafuŋ. Nuwe akoluk ki bəlay, awla na dəlvafuŋ aŋkəlka.

¹⁴ Aka təla masulani, də wəvoŋ nan kaklaw sula kiyən buhulu, dəlvafuŋ aŋkəlka.

¹⁵ Maŋgəlva apel sən Nuwe dawnəh na:

¹⁶ «Agil səddəv bəlay, isi, ɗak noko, gəm kirtuk dit gil neti.

¹⁷ Zəga mamayãn məs də isi, zəga də slu zəni, bəŋga, sə walaŋgit zəgeɗ memeyẽɗ gugriɗ dit vẽvẽɗe, zəgeɗ məzəɓlaŋ naka dələv pakə, agilgit də isi, duwanəngən kiyit, dənzləraŋgən kuɗiskuɗis aka dəlvafuŋ.»

¹⁸ Nuwe vit dit kirtini, ɗak nani gəm gil net kirtini.

¹⁹ Zəgeɗ memeyẽɗ gugriɗ dit vẽvẽɗe pakə, biŋgeɗi, gəm zəgeɗ məzəɓlaŋ naka dəlvafuŋ pakə, agilyoŋguk də kiyit səddəv bəlay.

²⁰ Nuwe arkək təki nawzaɓ-Maŋgəlva naɗɗa əvəl nawzla kurmbuɗuk sən Yawe. Agəmək sə weleŋgit zəgeɗ memeyẽɗ en nawzəm pakə, səret biŋgeɗ en nawzəma, aɗɗak əvəl nawzla kurmbuɗuk aka təki nawzaɓ-Maŋgəlva naka.

²¹ Yawe affokuk məŋgənən hõyu, Yawe anah a makran na: «Nəzban na əraygən dəlvafuŋ ɗah aka batam ɗəf titir əmpa ɓa. Nəsənək na, əɗɗum na makra ɗəf titir pak, aka mbərayni far səka sawãni, səni yi nəzan na ɗah zəga madaran va nəgəɗəŋ əmpa ɓa.

²² Əmpa na, va dəlvafuŋ adanziya, Pay nazlga də wəkkalan zəga, pay na səmyã də təki kakãhã, təlapaya də dabya, kapay də dəfəɗ aɓətaŋ na, ɗah ɓa.»