Va'Atəŋ 39 - Bible en Guidar

Yosef ana mə Eziptə Potifar da

¹ Yas məka Yosef a Eziptə, Potifar mə Eziptə, daya aba Farawən, ndəni daya net məgaŋ gəla na məlĩ Farawən, albəhək səvet mə Ismayelɗe məs dəkiynən adaka.

² Yawe asanək də Yosef, an adaɗɗa pak tay əhhar ammbani. Asanək ana mə Eziptə da ɗəf daya nan naka.

³ Daya nan awlak na Yawe tay dəndəni, an adaɗɗa pak Yawe tay əɓaygən ammba vani.

⁴ Yosef arahək kinenek ava ɗəf daya nani, aɗiyək aka wəza nani. Aɗiyək ka daya naka gəla nan də arya nan pak ammba vani yi.

⁵ Səza aɗi Yosef aka gəla nan ləŋgə, yas Yawe aki əzaɓ nan aka gəla na mə Eziptə naka; əzaɓ na Yawe asanək aket aryeɗ nan pakə, eŋgili, va awra.

⁶ Yaŋ appan arya nan pak ammba va Yosef, zəga tay adaɗɗum akan əmpa adəbər ki peŋ nawka aman ɓa. Yosef, ziw nan na, gawla lelew nawla azani yi,

Yosef dət guluk na ɗəf daya nani

⁷ dərɓaga wənəs na, harat ga ɗəf daya na Yosef askələk akani, təmna: «Avoŋguwa.»

⁸ Yaŋ aɓoŋgu, aɓsət ga ɗəf daya nak na: «Awla ɗəf daya naw aɗiwək abani, zəga neŋgil tay adagəkgrəŋ akan əmpa ɓa. Zəga nan pak ammba vaw apsuwa.

⁹ Ɗəf tay daykiyu addəv gəlaŋ ɓa, tay məs ataku səkan an istə ɓa ɓa, vi kəsok gulkuni. Mbarmbar kan nədaɗɗa zəga daryaw gbas, in kaɗɗa mbərayən aka Maŋgəlva di?»

¹⁰ Va təki addaŋ pak, tədawnah sən Yosef, ya nan aprəm mat nawvoŋ a maŋgavat vi kawsan ndəndət ɓa.

¹¹ Pay mbərəni, atoŋguk eŋgil aka wəza nani, ɗəf taka neŋgil tay adak ɓa,

¹² ndət fiw ərman aza lukut nan dawnəh na: «Avoŋguwa!» Ndən lukut nan nak mbagən avata, ɓak ənzan vit appaka.

¹³ Adan tula appan lukut nan avata, anzan appaka,

¹⁴ yaŋ təye ɗiy məɗɗaŋ wəza neŋgil neki, təɓsit dawnəh na: «Mula aki səmək mə Ibri vi kasmaygəmə! Ade azaw kawvoŋguwa, yaŋ nəŋgəsl vaŋvəl dayadaya.

¹⁵ Ya adan aprəm nəslan wəlaw, nədawya, appanək lukut nan a maŋgavaw, ndən ɓak vit appaka.»

¹⁶ Təɗiyək lukut na Yosef nak a maŋgavat ta', hã gap pay zələt ade eŋgili.

¹⁷ Təpel sənək zev əpeləŋka, də wənah na: «Balam mə Ibri kəki səmən adek azaw vi kasmayawa.

¹⁸ Səza nəŋgəsl vaŋvəl dayadaya dawya ɗiy, ndən mbagən lukut nan a maŋgavawa, ndən ɓak appaka.»

¹⁹ Adan ɗəf daya nak aprəm an gon tənah sən na: «Vaŋki zəga an balam nok agəɗ suwa», gədəvən adək sawɓa.

²⁰ Ɗəf daya na Yosef nak aɗi addəv təzoŋ, təki net məfərsəneɗ na məlyã. Gala asan a təzoŋ na.

Yosef a Fərsəna

²¹ Yawe tay də Yosef. Arban sənək moggon nan də ərah sən ulasahã na daya na Fərsəna.

²² Daya net məgaŋ məfərsəneɗ appetik məfərsəneɗ pak ammba va Yosef; an adaɗɗaŋ adak pak, ndəni məzədawgəni.

²³ Daya net məgaŋ məfərsəneɗ zəga tay adawla ɓa zəga pak ammba vani, vi Yawe tay dəndəni; an adaɗɗa pak Yawe tay ədawgən də tiveni.