Va'Atəŋ 34 - Bible en Guidar

Simeyon də Levi tay əmpəlnən kiyət məlmit məraygəta

¹ Dina, wətət Le'a tuwə sən Yakob, təgilik kawle kirin muguluŋgit naka dəlvəska.

² Sikem, wətən Hamor mə Hitti, ɗəf metiŋ naka dələv vani, awlət arməta, avoŋgət aŋgarta.

³ Appanək megenegenen pak akat Dina, wətən Yakob, aŋglutək waŋ gorukəŋ diyɗa, an sə makran adawpel səta.

⁴ Sikem anah sən Hamor, afən na: «Agəm suwət waŋkəŋ ka gulku.»

⁵ Yakob aprəmək na arga'atək Dina wətəni; ya adan kirtin awraŋ dit gazlaŋɗe, ndən ɓat hã gap pay azzoŋgu.

⁶ Hamor, afən Sikem, agilik kawpel də Yakob.

⁷ Kirtin Yakob amndoŋguk sura. Səza aprəməni, awlanən na wəra məreti, adaŋgək gədəv diyɗa sawɓa, vi Sikem agəɗək zəga nawla gəbay a Israyel də wəvoŋgət wətən Yakob; ya aɗɗa vas ɓa.

⁸ Yaŋ an Hamor apel dənɗaŋ: amna: «Wətu Sikem aŋglutək wutukum kiyən boŋgu, məpsənət ka gulku.

⁹ Məslãh də mənam addəv wəkaya: kəpsimingən kirtukum, mipsukumgən en nam tamə.

¹⁰ Kəssoŋgən də gəla a walaŋmə, dələv tay abokum pəliyə: məssoŋ akan, məgəɗ va kəŋglaŋgə, dəsan ka nokumu.»

¹¹ Sikem anah sən afət goruk nak dit milmiŋgiɗit na: «Nərah mbəlembəle ama horokum, wanəpsukum an kəŋglaŋ pakə.

¹² Mətaw su arya gədak va nədawfaɗ pak də wəvəla, wanəpsukum va kədawnahaŋ suwəni, məpsuwət waŋ ka ɗak naw kaka'ə.»

¹³ Kirtin Yakob, azlan sənən Sikem də Hamor afən də wən tər addəvən. Anahaŋ vasna vi arga'at Dina, milmiti.

¹⁴ Aɓsitin na: «Məɓap na kaɗɗa zəgas kapsənət məlməm sən ɗəf məs dəskəlawra ɓa ɓa, vi vasna zəga narba wili azamə.

¹⁵ Mədawsler də munokum na, ɗəf mizilin nokum pak dəskəl səkəlsa awra.

¹⁶ Wamipsukum kirtim muguluŋgiti, wamikey en nokum, waməsam də mənokum, waməkkpaŋ ɗiy taka.

¹⁷ An kətafnən na əskəlawra ɓa, waməgəmət wətəm waməmbatə.»

¹⁸ Wən net lewi a mahara Hamor, də Sikem wətəni.

¹⁹ Məza wəzan pay mbo'sa ɓa, gawla nak atafək wən nani, vi man tay akat wətən Yakob. Kiyən anan adawɗiyaŋ day ana afənda.

²⁰ Hamor, də Sikem wətəni, azzoŋ a mahara walaŋgəla-metiŋ net də wənah sit na:

²¹ «Ɗiyiŋ wən tay a walaŋgəm dənɗaŋ ɓa, dəssoŋ də gəla a walaŋmə, dəɗɗaŋ va aŋglaŋgə, dələv dəsan abet pəliyə; məkey sim kirtiti, dəkeynin namə.

²² Də as pak an ɗiyiŋ waslereŋ də mənam na, ɗiy mezeŋgleket nam pak dəskəlaŋ awra va neti.

²³ Gazlaŋɗe net də aryeɗ net pak akkpaŋ na ka nam laha, an məslerik dənɗaŋ assoŋgək də mənam faɗ ɓa sa?»

²⁴ Ɗiy en dəgilyoŋ a mahara walaŋgəla-metiŋ pak aprəmənək məs Hamor də Sikem wətən apeleŋgi; ɗiy mezeŋgleket dəgilyoŋ a mahara walaŋgəla-metiŋ pak askəlaŋgək awra.

²⁵ Aka pay mohoko'o agəɗə, huwwa agəɗək mondo'õslõ tay əsseti may Simeyon də Levi, kirtin Yakob, milmiŋgiɗit Dina, atoŋgoŋ də masalam avet a walaŋgəla-metiŋ məza də geslne ɓa, abeyninik zel pak dəwən neti.

²⁶ Abeyninik may Hamor də Sikem wətəni, agəmtənək Dina səna Sikem da, ndəɗaŋ viti.

²⁷ Kirtin Yakob atoŋgoŋguk aket ɗiy aɗiyaŋ sitin vaŋvĩ naka, andetinik zəgeɗ na walaŋgəla-metiŋ, vi arga'atən milmiti.

²⁸ Andetinik gilew net dit wasliɗe neti, korɗe neti, zəgeɗ na walaŋgəla-metiŋ dit en na poho.

²⁹ Andetinik aryeɗ neti, kirtiti, gil neti, akkporinik zəgeɗ səŋgil pakə.

³⁰ Yakob aɓsit may Simeyon də Levi na: «Kəkiyaŋ səwənək əray abet ɗiy naka dəlvəŋka, mə Kana'anɗe dit mə Perziɗe pakə. Ŋgbəra'a mənan aret ɗarə, wakkalaŋ akaw kawbaywəni, kawzawiy in də gəla naw pakə.»

³¹ Azlan sənən na: «Adahək kakkpaŋgat məlməm ka məpolkoyok kan sa?»