Va'Atəŋ 7 - Bible en Guidar

Nuwe tay ətoŋ addəv bəlay

¹ Yawe aɓsən Nuwe na: «Ade atoŋ də gəla nok pak addəv bəlay, vi is takərguk nəwəl təstəs səddəv sayit ɗiyəŋki.

² Kəndəgən sə weleŋgit zəgeɗ memeyẽɗ en salala pak mizilin də mugolun təptəp buhulu, en məs salalaŋgə ɓa tamə, mizilin də mugolun mətəpet taka, mizilin dət muguluŋguta,

³ vaski yi, biŋgeɗ na disiŋgi'e, təp mizilin də mugolun gap buhulu, mizilin də mugolun, vi zeŋvit dəsangən madaran aka dəlvafuŋ.

⁴ Vi addəv pay buhul aŋna, wanəziy buwən, kapay də dəfəɗ gap əvoŋ kaklaw poɗo, wanəzan zəga an dəsan pak faffaɗə səka dəlvafuŋ.»

⁵ Nuwe aɗɗak va Yawe aɗi sən wən nan kpekpe'i.

Iŋkile metiŋgit dəbulyumun təkiya

⁶ Wəzva na Nuwe agəɗək, səkat sləre, pay buwən məvekeveke agəɗ aka dəlvafuŋ.

⁷ Nuwe pay toŋ addəv bəlay dit kirtini, goni, gil net kirtin vi buwən məvekeveke.

⁸ Zəgeɗ memeyẽɗ nawzəma dit en nawmə' pakə, biŋgeɗ dit zəgeɗ məzudawaŋ naka dəlvafuŋ,

⁹ təp mizilin də mugolun, mizilin də mugolun azzoŋ aza Nuwe addəv bəlay va Maŋgəlva aɗi sən wən nan sən Nuwe.

¹⁰ Pay buhul nak atoŋko, iŋkile na buwən məvekeveke abulyumənək dəlvafuŋ.

¹¹ Aka wəzva na Nuwe, səkat sləre, aka təla masulani, də wəvoŋ makəlaw kiyən buhul na təla nani, heret iŋkile nafuŋ pak aɓəhaŋka, met en na disiŋ akoluk viŋgi.

¹² Buwən aparək aka dəlvafuŋ, pay kaklaw poɗo dəfəɗ kaklaw poɗo.

¹³ Pay dəpaski, Nuwe atoŋ addəv bəlay dit kirtini, Sem, Kam gəm Yafet, gəm ga Nuwe, dit gil net kirtin hoku,

¹⁴ Ndəɗaŋ də zeŋvit zəgeɗ memeyẽɗ temtemi, wasliɗe dit gilewi məzudawaŋ aka dəlvafuŋ, vẽvẽɗe, zeŋvit biŋgeɗ na disiŋ temtemi, wãwyẽkeɗ dit zəgeɗ mukroket dəwən neti.

¹⁵ Atoŋgoŋguk addəv bəlay aza Nuwe, təp məzilin də mugolun, zeŋvit zəgeɗ mederet məs də əmpəs addivit pakə.

¹⁶ Mizilin də mugolun, zəga an də slu zən pak dədawtoŋgo. Atoŋgoŋguk va Maŋgəlva aɗi sən wən nan sən Nuwe. Yaŋ Yawe ampan maddamba akani.

¹⁷ Buwən məvekeveke, agəɗək pay kaklaw poɗo aka dəlvafuŋ. Iŋkilet asəkəkaŋka, aslanənək bəlay səka dəlvafuŋ koŋgoŋgu.

¹⁸ Iŋkile asəkəkaŋgək diyɗa aka dəlvafuŋ, bəlay tay koŋgoŋgo aketi.

¹⁹ Iŋkile asəkəkaŋgək diyɗa aka dəlvafuŋ, asərətinik mossorgoɗe məɓehit nammba təki a disiŋ pakə,

²⁰ Iŋkile asəkəkaŋka asərətinik mossorgoɗe, kpukpum net gap metir buhul aketi.

²¹ Zəgeɗ məzəɓlaŋ naka dəlvafuŋ, biŋgeɗi, zəgeɗ memeyẽɗi, zəgeɗ nawra gəm zəgeɗ mukroket məslilɓiɓ slilɓiɓ naka dəlvafuŋ, ɗəf titir nakan pak amtaŋka.

²² Məzəmpəsaŋ dəmpəs aka dəlvafuŋ pakə, zəgeɗ mederet dəwənnet pak amtaŋka.

²³ Yas azan zəga an dəsan aka dəlvafuŋ pak faffaɗə, ɗiyi, zəgeɗ memeyẽɗi, vẽvẽɗe dit biŋgeɗ na disiŋ daydayə. Azetik kakãh pakə, Nuwe dit en naddəv bəlay azan dəppaŋ kaka'ə.

Nuwe tay igilyen səddəv bəlay

²⁴ Əsəkək net iŋkile anziyək aka dəlvafuŋ, pay səkat də kaklaw sle'i.