Va'Atəŋ 32 - Bible en Guidar

¹ Laban alvəɗka, asɗetik kirtin mezeŋgleket dit muguluŋgit də wəllemit a makrani, aɓuh sitik ma, ndən buryok ananda.

Yakob tay əsla zən nalma də Esaw

² Yakob tay aka tive əmbata gala maslənɗe na Maŋgəlva arufəni.

³ Səza Yakob awle, yaŋ amna: «Dibirgidik na Maŋgəlva yi», ayak təki van na Mahanayim.

⁴ Yakob aslənək metiveɗ aza Esaw məlmən dafsəni, aka dələv na Se'ir, a muyã na Edom.

⁵ Yaŋ aɗi wən nan də wənah sit na: «Yaŋ an kədawnahaŋ sənən ɗəf daya naw Esaw: Əpel na balam nok Yakob yaŋka: Nəsawək molhõyõ ana Laban da, nənziyək adak hã gap kəkaŋka.

⁶ In tat dit wasliɗe gəm korɗe, timeŋgiɗ dit gilewi, belemɗe mezeŋglet dit muguluŋgiti, nəslən ənah sən ɗəf daya naw na, vi dulugən sãhi.»

⁷ Metiveɗ nek amndoŋguk aza Yakob, aɓɗaŋ na: «Mələk aza Esaw, məlmuko. Nan pak tay əzzan ələm suko, ɗiy tahəŋ səkat poɗo dəndəni.»

⁸ Geslne armak Yakob diyɗa, yaŋ adawɗəka. Awɗeketik ɗiy en dəndən təɓəlit sula, timeŋgiɗ dit gilewi, wasliɗe, gəm zlogomeɗi.

⁹ Anah na: «An Esaw azanək dibirgidik taka, vasna dibirgidik maɓɓan wakõhũ.»

¹⁰ Yaŋ Yakob anahə: Maŋgəlva na afu Abraham, na afu Isak, Yawe məs dənah su na: «Amil aka dələv noko, azet ɗiy noko, wanəgəɗ suk moggoni,»

¹¹ nəgap zəga ammba mbəlembəle kəgəɗ sən balam nokəŋ ɓa! Vi nəggar ki Yurden na, də zleŋge naw ama wəlaw pəkati, ya kakaŋ na, nəgəɗək təki kpik kpik sula.

¹² Kamə, akõhgu səva məlmuwa, səva Esaw, vi geslne tay ədu səni, geslne aduwək adazzan əbayu, ina, met kirin dit kirni.

¹³ Istə, kənah su na: «Wanəgəɗ suk moggoni, wanuwan suk mazlalwõk va honyoŋko na pehe, kawɓapi əŋɗan ɓa sən diyɗa nani.»

¹⁴ Avoŋguk adak dəfɗəska. Zəgeɗ memeyẽɗ en navani, agohuk kawvəl dəndən sən Esaw məlməni:

¹⁵ gilew muguluŋgit səkat sula, porsokɗe kaklaw sula, met timeŋgiɗ səkat sula gəm ndergeyẽɗ kaklaw sula,

¹⁶ may met zlogomeɗ dit kirtit uwaɗaŋ ammbet kaklaw hoku, met wasliɗe kaklaw poɗo, dit medgeɗgeɗe kəlawə, korɗe muguluŋgit kaklaw sula, mezeŋgleket kəlawə.

¹⁷ Apsit ammba vet belemɗe nan pak gazlaŋ gazlaŋ, amna: «Mətoŋ abawa, kəɗiyaŋgən walaŋ aweleŋgit gazlaŋɗe pakə.»

¹⁸ Yaŋ anah sən an maddaabəŋ na: Pay məlmu Esaw aləm suko, assohõk na: Na nawa kənan di? Aŋga kədaddok di? Gazlaŋ nabokəŋ na naway di?

¹⁹ Asna kəzlangən na: «Na balam nok Yakob yi. Əvəl sən ɗəf daya naw Esaw yi, yas dərɓagamə.»

²⁰ Əpel məstaka apel sən masula'a, sən mohoko'o, sit məzəlmetin zəgeɗ memeyẽɗ meɓɓet pakə: «Məstaka kədawpeleŋ sənən Esaw, pay kədawrəhəni,

²¹ kənahaŋgən na: Balam nok Yakob tay əzzan dərɓagamə.» Adawnəh vasna: «Vi kazzayan makrani an əvəl ambatək daabəŋ; sə dərɓagan na, mələmgən haram sekseki, kuzuŋ watafu də wənnek soko.»

²² Əvəl nak alək daabəŋ kiyən, ndən sən kiyən bew a dibirgidik kimi.

Yakob tay əzlba də Maŋgəlva

²³ Dəfəɗ nani'e, asil, ande gil nan sulegiti, belemɗe nan sulegiti, gəm kirtin kəlaw kiyit taka, aggar ki Yabok də tələn.

²⁴ Andek aggargitik ki loloho, sissiŋ aggergit zəgeɗ nani,

²⁵ Yakob asanək takərgəni. Ɗəf azləbək dəndən hã bapummo.

²⁶ Awla na, askana wəlan ɓa, argak aka totoslni, serkezle Yakob fiyoku, gala adazlba dəndəni.

²⁷ Amna: «Appawa, nəmbatə bapummo agəɗka.» Amna: «Nəppok na əmbat an kəzaɓaw ɓa ɓa.»

²⁸ Aɓsən na: «Mbari iya nok di?» Amna: «Yakob.»

²⁹ Amna: «Kawyukiy əmpa na Yakob ɓa, Israyeli kana, vi kəzləbək də Maŋgəlva gəm ɗiy, kəskək wəla.»

³⁰ Yakob assohõni: «Kamə, arban su iya noko.» Amna: «Kamən kədassohõn iya naw di?» Aɓuh sən ma eske van ləŋgə.

³¹ Yakob alvan təkiyəs na Penuwel va wənəh na Hara Maŋgəlva, vi «nulak Maŋgəlva haraw də harani, yaŋ zeŋgilew akõhũ.»

³² Yakob, aggar ki Penuwel na, pay birndissey. Tay əsonɗok vi fiyokfiyokən naka.

³³ Vini mə Israyelɗe ampəraŋ bələt na totosl zəga ɓa, hã gap dəpaŋka. Vi məkposl Yakob aka totoslən, aza bələt na mettileni.