Va'Atəŋ 47 - Bible en Guidar1 Yosef adek ənah sən Farawən na: «Afuwa, milmiŋgiɗuwa, gilew net dit wasliɗe gəm zəgeɗ net pak azzoŋguk səka dələv na Kana'an, yeŋ aka dələv na Gosen.» 2 Yaŋ agəm sə weleŋgit milmiŋgiɗin nek sle'i, ake ərbet sən Farawən. 3 Yaŋ Farawən anah sit milmiŋgiɗin Yosef na: «Wəza nokum miy di?» Azlan sənən na: «Belemɗe nok məzuteɗeŋɗe net gilewəŋgə, va net migilmə.» 4 Aɓsənən Farawən na: «Mide na, kawsam aka dələv aŋki, vi təki nawtaɗ net timeŋgiɗ net belemɗe nok tay ɓa, vi may adayək aka dələv na Kana'anə'e, kamə kakaŋ na, belemɗe nok dəssoŋ də gəla aka dələv na Gosen.» 5 Farawən aɓsən Yosef na: «Afuk dit milmiŋgiɗuk azzoŋguk azoko. 6 Dələv na Eziptə yaŋ pak aboko, eziy may afuk dit milmiŋgiɗuk a təki an moggoni. Dəssoŋ aka va na Gosen vani. An kəsənək ɗiy məs maɗɗula səreti, asna kəpsitgən gazlaŋ nawa.» 7 Yosef akiyək Yakob afən aziwgən aba Farawən. Yakob aɓuh sənək ma sən Farawən, 8 Farawən anah sən Yakob na: «Wəzva nok gbaŋgbari di?» 9 Yakob azlan sən Farawən na: «Wəzva naw nəsaw balbal molhõyõ na, səkat də kaklaw hoku yi! Wəzva naw duɗukkoy də tatwãh diyɗa, dəgap va net afiŋgiɗu anziyaŋ addəv molhõyõ net ɓa.» 10 Yaŋ Yakob aɓuhma sən Farawən, yas agil səza Farawən. 11 Yosef aɗiyək afən dit milmiŋgiɗin dəssoŋgən də gəla, apsitik təki ka net a Eziptə, təki moggon na dələv aka va na Ramses, va Farawən anahə. 12 Yosef azaɓanək zəga nawzəm na afəni, net milmiŋgiɗin, na gəla na afəni, aza əŋɗa net kirin en dədawzəmaŋgə. Pepet na Yosef gala maya 13 May tay vakvak dələv gboŋgu, vi zəga nawzəm tay ɓa. Dələv na Eziptə də an na Kana'an tahəŋ londor sən maya. 14 Yosef andek koɓeɗ naka dələv na Eziptə də en na Kana'an də wəvəl sit zoŋgoro, Yosef atoŋgitik koɓeɗ addəv gəla na Farawən. 15 Koɓeɗ aɗamaŋgək səka dələv na Eziptə gəm na Kana'an. Mə Eziptiɗ dəwənnet azzoŋ ərəhnən Yosef, aɓɗaŋ na: «Apsəm zəga nawzəma. Vi miy mədamta abok vi koɓeɗ tahəŋ avam ɓa di?» 16 Yosef aɓsit na: «Məki zəgeɗ memeyẽɗ nokumu, ka zəgeɗ memeyẽɗ nokum nədapsukum an koɓeɗ tahəŋ ɓa.» 17 Akininik zəgeɗ memeyẽɗ net sən Yosef, Yosef apsitik zəga nawzəm ka pilseŋge, ka gilewi, timeŋgiɗ dit wasliɗe gəm ka korɗe. Ka zəgeɗ memeyẽɗ net apsit zəga nawzəm aka əzva nani. 18 Wəzvas agrakka, azzoŋguk azan wəzva masula'ən aɓsənən na: «Məɗaman sən daya nam ɓa, koɓeɗ agrakaŋka, gazlaŋɗe net zəgeɗ memeyẽɗ namə na daya naməŋgə. Dəmbər aba daya nam kakaŋ na, wəlaŋ zəmə də dəlvafuŋ namə. 19 Vimi mədamta a mahorok di? Albəhəm də dələv nam də zəga nawzəma; mənam də dəlev nam waməsam belemɗe na Farawən. Arah səm zeŋve məmbəlgən mədamta dələv dəsangən dəman ɗar ɓa.» 20 Yosef albəhək dələv na Eziptə dəwənnan pak sən Farawən, vi mə Eziptə pak avələk guli nani, vi may aləɓək azeti. Dələv ammba va Farawən iyi humsus. 21 Asilgitik ɗiy sə metteɓ ma dələv na Eziptə hã a metteɓ man mbərən a walaŋgəleɗe gugriɗe. 22 Də as pak, Yosef dəlbəh guli net məsdəlveŋge ɓa, vi wən an Farawən aɗi aka wən neti. Wəzəm net na, Farawən məzuzimgiti, vini dəvəlnən gulyeŋɗe net ɓa. 23 Yosef aɓsit ɗiy na: «Yaŋ nəlbukumuk dəpaŋ sən Farawən, mənokum də guli nokum. Zeŋve yaŋ vikum, wakəzlgenin gulyeŋɗe. 24 Zəga na mabardaw an kədakkalanənən, kəgəmaŋgən məsle'en sən Farawən, haran poɗo dədappaŋ na, dəsan sukumgən ka zeŋve net gulyeŋɗe gəm nawzəmgən kikum dit ɗiy neŋgil anokum da gəm kirtukum.» 25 Aɓɗaŋ na: «Kəkõhgənək zeŋgilemə. Daya namə, kəɗɗak moggon nok vimə waməsam belemɗe na Farawən.» 26 Yosef aɗiyək wənəs ka zəga məziwgin hã dəpaŋka, wətaf məsle'en na guli aka dələv na Eziptə sən Farawən. Adəbər ki guli net məsdəlveŋge yi kaka na Farawəni ɓa. An na makra Yakob gərakə 27 Israyel asanək də gəla aka dələv na Eziptə, aka va na Gosen, akkpaŋgək ka dələv neti, awanənək kiyit hõyo'hõyo' diyɗa adaka. 28 Yakob azəvək kəlaw kiyən buhul aka dələv na Eziptə, ənziya na Yakob egge agəɗək səkat də kaklaw poɗo kiyən buhulu. 29 Adan pay namta na Israyel agapə, ayak Yosef wətəni, aɓsən na: «An kəɗɗak moggon nok viyu na, kamə agul vok ammba mettilewa kərbangən əziwɓəlɓəl də gegesiŋ nok viwa, kədawndəku a Eziptə ɓa. 30 Wanəmtə, kəgilgugən sə Eziptə, kəndəkugən addəv magamas net efiŋgiɗwa.» Yas amna: «Naw wanəɗɗa va kənahə.» 31 Yaŋ amna: «Asway suwa.» Asway sənəka, Israyel appu' disiŋ ki zəga nawvoŋ nan tusso. |
All right reserved
Bible Society of Cameroon