Va'Atəŋ 48 - Bible en Guidar

Yakob aɓohuk ma sit kirtin Yosef

¹ Dərɓeget wənɗes na, mənah səni Yosef na: «Afuk gbəgba'i yaŋka.» Agimik kirtin sula Manase də Efrayim dəndəni.

² Məprəman sən Yakob na: «Yosef wutuk yaŋ adek azoko.» Israyel asokuk zən asilik ɗew aka zəga nawvoŋ nani.

³ Yakob anah sən Yosef na: «Maŋgəlva Məzuɓappak arbanək zən azaw a Luz aka dələv na Kana'an, azaɓawəka.

⁴ Anah su na: “In yakəŋ əkkpoŋgok məzuwa Wanəwok kuɗiskuɗisi wanəkkpaŋgok ka vanday, wanəpsən dələv sən zeŋvuk dərɓogok ka nan faɗə.”»

⁵ Ya kakaŋ na: «Kirtuk sula muwə suk a Eziptə, tak nədegən azok a Eziptəŋ nawəŋgə. Efrayim də Manase wassoŋ suwən va may Ruben də Simeyon.

⁶ Kirin en kəwə dərɓeget hara na, nokuŋgə, net warahaŋ hara əzəmgəla net a gəlet milmigiɗti.

⁷ Naw pay nəde sə Paddan na, Rakel təmtə azaw aka tive addəv dələv na Kana'an faraɗay nawgap a Efrat ɓa. Nəndəkət adak a Efrat aka dələv na Bet-lehem.»

⁸ Adan Israyel awle kirtin Yosef, amna: «May nawaŋ eŋdi?»

⁹ Yosef azlan sən afən na: «Kirin məs Maŋgəlva avay aŋkəŋ.» Amna: «Azergit su go'o aŋɗa, nəɓuh sitgən ma.»

¹⁰ Hara Israyel avu'uk sən wəzva, awɓap ula ɓa. Azergit azani, Allemik a makran kərrəmə.

¹¹ Yaŋ Israyel anah sən Yosef na: «Nəɗɗum ɗah nawla horok ɓa, yaŋ Maŋgəlva arban su zeŋvuko!»

¹² Yosef agilgit sə walaŋ təl afəni, appu'u afuŋgu.

¹³ Yosef andek sulegiti, Efrayim dəka van dəzəŋ, aka zlaɓay na Israyel, Manase, dəka zlaɓay, aka dəzəŋ na Israyel. Azargitik azani.

¹⁴ Israyel atələk van dəzəŋ aɗiy aka Efrayim ndəni sawa, van zlaɓay aka Manase. Aklakanək vani, vi Manase yi Tizi.

¹⁵ Aɓuhma sən Yosef amna: «Maŋgəlva məs afiŋgiɗu, Abraham də Isak adawaŋ abani, Maŋgəlva məs dətaɗu səza məwu hã gap dəpaŋkəŋka,

¹⁶ Maslay məs dəbitu səza mambray pakə, dəzeɓet kirniŋki, viyti, kawyani iya nawa də an net afiŋgiɗu, Abraham də Isak, duwanən kiyit kuɗiskuɗis addəv dələvəŋka.»

¹⁷ Yosef dula na afən aɗiyək van dəzəŋ aka Efrayim, dənan nek ɓa. Ndən va afən kãw ərman akkpaŋgan səka ki Efrayim aka Manase.

¹⁸ Yosef aɓsən afən na: «Vaski ɓa əbba, vi aŋki yi daya. Aɗi vok dəzəŋ akani.»

¹⁹ Yaŋ afən aɓoŋgu, amna: «Nəsənka wətuwa. Nəsənka nan pak wawan ɗəf titir diyɗa, nan pak wakkpaŋ metiŋgini. Hara kan na, məlmən an sawa waday kini, zeŋvini vandayɗe.»

²⁰ Aɓuh sitik ma dəpas dawnəh na: «Də iya nokum iyi, Israyel adawɓuh ma də wənah na: Maŋgəlva dəɗiyuk va Efrayim gəm va Manase!» Vaski Yakob aɗi Efrayim daabəŋ ki Manase.

²¹ Israyel aɓsən Yosef na: «Yaŋ na, naw wanəmtə, Maŋgəlva wasan də mənokum, wamndogokum aka dələv net afiŋgiɗkum.

²² Naw, in tat əpsuk Sikem, haran an dəday ki an net milmiŋgiɗko, məs nəmõh səvet mə Amorɗe də masalam gəm bəle nawa.»