Va'Atəŋ 43 - Bible en Guidar

Yakob atafək dəkanəngən Benyamin

¹ May gədaki aka dəlva.

² Adan agrakən əzəm zoŋgoro akiyaŋ sə Eziptə naka, afit aɓsit na: «Məmndoŋ kəlbahaŋ səməngən zəga nawzəm siɗɗike.»

³ Yuda aɓsən na: «Ɗəf nan anah səmək wat səkkay na, an kəkinən məlmukuməŋ avokum ɓa na, haraw adalma də mənokum ɓa.»

⁴ An wakəppan məlməməŋ dəlgən də mənamə, asna wamiprik əlbah suk zəga nawzəma;

⁵ Ya an kəppan na ɓa na, nam miprikna ɓa, vi ɗəf van anah səm na: «Haraw adawlukum an məlmukum tay də mənokum ɓa ɓa.»

⁶ Israyel amna: «Vimi kəɗɗaŋ suwən mbərayən kənah sənən ɗəf van na, məlmukum tay maɓɓan lah di?»

⁷ Azlan sənən na: «Ɗəf van dəssohõm də gəla namə, Amna: “Afukum tay egge sa? Məlmukum maɓɓan tay sa?” Aka əpel na manəski məboton sən ɗəf vani. Nam aŋga məsən na, wanah na: Məki məlmukum di?»

⁸ Yaŋ Yuda anah sən Israyel afəni: «Aslən wiynəŋ dəmbat də iyna. Misilgən məlgəni, waməsam madaramə, məmtə na mənam də is zək noko, gəm kirtəm ɓa.

⁹ Naw nəslanək wən nan akawa, avaw kədassohõn an nəki suk ɓa; an nəmndagan suk ɓa, asna wanəsaw də mambray pay pak aboko.

¹⁰ Va məli vaŋ ɓa na, kəta yas mimilik təl sula.»

¹¹ Israyel, afit aɓsit na: «Adan vaski, asna yaŋ an kədaɗɗaŋgə. Məndə zəgeɗ naka dəlvəŋ addəvit gabalɗe nokum kəkasənəngən ɗəf vani: telembe siɗikke, amama siɗikke, makarɓaɓay, timbe məs məŋginit neki, kirit tassaka gəm teŋɗeke.

¹² Kəndaŋgən koɓeɗ meɓɓet avokum sap azet en miziyit a met mazlambayɗe nokumiŋki; wasan wəzlzlaɓi yi soko.

¹³ Məgəm məlmukum məsil məmndoŋ aza ɗəf vani.

¹⁴ Maŋgəlva Məzuɓappak wapsukum ulasahã nan a mahara ɗəfəska, dəppan məlmukum maɓɓanəŋ dəmilgin də munokum gəm Benyamin! Kirtu azaŋka, yaŋ na kirtu tawzaŋgə'e!»

Wəlma na Yosef masula'ən dit milmiŋgiɗin

¹⁵ Ɗiy nek agəmaŋgək wəvəla, ndəɗaŋ hãs koɓeɗ meɓɓeti aveti gəm Benyamin. Asilyoŋ addoŋ a Eziptə, aziwweŋgik aba Yosef.

¹⁶ Yosef awla Benyamin dənɗaŋ, aɓsən daya neŋgil ananda na: «Ake ɗiyiŋ eŋgili, kətawgən wəla zəga kədagəni, vi ɗiyiŋ də in adawzəmaŋ də kapaya.»

¹⁷ Ɗəf nak aɗɗak an Yosef anah səni, akek ɗiy nek eŋgil ana Yosef da.

¹⁸ Geslne armek ɗiy nek vi mətoŋgit ana Yosef da. Aɓɗaŋ na: «Viyit koɓeɗ məziyit addəvit mazlambayɗe nam maddaabəŋ neki yi. Mətoŋgəm vi kaɗɗaŋ akam surro, kaskot akamə, kakkpaŋgam ka belemɗe dit korɗe na miyi.»

¹⁹ Yaŋ azaraŋ aza daya neŋgil ana Yosef da naka, apeleŋ sənən a kirit memeŋgle.

²⁰ Aɓɗaŋ na: «Kamə, ɗəf daya nawa. Məprikik aŋ na maddaabəŋ əlbəh zəga nawzəma.

²¹ Ya adan məgap a təki nawvoŋ na, mənam met mazlambayɗe nam pəlpələ, mula na naway pak tay dit koɓet nan ama mazlambay nani. Koɓeɗ nam va məsle, məmilgitik avamə.

²² Koɓeɗ meɓɓet məki avam nalbəh zəga nawzəma. Məsən ɗəf an dəziy koɓeɗ namiŋ addivit mazlambayɗe nam ɓa.»

²³ Azlan sit na: «Məssoŋ zayə, kəgeslne'eŋ ɓa. Maŋgəlva nokum, Maŋgəlva na afukumi yi, dəpsukum wəzaɓ addəvit mazlambayɗe nokum. Nərihik koɓeɗ nokum.» Yaŋ agilgin Simeyon azeti,

²⁴ ɗəf nak akiyik ɗiy nek eŋgil ana Yosef da. Aki sitik iŋkile nawɗa tilti, ndən mah sit mogzol sit korɗe neti.

²⁵ Azaɓanənək əvəl net nak dawga wəmilyẽ na Yosef də tətaŋ paya; vi aprəmənək na, adaki adawzəmaŋ waya.

²⁶ Yosef adek eŋgili, yaŋ akisənən əvəl navet nak eŋgili, appu'oŋ afuŋ abani.

²⁷ Assohõn zay na gəɓa ziti, amna: «Mbari mazza afukum məs kənahaŋ wən nan nak di? Tay egge'e sa?»

²⁸ Aɓɗaŋ na: «Balam nok afəm tay zayə, tay egge tagay dəpaŋka.» Aɓe'eŋke, appu'oŋguk afuŋgu.

²⁹ Yosef le'gən haran, awla Benyamin məlmən wətət mani. Amna: «Aŋki tabuwa nokum kənahaŋ suwənəŋ sa?» Yaŋ amndan anahə: «Maŋgəlva dula sasãhko wətuwa.»

³⁰ Yosef awla məlmənəŋ na, gəɗe' sən zloŋzloŋgu ndən dal a giziŋ kulo' ahəm adaka.

³¹ Ndən haran heɗe'heɗe', viti. Asokuk zəni, yaŋ amna: «Məki waya.»

³² Məɗi sən nan temme, net temme, net mə Eziptiɗ məzuzəmaŋ dəndən temme, vi tive tay mə Eziptiɗ dəzəmaŋgən way dit mə Ibriɗe ɓa. Agəɗək azet va zəga nawmə'ã.

³³ Yaŋ assoŋ aban də mabərki ziti, Tizi, də gəlani, Tabuwa də gəlani, ulaŋ aza zit wizleɗ wizleɗ, gəɗe' sit gərəŋgə.

³⁴ Agəm səza haran nan naban apsiti, na Benyamin na, ɗaɗak ɗaɗak day ki an net gap təl sle'i. Asaŋgək sap dəndən hã kiyit viwwe.