Va'Atəŋ 41 - Bible en Guidar

Wissineɗ na Farawən

¹ Sə dərɓagan wəzva sula, Farawən assinke. Tay ziwwe ama məlpa Nil,

² Yaŋ awəl wasliɗe muguluŋgit buhul məkirit lelewɗe nawla, dəgilyoŋ səddəv Nil. Ndəɗaŋ ətaɗaŋ addəvit vəlarɗe.

³ Sə dərɓegeti, wasliɗe muguluŋgit buhul meɓɓet daryawɗe məterit kekyẽ kekyẽ dəgilyoŋ sə məlpa na Nil. Aziwweŋ azet wasliɗe na ma Nil neki,

⁴ wasliɗe muguluŋgit buhul daryawɗe kekyẽ kekyẽ nek, ampirninik en məkirit lelewɗe neki. Sissiŋ Farawən fəɗahə.

⁵ Ndən leŋgi, assin masulani, ki hay buhul aka ŋgaf taka, moggon gborgodono' arani.

⁶ Dərɓegeti, ki hay yaŋ buhul kəfyuwa kəfyuwa dəgilyoŋ. Səmyã na mawala aŋkəluwke.

⁷ Ki hay kəfyuwa kəfyuwa nek asɗəkinik ki hay mogget gborgodono' neki. Farawən fəɗah na: mbara wissine yi.

⁸ Təki addaŋ na, ki Farawən azlaɓka, aslən əye məs sesergeɗe də wən neti dit məsmaɗɗulet na Eziptə pakə. Farawən aboton sit wissine nani, ɗəf tay dəɓap ənah sən Farawən ɓa.

⁹ Daya net ɗiy na zəga nawsa anah sən Farawən na: «Wanərban mbərayən naw dəpaŋka.

¹⁰ Gədəv Farawən adək aket məɗɗaŋ wəza nani, azgaw a fərsəna ana daya net məgaŋ fərsəna da, in də daya net muɗakaŋ peŋ.

¹¹ Sulagəm pak missinik dəfəɗ taka, in dəndəni, naway pak də an wissine nan aŋgəl ənaha.

¹² Gawla, mə Ibri tay adak də mənamə, balam na daya net məgaŋ fərsəna yi. Məŋɗaŋ sənək wissineɗ namə. Abotet səmik wissineɗ nam naway pak va wissine nan asani.

¹³ Agəɗək va abotet səməŋ pak təɗe'i: nawa, məmndagawi, ɗəf maɓɓanəŋka, məlawni.»

Yosef tay əbotet wissineɗ na Farawən

¹⁴ Farawən slən əki Yosef, məzzay əgilgən də kakara sə fərsəna. Yaŋ məfaɗ kiyən, lukutɗe nan dədəɗgəti, ambat ana Farawən da.

¹⁵ Farawən anah sən Yosef na: «Nissinke, ya ɗəf tay dəɓap əboton su gabban ɓa. Yaŋ nəprəm akok dawnəh na, an kəprəmək wissine na, kawboton gabbani vasa.»

¹⁶ Yaŋ Yosef azlan sən Farawən, amna: «Intə ɓa, Maŋgəlva wazlan sən Farawən də moggoni.»

¹⁷ Farawən aɓsən Yosef na: «Addəv issine naw na, inyakən ziwwe a mabuzgum na Nil.

¹⁸ Wasliɗe muguluŋgit buhul məkirit lelewɗe nawla, dəgilyoŋ səddəv Nil. Ndəɗaŋ ətaɗaŋ addəvit vəlarɗe.

¹⁹ Sissiŋ wasliɗe muguluŋgit meɓɓet buhul yeŋ daryawɗe diyɗa məterit kekyẽ kekyẽ dəgilyoŋgu, nəwəl ɗah zeŋvit aka dələv na Eziptə dəwənnan pak də daryaw vas ɓa.

²⁰ Wasliɗe mə kakyã'ɗe daryawɗe nek ampirinik en məkirit buhul na maddaabəŋ neki.

²¹ Səza ampirini, məsənni na va ampirinke ɓa, vi daryaw net asanək va lahəŋka'e. Yaŋ nəfɗahə,

²² yaŋ addəv wissine naw mbərən əmpa na, nəwəl ki hay buhul aka ŋgaf taka, aret gborgodono' moggoni.

²³ Sə dərɓagani ki hay buhul, məkufit kəfyuwa kəfyuwa dəgilyoŋ, səmyã na mawala aŋkəluwke.

²⁴ Məkufit kəfyuwa kefyuwa nek assetinik en ki hay buhul moggon naka! Nənah sitik məs sesergeɗe, ya ɗəf tay dəboton su səret ɓa.»

²⁵ Yosef azlan sən Farawən na: Na Farawən na, wissine taka yi. Maŋgəlva aprəmanək sən Farawən an adaŋgla naɗɗa.

²⁶ Wasliɗe muguluŋgit lelewɗe buhulu, wəzva buhuli yi, ki hay moggon buhulu, wəzva buhuli ye'e: as pak wissine taka yi.

²⁷ Wasliɗe məkakye'ɗe, daryawɗe buhul dəzzoŋ dərɓeget meɓɓetiŋki, wəzva buhuli, ki hay buhul məkufən kəfyuwa, səmyã na mawala azləŋka, wəzva buhul na may adawsani.

²⁸ Yaŋ an nəŋgəl kawnah sən Farawən, Maŋgəlva arban sənək Farawən, an aŋgəl naɗɗa.

²⁹ Wəzva buhul dədazzan abeŋ, əba wasan diyɗa aka dələv na Eziptə va asani.

