Va'Atəŋ 40 - Bible en Guidar

¹ Dərɓeget wənɗes pak na, ɗəf məpsən əsa sən məlyã də mədə peŋ ana məlĩ da, aɗɗaŋgək mbərayən aba məlĩ na Eziptə.

² Farawən adək gədəv aket ɗiy gugriɗ sula səret ɗiy nabani: Daya net muɗakaŋ zəga nawsa də daya net mədaŋ peŋ,

³ məmpeti a fərsəna eŋgil ana daya net məgaŋ gəla na fərsəna da, a təki an Yosef asan məfərsəna.

⁴ Daya net məgaŋ fərsəna appetik ammba va Yosef dəgəɗ sitgən wəza, assoŋguk pay ɓəɓay a fərsəna.

Yosef tay əboton issine net mə fərsənet sula neki

⁵ Daya na zəga nawsa də daya na peŋ na məlĩ na Eziptə məmpet addəv gəla na fərsəna, assineŋgik sulegit pak dəfəɗ taka, naway pak də wəssine nani, də əboton nani.

⁶ Yosef pay azet də pumo, arih na, naway pak tay simbime simbime.

⁷ Yaŋ assohẽt ɗiy gugriɗ na Farawən mes dəsoŋ dəndən addəv gəla na ɗəf daya nan neki: «Vimi kəssoŋ simbime simbime dəpaŋ vaŋkəŋ di?»

⁸ Azlan sənən na: «Missinik dəpaŋka, ya ɗəf tay nawboton səm wissine van ɓa.» Yosef aɓsit na: «Maŋgəlva yi nawboton ɓa sa? Mənah su ɗa.»

⁹ Daya na zəga nawsa nak aboton sənək wissine nan sən Yosef aɓsən an: «Nissinik na, megezlembirke tay abawa.

¹⁰ Kiva megezlembirke van tay hoku a zluzluŋgburun. Atəŋ əgilgin motogononi, ndən təŋ əffuyõ, mokkoy net kirtin anahəka.

¹¹ Huloŋguk nawsa mbazla na megezlembirke na Farawən tat avawa. Nigimik mokkoyɗe nek kãw, nəmburesl addəvət huloŋguk na Farawən nəpsənət ammba vani.»

¹² Yosef aɓsən na: «Gabba wən nan yaŋka. Kivan hokuŋ na, əvoŋ hoki yi.

¹³ Addəv əvoŋ hoku əmpa na, Farawən waɗi kiko wamndogok a gəloko. Wakəpsənət huloŋguk na zəga nawsa nan va kədapsən lahəŋka.

¹⁴ Ya an kəɗɗumonək, va məsam də is na, pay kərəh kiyko, kəɗɗumgən akawa, kəpelgən wən naw sən Farawən, nəgilgən səddəv gəlaŋka.

¹⁵ Vi əhal məhalu səka dələv net mə Ibriɗe, aŋ van dayday nəgəɗ zəga nawtoŋgu a fərsəna ɓa.»

¹⁶ Adan daya net mədaŋ peŋ ana məlĩ da nak awla Yosef abotonək wissine van təstəsə, aɓsən na: «Naw pak nissinik na, in tat dit hiliŋgiɗ na way hoku na məpəpəla akawa.

¹⁷ Addəv kəggəl an na disiŋ faɗə, zev gəpeɗ məs Farawən adawzəm temtem pak tahəŋgə, biŋgeɗ tahəŋ iyeɗnin səddəv kəggəl səkawa.»

¹⁸ Yosef azlani, amna: «Vaŋ aŋgəl ənəha. Kəggəlɗe hokuŋki, əvoŋ hoki yi.

¹⁹ Apələk pay hoku Farawən wataw kiyuk səkoko. Walawuk aka wəlaŋga, biŋgeɗ wazlorkuni.»

²⁰ Pay mohokon nak agapə, pay wəzləra nawwa na Farawən, agəɗək waynabaya sit məɗɗaŋ wəza nan pakə, akiyik ɗiy gugriɗ nawzəm də an nawsa neki.

²¹ Aɗiyək daya na zəga nawsa nak aka wəza nani, yas apsənət huloŋguk aka va Farawən,

²² yaŋ məlaw daya net ɗiy mədaŋ peŋ naka. Va Yosef aboton sit wissine neti;

²³ daya na zəga nawsa nak dəɗɗum aka Yosef ɓa, ndən kiyən zəgətə.