Va'Atəŋ 4 - Bible en Guidar

Kayin də Abel ( 4:1-26 )

¹ Ɗəf asəntək ɗak nan Hawwa. Təɗiyək daway, tuwak Kayin, yaŋ təmna: «Nərahək ɗəf səza Yawe.»

² Yaŋ təmsak uwa Abel məlməni. Abel məzuteɗ timeŋgiɗi, na Kayin na, məzinse dəlvafuŋgi.

³ Mawala agap na, Kayin akiyək zəga na Mabardaw ərəh nan naka dəlvafuŋ kawvəl dəndən sən Yawe;

⁴ Abel tam akiyək uwa na məlviya net gilew nani gəm səlhã neti. Yawe awələk aza Abel də əvəl nani,

⁵ ya duwəl aza Kayin də əvəl nan ɓa. Kayin adəkgədəv diyɗa, ampak kiyən afuŋgu.

⁶ Yawe anah sən Kayin na: «Vimi kədawdagədəv di? Vimi kəmpa kiyuk afuŋ di?

⁷ An moggon kəgəɗ na, wakəsilgin kiyko. Ya an moggon kəgəɗ ɓa na, mambray tay a maddambok ɗuffo, man aka əska wəloko. Dəɗah nok, aska wəlani.»

⁸ Yaŋ Kayin anah sən Abel, məlmən na: «Damsa awra ɗa.» Adan addoŋgu, ndən akan le', bay əbayni.

⁹ Yawe anah sən Kayin na: «Ngay məlmuk Abel di?» «Amna, nəsən ɓa. Məzutaɗa na məlmuw nan sa?»

¹⁰ Anahək na: «Miy kəgəɗəŋ di? Wəlet mbel na məlmuk Abel səfuŋ, tay əhəmaŋ kəlazawa.

¹¹ Kakaŋ na, mərayguk kənan aka dələv məs dəkol man kawtef mbel na məlmuk səvoko.

¹² Pay kinsi aka dəlvafuŋgu, azban na əgəɗ suk zəga əmpa ɓa. Slorslor kədassok məza əffet ɓa aka dəlvafuŋ.»

¹³ Kayin anah sən Yawe na: «Heslepe nawəŋ adayək ki nawsla.

¹⁴ Yaŋ na kərɓahawək dəpaŋ səka dəlvəŋka, wanəɗam faraɗa səma horoko, wanəbbal aka dəlvafuŋ slorslor məza əffet ɓa. Ɗəf an dərəhuw pak wabaywa.»

¹⁵ Yawe aɓsən na: «Vi vaski ɗəf dəbay Kayin na, kampəlni kiyən təl buhulu.» Yaŋ Yawe agəɗ zəga aka Kayin nawsənən azani, vi ɗəf dərəh pak adawbayin ɓa.

¹⁶ Yaŋ Kayin azar səba Yawe, alək əsan aka dələv na Nod kəlammba pay nampum na Eden.

Zev Kayin

¹⁷ Kayin asəntək ɗak nani, təɗiyək daway, ndət bok uwa Henok. Kayin ampak walaŋgəla-metiŋ, alvan na Henok də iya na wətən naka.

¹⁸ Henok tam awa Irad, afən Mehuya'el; Mehuya'el, bok Metusa'el, Metusa'el van tam awa Lamek.

¹⁹ Lamek akayək gil sula; iya nat taka na Ada, akən maɓɓat tam, Silla.

²⁰ Ada tuwak Yabal; ndəni afit ɗiy naddəv gizlirke dit gazlaŋɗe.

²¹ Iya na məlmən na, Yubal; ndəni afit məbayaŋ gəzləŋtəndəŋ gəm muffoŋ pozlorɗe.

²² Nat Silla tam tuwa Tubal-Kayin, məŋzla məzuɗel zəgeɗ məs met pakə məzərsla təbəz pepreŋge, gəm təbəz titir pakə; məlmən Tubal-Kayin muguluŋgut tat iya nat na, Na'ama.

²³ Lamek aɓsit gil nan na: «Ada dət Silla, məprəm əpel nawa, gil na Lamek, məpak sləmokum ammba an nədawnəhã! An vaŋvi aɗiyək azawa, in ɗəf nan bayə, an gəla ərga yi, in muzliya bayə.

²⁴ Vi əmpəlkiya na Kayin wagəɗ təl buhulu, ya na Lamek wasan gap təl kaklaw buhulu kiyən buhulu.»

²⁵ Adam asəntək ɗak nan əmpa, tuwək wiyna, təlvan na, Set, «Təmna: vi Maŋgəlva aɗi suwək zəŋve maɓɓan a gəla Abel, məs Kayin abayəŋka.»

²⁶ Yaŋ Set, awə wiyin tamə, alvan na, Enos. Səza daski ləŋ mətəŋ əkkaman Maŋgəlva də iya na Yawe.