³⁰ Sə dərɓagan na, wəzva buhul na may na ŋgarya wagəɗə, kazgəti ki əba dəgəɗ aka dələv na Eziptə gərakə. May waddakan dəlva.

³¹ Kawsənni na əba agəɗək ɗah aka dəlvəŋka ɓa, vi may dədazzan dərɓagan va may na ŋgarnyaŋka.

³² Aka wissine na Farawən təl sulaŋ na, Maŋgəlva aziwginik əpel nani. Maŋgəlva waɗɗa də kakara.

³³ «Ya kakaŋ na, Farawən dəwəl ɗəf an də maɗɗulan dəɗi aka dələv na Eziptə.

³⁴ Dəɗah Farawən dəɗi ɗiy nakkoson wən na dəlva, dəgəmaŋgən mesle'e na zəga səka dələv na Eziptə, addəv wəzva buhul nawbaŋka!

³⁵ Dəkkalangən zəga nawzəm addəvit wəzvaɗe mogget nabeŋki, dəziyingən haykəmari ammba va Farawən, dəzaɓangən ka dəssangən zəga nawzəm a walaŋgəleɗe metiŋgiti.

³⁶ Dəsangən wəzaɓ addəv dələv na Eziptə, ammba wəzva buhul na may dədazzan aka dəlvəŋka, vasna may arɓehet na ɗiy səka dələv ɓa.»

Yosef akkpaŋgək daya aba Farawən

³⁷ Əpelis lewi yi aza Farawən dit məɗɗaŋ wəza nan pakə.

³⁸ Farawən aɓsit gewleɗ nan na: «Wamərah ɗəf məs Əmpəs na Maŋgəlva asan akan va ɗəfəŋ sa?»

³⁹ Farawən anah sən Yosef na: «Adan Maŋgəlva arban suk wən nan pakə, ɗəf tay də wəsən məs maɗɗulan va is ɓa?

⁴⁰ Istə kədawsok aka gəla nawa, wən an kənah sit ɗiy naw pak anan adazbaŋgə, də mazaŋga na məlĩ naw nəday kiyuk kaka'ə.»

⁴¹ Farawən anah sən Yosef: «Awle: nəɗikuk aka dələv na Eziptə dəwənnani.»

⁴² Farawən aprətək ndama nawɗi va məlĩ nan səka van, akkpasən Yosef aka vani, ndən kulo' sən lukut na ngərayã, law sən verzle na meleŋge awlani.

⁴³ Apeŋgin aka masula mawta nani, yas adaŋzlaŋ vaŋvəl abani: «Kulanəngəni!» Vas Farawən aɗi aka dələv na Eziptə dəwənnani.

⁴⁴ Farawən aɓsən Yosef na: «Intə Farawən. An is kənah ɓa, ɗəf tay nawslan pərəm van təreŋ aka dələv na Eziptə ɓa.»

⁴⁵ Yaŋ Farawən alvan Yosef na, Safnat-Pane'ah, apsəntək guluk iya nat na Asnat, wətən Poti-Fera məsdələv na On. Yosef ambatək əbbalan dələv na Eziptə.

⁴⁶ Gala Yosef aziw aba Farawən, məlĩ na Eziptə na, tay də wəzva kaklaw hoku. Yosef azarək səba Farawən abbalan dələv na Eziptə.

⁴⁷ Addəv wəzva nawba buhuluŋka, Zəga na mabardaw agəɗək diyɗa.

⁴⁸ Yosef akkalanək zəga nawzəm pak addəv wəzva buhuluŋ səka dələv na Eziptə, aziyək zəga nawzəm məkkalan sə walaŋgəleɗe na muyã dəssoŋ tərwəslə a walaŋgəleɗe gugriɗe.

⁴⁹ Yaŋ Yosef akkalan haykəmari ɗigit ɗigiti, va hoyoŋko na pehe, gap awɓap əŋɗan əmpa ɓa, vi man awsla ɓa.

⁵⁰ Ka wəzva na may dəgapgəni, Yosef awək kirin sula dət Asnat, wətən Poti-Fera, məsdələv na On.

⁵¹ Yaŋ Yosef alvan Tizi nan na, Manase, vi amna: «Maŋgəlva azgətgəwək ki əzəmsahã naw də gəla na əbba pakə.»

⁵² Alvan Zərmba nan na, Efrayim, ənah nan addəv əlvas na: «Maŋgəlva akol suwək uwa aka dələv nawzəm sahã nawa.»

⁵³ Wəzva buhul nawba naka dələv na Eziptə nak agraka.

⁵⁴ Wəzva buhul na may tay əki kiyən va Yosef anah farə. May tay aket dəlveŋge gboŋgu, ya aka dələv na Eziptə dəwənnan hara na, zəga na wəzəm tay.

⁵⁵ May tay əda aka dələv na Eziptə gboŋ kana, ɗiy atəŋgaŋgək əssõh zəga nawzəm ava Farawən də əhəma. Farawən azlan sit ɗiy na Eziptə pak na: «Məddoŋ mula Yosef, məɗɗa an adawnah sukum.»

⁵⁶ May atəhək dələv pakə. Yosef akolik met meheɗ na walaŋgəleɗe gugriɗ pak avələk haykəmari sit ɗiy na Eziptə. Vi may awanək zən a Eziptə.

⁵⁷ Ɗiy pak tay əzzoŋ a Eziptə əlbəh əzəm ava Yosef, vi may agəɗək aka dələv gboŋgu va may na ŋgarnya.