Va'Atəŋ 6 - Bible en Guidar

Nuwe dit iŋkile məs dəbulyumun təkiya ( 6:1—10:32 ) Maŋgəlva aynanək wən nagrakən dit ɗiyi

¹ Adan ɗiy atəŋgaŋ ənzləraŋ aka dəlva, awaŋgək kirin muguluŋgiti,

² yaŋ kirtin Maŋgəlva awlenin kirtit ɗiy muguluŋgit lelewɗe areti, agəmaŋgək gil məs aweleŋgi.

³ Yawe, amna: «Əmpəs naw adawsan addəv ɗəf faɗ ɓa vi gəɓa zən namtayi, wəzva nan dəsangən səkat də kaklaw sula.»

⁴ Dogomɗe tahəŋ aka dəlvafuŋ, aka pay nani, sədərɓagan na, gala pay kirtin Maŋgəlva mezeŋgleket azzoŋ azet kirtit ɗiy Məguluŋgiti, awaŋgək dənɗaŋgə. Ndəɗaŋgə badawayɗe lahəŋka, ɗiy net sləmet agilke.

⁵ Yawe awla na, mambray na ɗəf titir adayək aka dəlvafuŋ: əɗɗum na makran aka mbərayən adawbay zən pay pak kaka'ə,

⁶ Yawe man nzokiy, də wəzəməɗ ɗəf aka dəlvafuŋ. Makran assanəka,

⁷ Yawe amna: «Wanəvvuyet ɗiy nəzəməɗ aka dəlvəŋki, ɗəf titire hã gap azet zəgeɗ memeyẽɗ gugriɗe, gap azet vẽvẽɗe dit biŋgeɗ na disiŋ pakə, nəsawək maw nzok vi nəzəmiɗe.»

⁸ Nuwe arahək mbəlembəle a mahara Yawe.

Maŋgəlva armak a makran nawtəwər Nuwe

⁹ Uwa na Nuwe yaŋka: Nuwe, ɗəf təstəs-gəraki aka pay sayit ɗiy nani, məziw aka wəni, gala pay nani. Nuwe adawək də Maŋgəlva,

¹⁰ Nuwe awək kirin mezeŋgleket hoku: Sem, Kam, gəm Yafet.

¹¹ Dəlvafuŋ arayək aba Maŋgəlva, aknahək də gagay.

¹² Yaŋ Maŋgəlva awla dəlvafuŋ arayka, vi ɗəf naka dələv pak araygənək tive nani.

¹³ Maŋgəlva anah sən Nuwe na: «Naw na, nəzuwginik pay nagrak zəgeɗ pak! Vi gagay aknahək dəlvafuŋ, aka batemit ɗiyi, wanəzet pak də dəlvafuŋ.»

¹⁴ Azaɓ bəlay va akoti na wəlaŋga ɓəɓəla. Kətawangən gədəv bəlay vani. Kəkkəɗ səngən makarɓaɓay dəddəvən gəm dəka gəɓani.

¹⁵ Kəzaɓgən bəlay van zezek nan metir səkat də kaklaw sle', slosloprok nan metir kaklaw sula kiyən sle', əɓay nan metir kəlaw kiyən sle'i.

¹⁶ Kərəmgən biyna, kəɗupgən akani, weleŋgit dəsangən va ɗəf du' taka. Kəɗigən maddamba na bəlay van aka təkzləmən, sissiŋ kətawangən gədəvən nadda də disiŋ, is gəɗe' masulani, gəɗe' mohokoni.

¹⁷ Naw, in yakəŋ əɗɗa buwən məvekeveke dəzzoŋgə aka dəlvafuŋ pakə, vi kawzet zəgeɗ mederet məzəmpəsaŋ nammba dələv pakə; zəgeɗ mederet nammba dələv dəmtaŋgən kakãhə̃.

¹⁸ Waniynan wən də isi. «Kətoŋgən addəv bəlay, is dit kirtuko, ɗak noko, gəm gil net kirtuko.

¹⁹ Zəga madaran pakə, zəga məs slu zən pak, kəkiygən mizilin də muguluŋguni, dəsoŋgə mederet də is addəv bəlay!

²⁰ Zev bəŋga pakə, zev zəga mamayãn pakə, vẽvẽɗe naka dəlvafuŋ pakə, mizilin də muguluŋgun dəzzoŋgən azok ka dəsoŋgən medereti.

²¹ Is sən kiyuk akay zev zəga nawzəm nok temtem akkalan azoko, wasan sukum ka zəga nawzəma.»

²² Nuwe aɗak va Maŋgəlva aɗiy sən dekdek naɗɗa.