Va'Atəŋ 45 - Bible en Guidar

Yosef arbanək zəni

¹ Yosef dəɓap əsok zən a maheret ɗiy dəssoŋ a maŋgavan ɓa. Amna: «Migilgit ɗiy pak sə maŋgavawa.» Ɗəf taka tay dəziw azan gala Yosef arban zən azet milmiŋgiɗniŋ ɓa.

² Ahəmək wəlan koɓo'koɓo', hã gap mə Eziptiɗ də gəla na Farawən aprəmən wəlani.

³ Yosef aɓsit milmiŋgiɗin na: «Intə Yosef. Hara əbba tay egge'e sa?» Milmiŋgiɗin dəɓap əzlan sənən ɓa, vi mekret azlahək abani.

⁴ Yosef aɓsit milmiŋgiɗin na: «Məzar azaw aŋ go'o.» Azaraŋgək azani. Amna: «Intə Yosef məlmukum məs kəvəlaŋ a Eziptə naka.»

⁵ Yaŋ na Mokrokum assokum ɓa, kədawdaŋ gədəv aka zukum vi kəvəlwən aŋ ɓa, vi kawkõhgən zeŋgilokumi Maŋgəlva aslənu daabəŋ kiykum.

⁶ Vi əzva sula yaŋ dətoŋ na may aka dəlva, apələk əzva sle' əmpa, winse asan na ɓa, wəkkal zəga na mawala asan na ɓa.

⁷ Maŋgəlva aslənu abokum na, vi kawzaɓ sukum wəzəm aka dəlvi, kawmbəlgukum. Diyɗa nokum dəkõhoŋgəni.

⁸ Ya kakaŋ na, mənokum kəslənwən aŋ ɓa, vi Maŋgəlva dəɗiyu daya net məɗɗaŋ wəza na Farawən, va daya aka gəla nan pakə, məzəm məlĩ aka dələv na Eziptə dəwənnani.

⁹ Məgəm zukum məddoŋ aza əbba, kənahaŋ sənəngən na: Yaŋ an Yosef wətuk anahə: Maŋgəlva aɗiywək ka daya naka dələv na Eziptə dəwənnani, ade azawa kədalya ɓa.

¹⁰ Kəsoŋgən də gəla aka dələv na Gosen, vasna wakəsok go'o azawa, isi, kirtuko, dihiŋgiɗko, gilewi, timeŋgiɗ dit wasliɗe gəm zəgeɗ nok pakə.

¹¹ Adak na, wanəkə suk əzəma, vi zəga adakkpap sənokda is də gəla nok gəm zəga nok dəwənnan pak ɓa, vi wəzva na may appələk sle' abe.

¹² Horokum awlak yaŋka, məlmu Benyamin awlak də harani, in sən kiyu nədawpel sukum dəvawa.

¹³ Kəboton sənəngən gagdak naw a Eziptə də an kulaŋ pak sən əbba; kulanənka məgəm zukum kəkiyəngən afu aŋka.

¹⁴ Yaŋ azlah ama wəla Benyamin məlməni, armanən zit sulegit pakə, ahəmaŋgə.

¹⁵ Allemik milmiŋgiɗin dəwənnet pak a makrani, alɓet dit sini, sissiŋ milmiŋgiɗin azgaŋ meŋ dəndəni.

Farawən ayak Yakob a Eziptə

¹⁶ Wən nan aprəmək eŋgil ana Farawən da na: «Milmiŋgiɗ Yosef azzoŋko!» Farawən dit gewleɗ nan awlanənək na lewi yi.

¹⁷ Yaŋ Farawən anah sən Yosef na: «Anah sit milmiŋgiɗuk na: “Məslet gabalɗe nokum aket korɗe məddoŋ məgap aka dələv na Kana'an.

¹⁸ Məgəm afukum, dit ɗiy nokum, mide azawa, vi nəpsukumgən nenek naka dələv na Eziptə, kəzəmnəngən səlhã naka dəlvəŋka.”

¹⁹ Noko, wən an nəɗi sukuŋ na, anah siti: məgəm mawteɗ sə Eziptə səŋ nawki kirtukum dit gil nokum, kəslanəŋgən afukum kəzoŋgəni;

²⁰ horokum adaskəla aket zəgeɗ nokum nadak ɓa, moggon naka dələv na Eziptə aŋ pak nokumi.»

²¹ Vaski mə Israyel aɗɗaŋgə. Aka wən Farawən aɗi naka, Yosef apsitik mawteɗ nek də zəga nawzəm net tive tive.

²² Ndən wəɗak wəɗak sit lukutɗe naddəɗeti, sən Benyamin na, apsənək koɓeɗ na təbəz babar səkat hoku, gəm lukutɗe naddəɗet sle'i.

²³ Ndən slən korɗe mezeŋgleket kəlaw dit zəgeɗ mogget na Eziptə aket sən afəni, gəm korɗe muguluŋgit kəlaw dəslanən haykəmari də peŋ gəm zəga nawzəm na afən tive tive.

²⁴ Appet milmiŋgiɗin nek addoŋgu, anah sit dawmbat na: «Kədaŋgrãhaŋ tive tive ɓa.»

²⁵ Addoŋguk sə Eziptə, azzoŋ aka dələv na Kana'an aza Yakob afiti,

²⁶ aboton sənən na: «Yosef tay madarane'e dəmtə ɓa, ndəni dədawzəm məlĩ aka dələv na Eziptə dəwənnani!» Yakob asanək fiwwe vi dətaf wən net ɓa.

²⁷ Aboton sənənək an Yosef anah sit kpekpe'i. Yaŋ awle mawteɗ en Yosef aslən nawkan naka, maɗɗula Yakob afit akolu.

²⁸ Israyel amna: «Məkə, Yosef wətu tay egge; wanəmbat nulagən tak nəɓəl əmta ɓa.»